អ្នកស្រី យិន លេង ជាអ្នកប្រកបមុខរបរលក់ក្រឡានតាមផ្លូវជាតិលេខ៦ ក្នុងភូមិរកាកំបុត ស្រុកប្រាសាទបាគងបានបង្ហាញថា ការប្រកបមុខរបរលក់ដូរក្រឡាន គឺអ្នកស្រីលក់អស់រយ:ពេលជិត ១០មកហើយ ដោយមុខរបរនេះ បានប្រាក់ចំណូលវាមិនទៀងទាត់ទេ ជួនថ្ងៃណាក៏បានតិច ជួនថ្ងៃណាក៏បានច្រើន ថ្ងៃដែលយើងលក់បានច្រើនជាងគេ គឺជាថ្ងៃបុណ្យទានមានមនុស្សមនាច្រើនបានធ្វើដំណើរឆ្លងកាត់ទៅវិញទៅមក ពួកគាត់បានទិញក្រឡានផ្ញើរបងប្អូនជាដើម។ ចំនែកថ្ងៃធម្មតាអ្នកស្រី អាចលក់បានប្រាក់ចាប់ពីរ ១០ម៉ឺនរៀល ទៅជាង ២០ម៉ឺនរៀល តែបើថ្ងៃបុណ្យទានវិញ អាចលក់បានដល់ទៅ ១លានរៀលជាងផងដែរ។
អ្នកស្រីបន្តថា ក្រឡានដែលអ្នកស្រីដុតលក់ឲ្យភ្ញៀវ គឺក្រឡានដែលមានរស់ជាតិឈ្ងុយឆ្ងាញ់ ថ្មីៗ ក្តៅៗ ហើយក៏មិនមានក្រឡានសល់ដែរ។ បើយើងនិយាយអំពីក្រឡាននោះ គ្រឿងផ្សំរបស់វា មានអង្ករដំណើប ខ្ទិះដូង ឬសាច់ដូង សណ្តែកក្រហម អំបិល ស្ករ តែប៉ុណ្ណោះ យើងផ្សំរួចហើយគ្រាន់តែយកវាមកច្រកបញ្ចូលក្នុងបំពង់ឬស្សីហើយដាក់ទឹកល្មមៗ ទើបយើងយកវាទៅដុតជាការស្រេច។
ជាមួយគ្នានោះដែរ កញ្ញា សុភា ដែលជាអ្នកលក់ក្រឡាននៅភូមិក្បួន ស្រុកសូទ្រនិគមខេត្ត បានលើកឡើងស្រដៀងៗ គ្នាថា ចំពោះអ្នកទិញក្រឡានភាគច្រើន គឺអ្នកមកពីភ្នំពេញនឹងតាមបណ្តាខេត្តនានា ដែលបានធ្វើដំណើរមកលេងនៅខេត្តសៀមរាប ហើយក៏ឆ្លៀតទិញក្រឡានផ្ញើរបងប្អូន ដោយល្បី តគ្នាថា ក្រឡានសៀមរាបឈ្ងុយឆ្ងាញ់។ កញ្ញាថា ក្រឡានរបស់កញ្ញា គឺលក់តម្លៃតាមដើមតូច ដើមធំ ចំពោះដើមតូចតម្លៃ ២៥០០រៀល ដើមធំ ៣៥០០រៀល។ ការលក់នេះ ថ្ងៃខ្លះយើងលក់បាន ៥០ដើម ថ្ងៃខ្លះ លក់បាន ១០០ដើមជាង។ ចំពោះកាលពីមិនទាន់មានកូវិដ កញ្ញាលក់ដាច់ច្រើនគួរសម ប៉ុន្តែឥឡូវនេះ មានការថយចុះជាងមុនបន្តិចបន្តួច។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
