មន្រ្តីថ្នាក់ដឹកនាំនៃក្រសួងសុខាបាល អំពាវនាវឲ្យអង្គការអន្តរជាតិ ដៃគូអភិវឌ្ឍនានា ជួយគាំទ្របន្តទៀត បើទោះជាកម្មវិធីជាតិទាំង៣ កំពុងដំណើរការប្រកបដោយដោយជោគជ័យក៏ដោយ តែជាការលើកទឹកចិត្ត ជម្រុញឆ្ពោះទៅរកគោលដៅឆ្នាំ២០២៥ !
ដោយមានការយកចិត្តទុកដាក់ខ្ពស់ចំពោះជំងឺគ្រុនចាញ់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា បានផ្តួចផ្តើម និងអនុម័តដាក់ឲ្យប្រើប្រាស់ជាផ្លូវការនូវយុទ្ធសាស្ត្រជាតិ លុបបំបាត់ជំងឺគ្រុនចាញ់នៅក្នុងព្រះរាជាណាចក្រកម្ពុជាឆ្នាំ២០១១-២០២៥។ ជាលទ្ធផល រយៈពេល១០ឆ្នាំនៃការ អនុវត្តយុទ្ធសាស្ត្រជាតិលុបបំបាត់ជំងឺគ្រុនចាញ់នេះ គឺពីឆ្នាំ២០១១ដល់ឆ្នាំ២០២១ កន្លងមកនេះ យើងឃើញថា សូចនាករអត្រាស្លាប់ដោយជំងឺគ្រុនចាញ់ត្រូវបានបញ្ចប់ ការគ្មានពលរដ្ឋស្លាប់ចាប់ពីឆ្នាំ២០១៨ គឺសំរេចជោគជ័យ០៣ឆ្នាំ មុនគោលដៅឆ្នាំ២០២០ ឯចំនួនករណីឈឺ ក៏ត្រូវបានកាត់បន្ថយប្រមាណជា ៩៧,៥% នៅឆ្នាំ២០២១នេះផងដែរ។
នេះគឺជាប្រសាសន៍លើកឡើងរបស់ លោកជំទាវ វជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ក្នុងពិធីបិទអង្គសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២ របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត បន្ទាប់ពីបានដំណើរការអស់រយៈពេល៣ថ្ងៃកន្លងមកហើយនោះ ក្រោមបណ្តាញដំណរភ្ជាប់ ចូលតាមប្រព័ន្ធនិម្មិត ទៅកាន់៣សណ្ឋាគារក្នុងក្រុងសៀមរាប និងទៅក្រៅប្រទេសផងដែរ។
លោកជំទាវក៏បានបញ្ជាក់ឲ្យដឹងដែរថា ជំងឺគ្រុនឈាម នៅឆ្នាំ២០២១កន្លងមកនេះ អត្រាឈឺក្នុងចំណោមមនុស្ស ១០ម៉ឺននាក់ គឺបានថយចុះប្រមាណជា ៨៣% អត្រាស្លាប់ថយចុះប្រមាណជា ៦៧% នៅឆ្នាំ២០២០ ក្នុងឆ្នាំ២០២១មានស្លាប់០៨នាក់ ដែលចំនួននេះ ទាបជាងឆ្នាំ២០២០ ប្រមាណជា ៥០%។ កម្មវិធីជាតិប្រយុទ្ធនឹងជំងឺដង្កូវព្រូន នៅតែបន្តធានាទប់ស្កាត់បាន មិនឱ្យមានករណីថ្មីជំងឺដង្កូវព្រូនជើងដំរីនោះឡើយ បន្ទាប់ពីក្រសួងសុខាភិបាលបានទទួលវិញ្ញាបនប័ត្រពីអង្គការសុខភាពពិភពលោកតាំងពីឆ្នាំ២០១៦ បញ្ចាក់ថា ជំងឺនេះលែងជាបញ្ហាសុខភាពសារធារណៈទៀតហើយ នៅក្នុងប្រទេសកម្ពុជា។ ជំងឺស៊ីស្តូ បានបន្តថយចុះអត្រាប្រវ៉ាឡង់តាំងពីឆ្នាំ២០១៨ មកដល់ឆ្នាំ២០២១នេះ បានបង្ហាញអំពីវឌ្ឍនភាពកាន់តែខិតគៀកទៅដល់ការលុបបំបាត់ជំងឺនេះ នាឆ្នាំ២០២៥។
ក្នុងនាមក្រសួងសុខាភិបាល លោកជំទាវបានអំពាវនាវ សូមឲ្យស្ថាប័នពាក់ព័ន្ធ ព្រមទាំងអង្គការជាដៃគូទាំងអស់ ដែលបានសម្របសម្រួលជួយគាំទ្រកម្មវិធីជាតិទាំង០៣ ទាំងលើ ទាំងផ្នែកបច្ចេកទេស និងថវិកា រហូតទទួលសំរេចបានលទ្ធផលគួរជាទីមោទននេះ សូមឱ្យដៃគូទាំងអស់ បន្តជួយគាំទ្របន្ថែមទៀត ដោយមានកិច្ចសហការ និងសហប្រតិបត្តិការ ឲ្យកាន់តែទូលំទូលាយ មានប្រសិទ្ធភាព និងបត់បែនតាមស្ថានភាពជាក់ស្តែង ដើម្បីសម្រេចឱ្យបាននូវការងារលុបបំបាត់ជំងឺគ្រុនចាញ់ក្នុងព្រះរាជាណាចក្រកម្ពុជានាឆ្នាំ២០២៥ខាងមុខនេះ។
យ៉ាងណាក៏ដោយ ឆ្លៀតក្នុងឱកាសនោះ លោកជំទាវ បានផ្តល់នូវណែនាំដល់មន្ទីរសុខាភិបាលរាជធានី-ខេត្ត និងអាជ្ញាធរថ្នាក់ក្រោមជាតិ បន្តពង្រឹងការអនុវត្តវិធានការណ៍សុខាភិបាល ក្នុងការប្រយុទ្ធ នឹងទប់ស្កាត់ការឆ្លងរាលដាលនៃវីរុសកូវីដ-១៩នៅក្នុងសហគមន៍ និងត្រូវខិតខំពន្លឿនការចាក់វ៉ាក់សាំងកូវីដ-១៩ ជូនដល់គ្រប់ក្រុមអាយុពី៣ឆ្នាំឡើងទៅ សំដៅធ្វើឱ្យអត្រាគ្របដណ្តប់នៃការចាក់វ៉ាក់សាំងកូវីដ-១៩ បានកើនឡើងខ្ពស់ ទាំងដូសទី១ ដូសទី២ ដូសទី៣ ឬដូសជំរុញ៕
អត្ថបទ និងរូបភាព ៖ ងឹន គីមឡេង
