កម្រាលផ្លូវចូលប្រាសាទព្រះគោ ដែលទទួលរងការខូចខាតធ្ងន់ធ្ងរ ត្រូវបានក្រុមមន្ត្រីជំនាញនៃអាជ្ញាធរជាតិអប្សរា ធ្វើការជួសជុលឡើងវិញ។
លោក សារ៉ាយ គឹមហួល មន្រ្តីបច្ចេកទេសអភិរក្សក្រុមប្រាសាទរលួស បានឲ្យដឹងនៅ រសៀលថ្ងៃទី២៨ ខែកុម្ភៈ ឆ្នាំ២០២២នេះថា ដោយសារកត្តាអាយុកាល កត្តាធម្មជាតិ បានធ្វើឲ្យកម្រាលប្រាសាទព្រះគោ មានសភាពទ្រុឌទ្រោមយ៉ាងខ្លាំង។ លោកបន្តថា ការងារសំខាន់ចំពោះមុខដែលត្រូវយកចិត្តទុកដាក់ ក្នុងការជួសជុល រួមមាន ជួសជុលពង្រឹងកម្រាលថ្មបាយក្រៀមដែលបុព្វបុរសបានក្រាលលើផ្លូវចូលប្រាសាទ ដែលថ្មមួយចំនួនត្រូវពុកផុយ បាក់ស្រុត និងបាត់បង់ ដោយធ្វើការពង្រឹងគ្រឹះក្រោម ជួសជុលថ្មដែលបាក់ខូច និងស្វែងរកថ្មដែលបាត់មកដាក់តាមទីតាំងដើម។
លោក គឹមហួល បន្តថា ការងារជួសជុល ថែទាំនេះជាផ្នែកមួយនៃកិច្ចអភិរក្សដែលអាជ្ញាធរជាតិអប្សរាបានធ្វើជាប្រចាំ ដើម្បីថែរក្សាប្រាង្គប្រាសាទបុរាណ អោយនៅគង់វង្សយូរអង្វែង។ ប្រាសាទព្រះគោ ជាប្រាសាទបុរាណមួយ ស្ថិតក្នុងក្រុមប្រាសាទរលួស។ ប្រាសាទនេះ ស្ថិតនៅក្នុងភូមិឪឡោក ឃុំបាគង ស្រុកប្រាសាទបាគង ខេត្តសៀមរាប។ ក្រុមប្រាសាទរលួស មានប្រាសាទបុរាណជាច្រើន ស្ថិតក្នុងស្រុកប្រាសាទបាគង ដូចជាប្រាសាទបាគង ប្រាសាទរលួស ប្រាសាទព្រៃមន្ទីរ ប្រាសាទត្រពាំងផុង ប្រាសាទទទឹងថ្ងៃ ប្រាសាទព្រះគោ ជាដើម។ លោកថា កិច្ចការជួលជុលប្រាសាទបុរាណនេះ ក្រុមការងារនឹងបន្តធ្វើជាប្រចាំមិនមានកាលវេលាកំណត់ទេ៕
អត្ថបទ និង រូបភាព៖ លោក ជា ស្រស់
