អាជ្ញាជាតិអប្សរា បានបើកវគ្គបណ្តុះបណ្តាលពង្រឹងជំនាញ ស្តីពី «បទដ្ឋានក្នុងការរៀបចំដីធ្លី និងការគ្រប់គ្រងសំណង់ក្នុងរមណីយដ្ឋានអង្គរ» ជូនដល់មន្ត្រី-បុគ្គលិក នៅថ្ងៃទី០២ ខែមីនា ឆ្នាំ២០២២ នាមជ្ឍមណ្ឌលអាជ្ញាធរជាតិអប្សរា ស្ថិតនៅស្រុកប្រាសាទបាគង ខេត្ដសៀមរាប ដើម្បីពង្រឹងសមត្ថភាព និងផ្តល់ចំណេះដឹងបន្ថែមដល់មន្ត្រី បុគ្គលិកនៅស្ថាប័ននោះ។
លោក ស៊ឹម ប៊ុនធឿន អនុប្រធាននាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ ដែលជាវាគ្មិន មានប្រសាសន៍ថា វគ្គបណ្តុះបណ្តាលនេះ មានគោលបំណង ពង្រឹងសមត្ថភាព និងផ្តល់ចំណេះដឹងបន្ថែមដល់មន្ត្រី បុគ្គលិកនៃអាជ្ញាធរជាតិអប្សរា និងនិស្សិត លើការងារពិនិត្យវាយតម្លៃអំពីសំណង់ និងការស្វែងយល់ស៊ីជម្រៅពីបទដ្ឋានច្បាប់ នៃការគ្រប់គ្រងសំណង់ ក្នុងតំបន់រមណីយដ្ឋានអង្គរ ព្រមទាំងនីតិវិធី ក្នុងការចុះសម្របសម្រួលការងារប្រកបដោយប្រសិទ្ធិភាព ស្របតាមទិសដៅរបស់អាជ្ញាធរជាតិអប្សរា ជាពិសេសដើម្បីអប់រំ និងផ្សព្វផ្សាយចំណេះដឹងដល់និស្សិតលើកិច្ចការរបស់អាជ្ញាធរជាតិអប្សរា និងការគ្រប់គ្រងរមណីយដ្ឋានអង្គរបេតិកភណ្ឌពិភពលោក។ លោក បន្តថា មន្ដ្រី និងបុគ្គលិកនេះ ពួកគាត់មកពីនាយកដ្ឋានសណ្តាប់ធ្នាប់ និងសហប្រតិបត្តិការ នាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ រួមទាំងនិស្សិតមហាវិទ្យាស្ថាបត្យកម្មនៃសាកលវិទ្យាល័យភូមិន្ទ និងវិចិត្រសិល្ប: សរុបចំនួន១០០នាក់។
ក្នុងវគ្គបណ្តុះបណ្តាលនេះ បានធ្វើបទបង្ហាញ ៤ចំណុចសំខាន់ៗ ដល់សិក្ខាកាម រួមមាន៖ ១- ច្បាប់គតិយុត្តិ (ការគ្រប់គ្រង និងប្រើប្រាស់ដី ការបដិសេធច្បាប់សាងសង់ ការអនុញ្ញាតច្បាប់សាងសង់)។ ២- សំណង់លំនៅដ្ឋានខ្មែរ(លក្ខណ:ទូទៅ នៃផ្ទះខ្មែរ ប្រភេទសំណង់ នៃផ្ទះខ្មែរ លក្ខណ:បច្ចេកទេស នៃការសាងសង់ផ្ទះខ្មែរ និងការតុបតែងកែលម្អ)។ ៣- ការផ្លាស់ប្ដូរសំណង់ផ្ទះខ្មែរ និងទី៤- គោលការណ៍របស់អាជ្ញាធរជាតិអប្សរា ក្នុងការគ្រប់គ្រងលំនៅដ្ឋានប្រពៃណីក្នុងឧទ្យានអង្គរ។ លោក ស៊ឹម ប៊ុនធឿន អនុប្រធាននាយកដ្ឋានរៀបចំដែនដី និងជាវាគ្មិន បានផ្តាំផ្ញើថា ក្រោយពីបានបញ្ចប់វគ្គបណ្តុះបណ្តាលនេះ សិក្ខាកាមទាំងអស់យកចំណេះដឹងនេះ យកទៅអនុវត្តឱ្យមានប្រសិទ្ធិភាព ដើម្បីធ្វើឱ្យប្រសើរឡើងនូវបទដ្ឋានក្នុងការរៀបចំដីធ្លី និងការគ្រប់គ្រងសំណង់ក្នុងរមណីយដ្ឋានអង្គរ ប្រកបដោយគុណតម្លៃ និងរក្សាបាន នូវរចនាបថឱ្យបានសមស្រប៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
