ឯកឧត្តម ទៀ សីហា ទទួលជួបប្រធានសហព័ន្ឋសន្តិភាពសកលប្រចាំតំបន់ឥណ្ឌូចិន ពិភាក្សាការងារ និងលទ្ធផលការងារក្នុងខេត្តសៀមរាប

នៅព្រឹកថ្ងៃទី៣ ខែកុម្ភៈ ឆ្នាំ២០២២ នាសាលាខេត្តសៀមរាប ឯកឧត្តម ទៀ សីហា អភិបាលខេត្តសៀមរាប បានទទួលជួបលោក ហាជិមិសៃតុ ប្រធានសហព័ន្ឋសន្តិភាពសកលប្រចាំតំបន់ឥណ្ឌូចិន ដើម្បីសម្ដែងការគួរសម និងជម្រាបពីការងាររបស់សហព័ន្ឋ ដែលបានដំណើរការនាពេលកន្លងមកក្នុងខេត្តសៀមរាប។

លោក ហាជិមិសៃតុ បានរម្លឹកថា នៅឆ្នាំ២០១៨ សម្រាប់ខេត្តសៀមរាប ក្រុមការងារសហព័ន្ឋសន្តិភាពសកលកម្ពុជា ធ្លាប់បានរៀបចំ កម្មវិធីអប់រំគ្រួសារនៅស្រុកពួក ក្រឡាញ់ អង្គរធំ និងស្រុកបន្ទាយស្រី។ លោកថា សហព័ន្ឋរបស់លោក មានបំណងរៀបចំព្រឹត្តិការណ៍ និងកម្មវិធីជួបជុំជាច្រើនក្នុងខេត្តសៀមរាប ដោយពិនិត្យឃើញថា ទី១ ខេត្តសៀមរាបជាខេត្តពោរពេញដោយសក្តានុពលទេសចរណ៍ ជាទីប្រមូលផ្តុំភ្ញៀវអន្តរជាតិចម្រុះជាតិសាសន៍ និងទី២ សន្តិសុខ សុវត្ថិភាព បរិស្ថាន សណ្តាប់ធ្នាប់សាធារណៈមានរបៀបរៀបរយ ចំណែកក្នុងក្រុងសៀមរាប ក៏មានផាសុខភាព និងសុវត្ថិភាពល្អផងដែរ។ ប៉ុន្តែជាអកុល ពិភពលោកបានជួបនូវវិបត្តិនៃជំងឺកូវីដ-១៩ គម្រោងជួបប្រជុំនានា ក៏ត្រូវបានអាក់ខាន ។ តែយ៉ាងណាក៏ដោយ យើងនៅតែរក្សាបាននូវទំនាក់ទំនងការងារ ជាមួយប្រមុខដឹកនាំនៃរាជរដ្ឋាភិបាលកម្ពុជា ទំនាក់ទំនងជាមួយក្រុមប្រឹក្សាវប្បធម៌អាស៊ី ពីព្រោះសន្តិភាពពិភពលោក គឺកើតចេញវប្បធម៌នេះឯង។ តាមរយៈវប្បធម៌នេះដែរ យើងនឹងទទួលបានពិភពលោកមួយ ដែលមានសន្តិភាព ការគោរពគ្នាទៅវិញទៅមក រួមរស់ជាមួយគ្នាដោយសុដុមរមនាទាំងផ្លូវកាយនិងផ្លូវចិត្ត។

ឯកឧត្តម ទៀ សីហា មានប្រសាសន៍ថា ក្នុងអតីតកាល កម្ពុជាធ្លាប់រងគ្រោះដោយសារសង្គ្រាមរ៉ាំរ៉ៃជាច្រើនទសវត្សមកហើយ តែដោយសារគោលនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រទេសជាតិ ទទួលបានសុខសន្តិភាពពេញលេញ រក្សាបានស្ថិរភាពនយោបាយ និងមានការអភិវឌ្ឍរីកចម្រើនលើគ្រប់វិស័យគួរជាទីមោទនៈ។ តែទោះជាដូច្នេះក្តីក៏កម្ពុជាមិនអាចខ្វះបាន នូវការចូលរួម និងកិច្ចសហការគ្រប់ជ្រុងជ្រោយពីដៃគូអភិវឌ្ឍន៍ និងប្រតិបត្តិករនៃវិស័យឯកជននានាឡើយ។ ការរួមគ្នានេះ គឺនឹងអភិវឌ្ឍន៍ឱ្យកម្ពុជាផ្លាស់ប្តូរពីប្រទេសកំពុងអភិវឌ្ឍន៍តិចតួច ក្លាយទៅជាប្រទេសអភិវឌ្ឍន៍រីកចម្រើនដូចបណ្តាប្រទេសជឿនលឿននៅក្នុងពិភពលោក។

ឯកឧត្តមអភិបាលខេត្ត ក៏បានគាំទ្រនូវរាល់សកម្មភាពរបស់សហព័ន្ឋសន្តិភាពសកលប្រចាំតំបន់ឥណ្ឌូចិន(UPF)ថាពិតជាបានជួយរួមចំណែកជាមួយការងារសង្គមជាច្រើនជាពិសេសតាមរយៈកម្មវិធីពិភាក្សា ដើម្បីយល់ចិត្តគ្នា ដែលបានរៀបចំធ្វើនៅក្នុងស្រុកមួយចំនួននៅខេត្តសៀមរាបនាពេលកន្លងមក ដែលបានជួយសម្រួលនូវស្មារតីអហិង្សាក្នុងគ្រួសារ កាត់បន្ថយនូវជំងឺផ្លូវចិត្ត និងអំពើហិង្សាក្នុងគ្រួសារនៅតាមតំបន់ជនបទ។

សូមជម្រាបថា សហព័ន្ឋសន្តិភាពសកលគឺជាបណ្តាញនៃគ្រួសារ និងស្ថាប័នអន្តរជាតិ អន្តរសាសនា ដែលមានអ្នកតំណាងមកពីគ្រប់សាសនា រដ្ឋាភិបាល សង្គមស៊ីវិល វិស័យឯកជន ដោយមិនប្រកាន់និន្នាការនយោបាយ និងមិនមែនជាគណបក្សនយោបាយ ឬពាក់ព័ន្ឋនឹងនយោបាយឡើយ ប៉ុន្តែសហព័ន្ឋនេះ ផ្តល់តម្លៃលើតួនាទី ដែលអ្នកនយោបាយដើរតួក្នុងពិភពដ៏ស្មុគស្មាញក្នុងអភិបាលកិច្ច និងទំនាក់ទំនងអន្តរជាតិរបស់ខ្លួន។ សហព័ន្ឋសន្តិភាពសកលនេះដែរ បង្កើតឡើងក្នុងគោលបំណងលើកកម្ពស់សន្តិភាពជាសកល ដើម្បីរួបរួមគ្នាបង្កើតពិភពលោកសន្តិភាពមួយ ហើយសមាជិកទាំងអស់គឺជាសង្គមគ្រួសារមួយដែលអាចរស់នៅនិងធ្វើការជាមួយគ្នាដោយសុដុមរមនា មានវិបុលភាពរួមគ្នានិងចេះគោរពគ្នាទៅវិញទៅមក ក្រោមការប្តេជ្ញាចិត្តរួមគ្នា ក្នុងកិច្ចសហប្រតិបត្តិការតាមរយៈអភិបាលកិច្ចល្អ៕

អត្ថបទ និងរូបភាព : លោក ជា ស្រស់ និងលោក យូ វង្ស
កែសម្រួល : លោក សេង ផល្លី