នៅថ្ងៃទី៣ ខែមីនា ឆ្នាំ២០២២ តាមរយៈឯកឧត្ដម ស ថាវី អនុរដ្ឋលេខាធិការ ក្រសួងការពារជាតិ និងជាប្រធានកិត្តិយសក្រុមកាងារថ្នាក់ជាតិចុះមូលដ្ឋានឃុំពាក់ស្នែង ស្រុកអង្គរធំ ខេត្តសៀមរាប លោកជំទាវឧកញ្ញា ឡេង ចាន់ណា អគ្គនាយិការ នៃក្រុម ប្រី លានសុីធីវើល និងសហការី បាននាំយកអំណោយមកប្រគល់ជូនរដ្ឋបាលខេត្តសៀមរាប ដើម្បីចូលរួមចំណែកក្នុងការទប់ស្កាត់ការរីករាលដាលនៃជំងឺកូវីដ-១៩ក្នុងខេត្ត និង សម្រាប់ចែកជូនបន្តដល់បងប្អូនប្រជាពលរដ្ឋ ដែលកំពុងជួបការខ្វះខាតក្នុងជីវភាពប្រចាំថ្ងៃ។
អំណោយដែលបានប្រគល់ជូនរដ្ឋបាលខេត្តនាពេលនោះ រួមមានអង្ករចំនួន ១៥តោន មី១០០កេស ទឹកសុទ្ឋ១០០យួរ និងទឹកស៊ីអ៊ីវ១០០យួរ។
នាព្រឹកថ្ងៃដដែលនោះ ឧកញ៉ា ខែម ប៊ុនថៃ ហៅខេមរៈសិរីមន្ត និងភរិយា ក៏បាននាំយកថវិកាចំនួន ៨លានរៀល ម៉ាស់ចំនួន ១០ម៉ឹនម៉ាស និងអាល់កុល ១០ប៊ីដុង ប្រគល់ជូនរដ្ឋបាលខេត្តសៀមរាបផងដែរ ដើម្បីចូលរួម ក្នុងការទប់ស្កាត់ការរីករាលដាលនៃជំងឺកូវីដ-១៩ ក្នុងភូមិសាស្ត្រខេត្តសៀមរាប។
ឆ្លៀតឱកាសនោះដែរ ឯកឧត្តមអភិបាលខេត្ត បានអំពាវនាវដល់បងប្អូនប្រជាពលរដ្ឋ សូមចូលរួមទាំងអស់គ្នា ទប់ស្កាត់ការឆ្លងរាលដាលជំងឺកូវីដ-១៩ និងមេរោគបំលែងថ្មីអូមីក្រុង នៅក្នុងសហមន៍របស់យើង។ ជាពិសេសត្រូវអនុវត្តន៍ឲ្យបានជាប់ជាប្រចាំតាមសេចក្តីណែនាំរបស់រដ្ឋបាលខេត្ត , វិធានការនានារបស់ក្រសួងសុខាភិបាល និង វិធានការរបស់រាជរដ្ឋាភិបាល ៣កុំ និង ៣ការពារ ឲ្យបានខ្ជាប់ខ្ជួន ដើម្បីកាត់ផ្តាច់ការចម្លងមេរោគដ៏កាចសាហាវនេះ បន្ថែមពីនេះត្រូវនាំគ្នាទៅចាក់វ៉ាក់សាំងតាមការកំណត់ឱ្យបានគ្រប់ៗគ្នា ជាពិសេសកុមារមានអាយុចាប់ពី៣ឆ្នាំឡើងទៅ ដែលត្រូវបានអនុញ្ញាតឱ្យចាក់វ៉ាក់សាំងដូសទី១៕
អត្ថបទ និងរូបភាព : លោក យូ វង្ស និងលោក ជា ស្រស់
កែសម្រួល : លោក សេង ផល្លី
