តាមរបាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា កាលពីថ្ងៃទី៣ ខែមីនា ឆ្នាំ២០២២ម្សិលមិញនេះ មានភ្ញៀវទេសចរអន្តរជាតិចំនួន១៦៩នាក់ បានមកទស្សនាខេត្តសៀមរាបតាមផ្លូវអាកាស ដែលបានចុះចតនៅអាកាសយានដ្ឋានអន្តរជាតិសៀមរាប ចំនួន ០២ជើង ក្នុងនោះមាន ៖ ១. ជើងហោះហើរ Thai Smile (WE 588) មកពី Bangkok-Siem Reap មានអ្នកដំណើរសរុបចំនួន ៦៤នាក់ ស្មើនឹង១៧សញ្ជាតិ និង ២. ជើងហោះហើរ Singapore Airlines (SQ166) មកពី Singapore – Siem Reap មានអ្នកដំណើរសរុបចំនួន ១០៥នាក់ ស្មើនឹង១៩សញ្ជាតិ ហើយក្នុងចំណោមភ្ញៀវទេសចរអន្តរជាតិចំនួន១៦៩នាក់នេះ បានធ្វើតេស្តរកមេរោគកូវីដ-១៩ ជាលទ្ធផលវិជ្ជមាន ចំនួន ០៤នាក់។
ដោយឡែក បើតាមរបាយការណ៍របស់អង្គភាពគ្រឹះស្ថានអង្គរ បានឲ្យដឹងថា នៅថ្ងៃទី៣ ខែមីនា ឆ្នាំ២០២២នេះដែរ មានភ្ញៀវទេសចរ បានទិញបណ្ណទស្សនាតំបន់រមណីយដ្ឋានអង្គរ សរុបចំនួន ២១៦សន្លឹក ក្នុងនោះ ៖ ប្រភេទតម្លៃ៣៧ដុល្លារ ចំនួន ១៦១សន្លឹក , ប្រភេទតម្លៃ៦២ដុល្លារ ចំនួន ៥១សន្លឹក និង ប្រភេទតម្លៃ៧២ដុល្លារ ចំនួន ៤សន្លឹក កើនឡើងចំនួន១.២៥០ភាគរយ គិតជាទឹកប្រាក់ស្មើនឹង ៩.៤០៧ដុល្លារ កើនឡើង១.៣១០,៣៤ភាគរយ បើប្រៀបធៀបទៅនឹងថ្ងៃខែដូចគ្នានឹងឆ្នាំ២០២១ និង បានទិញបណ្ណទស្សនាតំបន់រមណីយដ្ឋានបឹងទន្លេសាបមានចំនួន៤៦នាក់ មានទឹកប្រាក់ស្មើនឹង ៣២២ដុល្លារ ។
គួររំលឹកថា ក្នុងរយៈពេល១ខែ ដោយចាប់ពីថ្ងៃទី២១ ខែមករា រហូតដល់ថ្ងៃទី២១ ខែកុម្ភៈ ឆ្នាំ២០២២នេះ មានភ្ញៀវទេសចរណ៍ជាតិ-អន្តរជាតិ បានចូលមកទស្សនាខេត្តសៀមរាប មានសរុបចំនួន ៨៤.៥៣២នាក់ ថយចុះចំនួន ៤២,៣៦ភាគរយបើប្រៀបធៀបនឹងរយៈពេលដូចគ្នាក្នុងឆ្នាំ២០២១ មានចំនួន ១២០.៣៤៦នាក់ ក្នុងនោះ ៖ មានភ្ញៀវទេសចរជាតិចំនួន៧៧.០០០នាក់ ថយចុះចំនួន ៥១,៩៥ភាគរយ បើប្រៀបធៀបរយៈពេលដូចគ្នាក្នុងឆ្នាំ២០២១ ដែលមានចំនួន១១៧.០០០នាក់ និង ថយចុះចំនួន១២៧,២៧ភាគរយ បើប្រៀបធៀបនឹងខែមករាឆ្នាំ២០២២ ដែលមានចំនួន១៧៥.០០០នាក់ ខណៈ ភ្ញៀវទេសចរណ៍បរទេសក្នុងស្រុកមានចំនួន ៧.៥៣២នាក់ មានការកើនឡើង ១២៥,១០ភាគរយ បើប្រៀបធៀបរយៈពេលដូចគ្នាក្នុងឆ្នាំ២០២១ ដែលមានចំនួន ៣.៣៤៦នាក់ និងមានការកើនឡើង ១៩៧,៤៧ភាគរយ បើប្រៀបធៀបនឹងខែមករា ឆ្នាំ២០២២ ដែលមានចំនួន ២.៥៣២ នាក់ ។ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប ។
តាំងពីមានការរាតត្បាតខ្លាំងនៃវីរុសកូវីដ-១៩ ចូលក្នុងសហគមន៍មក បានធ្វើឲ្យសេវាកម្មទេសចរណ៍មួយចំនួនត្រូវបានបិទអាជីវកម្ម និង មួយចំនួនទៀតត្រូវបានផ្អាក ក្នុងនោះរួមមាន ៖ ផ្នែកសណ្ឋាគារ មានចំនួន១៨កន្លែងត្រូវបានបិទ , ផ្អាកអាជីវកម្មចំនួន ១៦៨កន្លែង និង កំពុងដំណើរការចំនួន ៤៤កន្លែង ក្នុងចំណោមសណ្ឋាគារដែលមានសរុបចំនួន ២២៨កន្លែង , ផ្ទះសំណាក់ បានបិទអាជីវកម្មចំនួន ១០៧ កន្លែង , ផ្អាកមានចំនួន ៧៨ កន្លែង និង កំពុងដំណើរការមានចំនួន ៧៦ កន្លែង ក្នុងចំណោមផ្ទះសំណាក់ដែលមានសរុបចំនួន៖ ២៨៣ កន្លែង និង ភោជនីយដ្ឋាន បានបិទអាជីវកម្មមានចំនួន ១០៩ កន្លែង , ផ្អាកមានចំនួន ១០០ កន្លែង និង កំពុងដំណើរការមានចំនួន ៥២ កន្លែង ក្នុងចំណោមភោជនីយដ្ឋាន ដែលមានសរុបចំនួន ២៦១កន្លែង៕
អត្ថបទ ៖ លោក លីវ សាន្ត
