មន្ត្រីអង្គការហ្វរផរ (Four Paws) បានឲ្យដឹងថា តាមការសិក្សាស្រាវជ្រាវ កាលពីពេលថ្មីៗកន្លងមកនេះ គេកត់សម្គាល់ឃើញថា ខេត្តសៀមរាប ជាទីតាំងចែកចាយសត្វសុនខ (ឆ្កែ) សម្រាប់អាជីវកម្មអាហារនៅក្នុងប្រទេសកម្ពុជា ខណៈទូទាំងប្រទេសមានការសម្លាប់សត្វសុនខនេះធ្វើជាអាហារ មានចំនួនដល់ទៅបីលានក្បាល។
ថ្លែងក្នុងការពិធីប្រកាសអំពីការរៀបចំពិព័រណ៍សត្វសុនខ នាក្រុងសៀមរាប កាលពីរសៀលថ្ងៃទី០៥ ខែមីនា ឆ្នាំ២០២២កន្លងទៅនេះ អ្នកនាង ថន រតនី តំណាងអង្គការហ្វរផរ បានលើកឡើងថា យោងតាមការសិក្សានាពេលកន្លងមកក្នុងមួយឆ្នាំៗ នៅទូទាំងទ្វីបអាស៊ីមានសត្វឆ្កែ និងឆ្មា ប្រមាណ ៣០លានក្បាល ត្រូវបានគេសម្លាប់ដើម្បីយកសាច់ធ្វើជាអាហារ។ ក្នុងចំណោមនោះ សត្វឆ្កែចំនួនបីលានក្បាល ត្រូវបានរកឃើញថា បានសម្លាប់ធ្វើជាម្ហូបនៅក្នុងប្រទេសកម្ពុជា ដោយមានខេត្តសៀមរាប ជាប្រភពផ្គត់ផ្គង់ដ៏ធំមួយក្នុងការផ្គត់ផ្គង់សាច់សត្វនេះ ទៅកាន់បណ្តាខេត្តផ្សេងៗ។
អ្នកនាង បន្តថា បើទោះបីជាយ៉ាងនេះក្តី ដោយមានការយកចិត្តទុកដាក់ពីអាជ្ញាធរខេត្តសៀមរាប ជាពិសេសមន្ទីរកសិកម្មខេត្ត ដែលមានការចាត់វិធានការតឹងរឹង គេសង្កេតឃើញថា សកម្មភាពធ្វើអាជីវកម្មសត្វឆ្កែមានការថយចុះខ្លះ។ ប៉ុន្តែគេមិនទាន់បានសិក្សាអំពីថា តើការថយចុះនៅកម្រិតណានៅឡើយនោះទេ?
អ្នកនាង រតនី បញ្ជាក់ថា ចាប់តាំងពីឆ្នាំ២០១៨ អង្គការហ្វរផរ បានសហការជាមួយសមត្ថកិច្ចកម្ពុជា សង្គ្រោះបានសត្វឆ្កែបានជាង១០០ក្បាល ដោយក្នុងនោះសត្វឆ្កែមួយចំនួន ត្រូវបានបញ្ជូនទៅកាន់ម្ចាស់ថ្មីរបស់វា ដែលមានខ្លះនៅក្នុងប្រទេស ខ្លះនៅសហរដ្ឋអាមេរិក និងខ្លះនៅអឺរ៉ុប។ អ្នកនាងបន្តថា រហូតមកដល់ពេលនេះ មានតែសត្វឆ្កែចំនួន ១៥ក្បាល ប៉ុណ្ណោះដែលនៅមិទាន់មានអ្នកមកសុំទៅចិញ្ចឹម។
គួរឲ្យដឹងថា កាលពីថ្ងៃទី០៦ ខែកក្កដា ឆ្នាំ២០២០កន្លងទៅ មន្ទីរកសិកម្ម រុក្ខាប្រមាញ់ និងនេសាទខេត្ដសៀមរាប បានចេញសេចក្តីជូនដំណឹងមួយស្តីពី ការហាមឃាត់ការធ្វើអាជីវកម្មទិញ លក់ ពិឃាដសត្វសុនខ (ឆ្កែ)។ ចំពោះអ្នកដែលល្មើស នឹងការហាមឃាត់នេះ នឹងត្រូវទទួលទោសយ៉ាងធ្ងន់ធ្ងរតាមមាត្រា១១២ ១១៣ និង ១១៥នៃច្បាប់ ស្ដីពីសុខភាពសត្វ និងផលិតកម្មសត្វ ដែលអាចជាប់ពន្ធនាគារ រហូតដល់៥ឆ្នាំ ឬត្រូវផាកពិន័យជាទឹកប្រាក់ប្រមាណ ៥០លានរៀល។
បន្ទាប់ពីមានសេចក្តីជូនដំណឹងនេះ មន្ត្រីបសុពេទ្យខេត្តសៀមរាប ក៏បានធ្វើការបង្ក្រាបការដឹកជញ្ជូនសត្វសុនខចំនួន៦១ ក្បាល កាលពីថ្ងៃទី២១ ខែកុម្ភ: ឆ្នាំ២០២១ និង ថ្ងៃទី២ ខែមេសា ឆ្នាំ២០២១ ក្រុមសមត្ថកិច្ចក៏បានចុះបិទទីតាំងអាជីវកម្មលក់សាច់ឆ្កែមួយកន្លែងនៅក្នុងភូមិទ្រាំង សង្កាត់ស្លក្រាម ក្រុងសៀមរាបផងដែរ៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
