នៅថ្ងៃទី០៦ ខែមីនា ឆ្នាំ២០២២ សម្តេចព្រះធម្មលិខិត បណ្ឌិត សៅរ៍ ចន្ទថុល្ល ព្រះរាជាគណ:ថ្នាក់ឯកឧត្តមប្រឹក្សាគណៈមហានិកាយ នៃព្រះរាជាណាចក្រកម្ពុជា ឯកឧត្តម អុិន រដ្ឋាសេរី អនុរដ្ឋលេខាធិការក្រសួងព្រះបរមរាជវាំង និងលោកជំទាវ ឯកឧត្តម ឧត្តមសេនីយឯក គង់ ប៊ុនលី មេបញ្ជាការរង នៃបញ្ជាការដ្ឋានកងអង្គរក្ស និងជាជំនួយការផ្ទាល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បាននិមន្តយាង និងអញ្ជើញជាព្រះអធិបតី និងអធិបតី រួមជាមួយព្រះវត្តមាន និងវត្តមានព្រះមន្ត្រីសង្ឃ មន្ត្រីរាជការ អាជ្ញាធរមូលដ្ឋាន និងបងប្អូនប្រជាពលរដ្ឋជាពុទ្ឋសាសនូបត្ថម្ភក៍ និមន្តនិងអញ្ជើញចូលរួមផងដែរ។
ក្នុងនាមអាជ្ញាធរក្រុងសៀមរាប លោក បូ ម៉េងទ្រី បានសម្តែងនូវការកោតសរសើរដល់ព្រះចៅអធិការ ព្រះសង្ឃ និងគណ:កម្មការវត្តអារញ្ញសាគរ ដែលបានខិតខំប្រមូលផ្តុំនូវកម្លាំងសាមគ្គី គៀរគរធនធានថវិកាពីសប្បុរសជនជិតឆ្ងាយ កសាងបាននូវសមិទ្ឋផល និងហេដ្ឋារចនាសម្ព័ន្ឋជាច្រើនទុកជាសម្បត្តិសាធារណ:សម្រាប់វត្តនេះ។ លោក អភិបាលរងក្រុងមានប្រសាសន៍បន្តថា៖ព្រះពុទ្ឋសាសនាត្រូវបានកំណត់ក្នុងរដ្ឋធម្មនុញ្ញថាចាសាសនារបស់រដ្ឋ ហេតុនេះ ការរៀបចំពិធីប្រកាសព្រះរាជក្រិត ប្រកាសន័យបត្រ ព្រះរាជាគណ: ស្រោចសុគន្ឋវារី និងកាត់ខ្សែបូរសម្ពោធសាលាធម្មសភា និងស្រះទឹក នៅវត្តអារញ្ញសាគរ នេះគឺជាការបញ្ជាក់ពីការរីកចម្រើន និងស្ថិតស្ថេរគង់វង្ស នៃវិស័យព្រះពុទ្ឋសាសនា ដោយផ្តើមចេញពីឆន្ទ: និងការគាំទ្ររបស់ពុទ្ឋបរិស័ទ តាមរយ:សទ្ធាជ្រះថ្លា និងការខិតខំប្រឹងប្រែងរបស់អាជ្ញាធរមូលដ្ឋាន ព្រះសង្ឃ គណ:កម្មការវត្តលោកតាលោយាយ ទាំងអស់គ្នា។
លោក បូ ម៉េងទ្រី បន្តទៀតថា៖ នៅក្នុងបរិបទ នៃការប្រយុទ្ឋប្រឆាំងនឹងជំងឺកូវីដ-១៩ ប្រទេសកម្ពុជា ក្រោមការដឹកនាំរបស់សម្តេចតេជោ សែន នាយករដ្ឋមន្ត្រី សម្តេចបានខិតខំសព្វបែបយ៉ាងដោយមិនគិតពីការលំបាកនិងសុវត្ថិភាពផ្ទាល់នោះទេ គឺរិះរកវ៉ាក់សាំងមកចាក់ជូនប្រជាពលរដ្ឋដោយឥតគិតថ្លៃ ចាប់តាំងពីអាយុ ៣ឆ្នាំឡើងទៅ និងចាប់តាំងពីដូសជំរុញរហូតដល់ដូសទី៤ បានគ្រប់ៗគ្នា។ សម្តេចព្រះធម្មលិខិត បណ្ឌិត សៅរ៍ ចន្ទថុល្ល បាននាំសង្ឃដិការបស់ថ្នាក់ដឹកនាំមន្ត្រីសង្ឃជាន់ខ្ពស់ នៃព្រះរាជាណាចក្រកម្ពុជា សួរសុខទុក្ខ និងផ្តាំផ្ញើដល់ព្រះគ្រូ និងភិក្ខុសង្ឃដែលទទួលបានការតែងតាំងជាព្រះរាជាគណ:ថ្នាក់កិត្តិយសក្តី ជាព្រះគ្រូក្តី សូមខិតខំប្រឹងប្រែងយកព្រះទ័យទុកដាក់ អស់ពីកម្លាំងកាយចិត្ត ដើម្បីបំរើព្រះពុទ្ឋសាសនាឱ្យកាន់តែរីកចម្រើនជាភយ្យោភាព ជានិរន្តរ៍ ក្នុងអំឡុងពេលប្រទេសមានសន្តិភាពក្រោមការដឹកនាំរបស់ប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដែលសម្តេចបានប្រឹងប្រែងយកចិត្តទុកដាក់គ្រប់ពេលវេលាក្នុងការ បំរើជាតិ បំរើព្រះពុទ្ឋសាសនា និងព្រះមហាក្សត្រ។ សម្តេច មានថេរ:ដិកាកើតសរសើរនូវការយកព្រះទ័យ និងយកចិត្តទុកដាក់សហការលើការអភិវឌ្ឍនិងជួសជុលកែលំអព្រះវិហារ សាលាឆាន់ ស្រះទឹក ទុកប្រើប្រាស់ជាប្រយោជន៍រួម ក្នុងទីអារាមនេះ ។
ព័ត៌មានជាតិ ថ្មីៗ
សម្តេចព្រះធម្មលិខិត បញ្ជាក់ថា៖ ប្រទេសយើងមានសន្តិភាព បងប្អូនប្រជាពុទ្ឋបរិស័ទអាចបំពេញបុណ្យ និងធ្វើអ្វីៗទៅតាមគោលបំណង និងសេចក្តីត្រូវការរបស់ខ្លួនដោយគ្មានក្តីបារម្ភ បើគ្មានសន្តិភាពទេ យើងក៏មិនអាចធ្វើអ្វីៗតាមតម្រូវការរបស់យើងបានឡើយ ជាក់ស្តែងដូចជាសង្រ្គាមរវាងរុស្សី និងអ៊ុយក្រែន ជាឧទាហរណ៍ គឺត្រូវរងនូវវិនាសកម្មយ៉ាងធ្ងន់ធ្ងរដោយសារសង្គ្រាមនេះឯង។
ក្នុងឱកាសនោះ ព្រះធម្មលិខិត បានប្រគេនព្រះរាជក្រិតប្រកាសតែងតាំងគោរម្យងារជាព្រះរាជាគណ:ថ្នាក់កិត្តិយសចំនួនពីរអង្គ ប្រកាសន័យបត្រតែងតាំងគោរម្យងារជាព្រះគ្រូចំនួន ៩អង្គ និងបំពាក់គ្រឿងឥស្សរិយយសប្រគេន និងជូនចំនួន ២៤អង្គ/នាក់ផងដែរ។
សូមរម្លឹកថា៖ សាលាធម្មសភាមួយខ្នងនេះ ពីមុនតូចចង្អៀតសំណង់ចាស់មានសភាពទ្រុឌទ្រោមត្រូវបានជួសជុល និងពង្រីកបន្ថែម ដោយ រុះរើ ជញ្ជាំងចាស់ចេញទាំងអស់ធ្វើថ្មី រុះរើដំបូល និងក្បាច់តាមហោជាងទាំងអស់ ធ្វើថ្មីឡើងវិញ ដោយប្រក់ថ្មី លាបថ្នាំ និងតពង្រីកទំហំទទឹងបន្ថែម៤ម៉ែត្រ ទៀត(២២ម ×១៧ម) សរុបថវិកាចំណាយចំនួន២៥,៣០០ម៉ឺនដុល្លារ៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
