វគ្គបណ្តុះបណ្តាលនេះរៀបចំឡើងនៅសណ្ឋាគារសុខាល័យអង្គរខេត្តសៀមរាប ដោយមជ្ឈមណ្ឌលជាតិកំចាត់រោគរបេងនិងហង់ហ្សិន នៃក្រសួងសុខភិបាល សហការជាមួយគម្រោងធីប៊ីឌៀ (TB DIAH) តាមរយ:ការផ្តល់មូលនិធិពីទីភ្នាក់ងារផ្តល់ជំនួយសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID)។ វាគ្មិនសម្របសម្រួលមកពីមជ្ឈមណ្ឌលជាតិ និងអ្នកជំនាញបច្ចេកទេសអន្តរជាតិមកពីគម្រោងធីប៊ីឌៀ (TBDIAH) ។ មានរយ:ពេលមួយសប្តាហ៍ចាប់ពីថ្ងៃទី០៧ ដល់ថ្ងៃទី១៣ ខែមីនា ឆ្នាំ២០២២ ដោយមានសិក្ខាកាមដែលមិនធ្លាប់បានទទួលការបណ្តុះបណ្តាល ហើយពួកគាត់ជាមន្ត្រីផ្នែកអភិបាលសម្រាប់កម្មវិធីជំងឺរបេងមកពីរាជធានី ខេត្តទាំង២៥ សរុបទាំងចំនួន ៤៥រូប ។ នេះជាវគ្គបណ្តុះបណ្តាលលើកទី២ ខណ:ដែលលើកទី១ ធ្វើនៅខេត្តសៀមរាបដែរ មានរយ:ពេល ៥ថ្ងៃក្នុងអំឡុងខែវិច្ឆិកា ឆ្នាំ២០២១កន្លងទៅ។
វគ្គនេះធ្វើឡើងក្នុងបំណងបណ្តុះបណ្តាលដល់សិក្ខាកាមជំនាញត្រួតពិនិត្យ និងវាយតម្លៃ ផ្តោតលើការពង្រឹងមូលដ្ឋានចំណេះដឹង និងជំនាញរបស់បុគ្គលិក ទាំង ថ្នាក់ជាតិ ថ្នាក់ខេត្ត និងថ្នាក់ស្រុកប្រតិបត្តិ ព្រមទាំងបុគ្គលិក នៃអង្គការមិនមែនរដ្ឋាភិបាលដែលសហការគ្នា ដើម្បីគាំទ្រការអនុវត្តផែនការយុទ្ធសាស្ត្រជាតិ ។ តាមរយ:កម្មវិធីសិក្សានេះ សិក្ខាកាមនឹងសិក្សាអំពីមូលដ្ឋានគ្រឹះ នៃការត្រួតពិនិត្យនិងវាយតម្លៃ និងការឃ្លាំមើលដោយផ្តោតលើសកម្មភាពអាទិភាព ដែលបានកំណត់នៅក្នុងផែនការយុទ្ធសាស្ត្រជាតិ និងទទួលបានការបណ្តុះបណ្តាល អំពីរបៀបវិភាគ និងបកស្រាយទិន្នន័យជំងឺរបេង សំយោគទិន្នន័យដើម្បីចងក្រងជារបាយការណ៍។ល។
ថ្លែងបើកវគ្គបណ្តុះបណ្តាល លោកវេជ្ជបណ្ឌិត ហួត ចាន់យូដា ប្រធានមជ្ឈមណ្ឌលជាតិ មានប្រសាសន៍ផ្តាំផ្ញើដល់សិក្ខាកាមដែលជាតំណាងឱ្យរាជធានី ខេត្ត ជាអ្នកទទួលបន្ទុកការងាររបេងទាំងអស់ ខិតខំត្រងត្រាប់ស្តាប់ការពន្យល់របស់គ្រូឧទ្ទេស ដើម្បីទទួលបានសមត្ថភាពបន្ថែមសម្រាប់យកទៅអនុវត្តនិងសម្របសម្រួលការងារឱ្យមានប្រសិទ្ឋភាពក្នុងការស្រាវជ្រាវ ព្យាបាល ការពារនូវជំងឺរបេងគ្រប់សណ្ឋាន នៅតាមមន្ទីរពេទ្យ មណ្ឌលសុខភាព សហគមន៍មូលដ្ឋានរៀងៗខ្លួន។ លោកវេជ្ជបណ្ឌិត ហួត ចាន់យូដា មានប្រសាសន៍បន្តថា៖ នៅកម្ពុជា ក្នុងប៉ុន្មានឆ្នាំចុងក្រោយនេះ មានអត្រាថយចុះដោយសារវិបត្តិ នៃជំងឺកូវីដ-១៩ បណ្តាលឱ្យយើងអាក់ខាន ក្នុងការស្រាវជ្រាវ ដើម្បីនាំយកករណីដែលកើតថ្មីៗ នៃជំងឺរបេងយកទៅព្យាបាលបានទាន់ពេលវេលា។ ដូចនេះ ក្នុងពេលសមស្របណាមួយយើងនឹងបើកសេវាស្រាវជ្រាវ ពិនិត្យ និងព្យាបាលអ្នកជំងឺរបេងតាមប្រក្រតីភាពឡើងវិញ និងមានការងារជាច្រើន ដែលទាមទារឱ្យយើងទាំងអស់គ្នាឈ្មុសឈ្មុលស្រាវជ្រាវយកមកព្យាបាលឱ្យទាន់ពេលវេលា ព្រោះថាមេរោគរបេងជាដៃគូជាមួយនឹងមេរោគកូវីដ-១៩ ហេតុនេះការស្រាវជ្រាវរកអ្នកជំងឺរបេងគឺយើងបានរួមចំណែកក្នុងការស្រាវជ្រាវ នៃអ្នកមានមេរោគកូវីដ-១៩ផងដែរ ដើម្បីព្យាបាលជំងឺទាំងពីរឱ្យមានប្រសិទ្ឋភាពទៅតាមផែនការរយ:ពេល ១០ឆ្នាំ(២០២១-២០៣០) ក្នុងការបញ្ឈប់ការរីករាលដាល នៃជំងឺរបេង របស់មជ្ឈមណ្ឌល ជាតិកំចាត់រោគបេង។
លោកវេជ្ជបណ្ឌិត ហួត ចាន់យូដា ក៏បានបញ្ជាក់ផងដែរថា៖ តាមរយ:វគ្គបណ្តុះបណ្តាលនេះ សិក្ខាកាមនឹងទទួលបានបទពិសោធន៍ និងបច្ចេកវិទ្យាថ្មីបន្ថែមទៀត ដែលមូលដ្ឋានគ្រឹះនៃការត្រួតពិនិត្យនិងវាយតម្លៃ និងការឃ្លាំមើល ដោយផ្តោតលើអាទិភាពជាតិ ដែលបានកំណត់នៅក្នុងផែនការយុទ្ធសាស្ត្រជាតិ ដើម្បីសម្រេចបានគោលដៅប្រទេសកម្ពុជា ប្រកបសន្តិសុខសុខមាលភាព៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ ។
