ដើមឈើជាង៥០០ដើម ស្ថិតក្នុងព្រៃសហគមន៍អូរទឹកចេញ ស្ថិតក្នុងឃុំត្រាំសសរ ស្រុកស្រីស្នំ ខេត្តសៀមរាប ត្រូវបានធ្វើការបំបួស ដោយព្រះសង្ឃ អាជ្ញាធរមូលដ្ឋាន និងប្រជាពលរដ្ឋប្រមាណជាង ១០០០នាក់ កាលពីព្រឹកថ្ងៃទី៨ ខែមីនា ឆ្នាំ២០២២ ដើម្បីចូលរួមអភិរក្ស និងថែរក្សាព្រៃឈើក្នុងមូលដ្ឋាននិងភូមិសាស្ត្រខេត្ត សម្រាប់ជាប្រយោជន៍ដល់មនុស្សសត្វទូទៅ និងបញ្ឈប់ការកាប់ទន្ទ្រានដីព្រៃតទៅទៀត។
គួរជម្រាបថា ក្នុងឃុំត្រាំសសរ មានព្រៃសហគមន៍ចំនួន៤ ចំពោះព្រៃសហគមន៍អូរទឹកចេញ ជាព្រៃសហគមន៍ធំជាងគេ មានផ្ទៃដីព្រៃជិត១១០០ហិកតា ដែលក្នុងព្រៃនេះ មានឈើប្រណីតដូចជាក្រញ៉ូង បេង ធ្នុង នាងនួនជាដើម រីឯសត្វព្រៃមានដូចជាជ្រូកព្រៃ ឈ្លូស ខ្លាត្រី។ល។ ពិធីបំបួសដើមឈើនេះ រៀបចំឡើងក្រោមគំនិតផ្ដួចផ្ដើមពីព្រះតេជគុណ តេជ ទេពវង្សា ព្រះគ្រូសូត្រនៃវត្តចន្ទរង្សីពង្រ និងព្រះសង្ឃនិមន្តមកពីតាមបណ្តាវត្តនានា អាជ្ញាធរមូលដ្ឋាន រដ្ឋបាលព្រៃឈើស្រុក ព្រមទាំងប្រជាពលរដ្ឋ និងសប្បុរសជនជិតឆ្ងាយជាច្រើន។
ព្រះតេជគុណ តេជ ទេពវង្សា មានសង្ឃដីកាថា នេះជាលើកទី១ហើយ ដែលក្រុមព្រះសង្ឃ និងញាតិញោមពុទ្ធបរិស័ទ អាជ្ញាធរមូលដ្ឋាន ចូលរួមរៀបចំពិធីបំបួសដើមឈើ ក្នុងស្រុកស្រីស្នំនេះ។ ក្នុងពិធីនេះដែរ ក៏មានរៀបចំរៀបចំបុណ្យផ្កាប្រាក់សាមគ្គី ដើម្បីប្រមូលថវិកជួយដល់សហគមន៍អូរទឹកចេញផងដែរ។
ព័ត៌មានជាតិ ថ្មីៗ
ថវិកាដែលប្រមូលបានពីបុណ្យផ្កាប្រាក់នេះ ព្រះតេជគុណ តេជ ទេពវង្សា បង្ហាញថាមានចំនួនជាង៧លានរៀល ព្រះអង្គនឹងបន្ថែមបង្គ្រប់ដល់ ១០លានរៀល ដែលចំនួនថវិកាទាំងអស់នេះ នឹងប្រគល់ជូនដល់ប្រជាសហគមន៍អូរទឹកចេញ ដើម្បីរៀបចំប្រព័ន្ធការពារទប់ស្កាត់ការកាប់ទន្ទ្រាន និងល្បាតក្នុងភូមិសាស្ត្រព្រៃសហគមន៍។ ព្រះអង្គបញ្ជាក់ ចាប់ពីឆ្នាំនេះទៅ ព្រះអង្គនឹងរៃអង្គាសថវិកា១០លានរៀលជារៀងរាល់ឆ្នាំ ដើម្បីជួយដល់ប្រជាសហគមន៍អូរទឹកចេញ ក្នុងការថែរក្សា អភិរក្សសហគមន៍ព្រៃអូរទឹកចេញឱ្យបានគង់វង្ស។
លោក ឃុត ចូច ប្រធានសហគមន៍ព្រៃអូរទឹកចេញ បញ្ជាក់ថា សហគមន៍ព្រៃអូរទឹកចេញនេះ បានបង្កើតឡើងតាំងពីឆ្នាំ២០០១ មកម្លេះ ដំបូងឡើយគឺវាមានផលលំបាកក្នុងការគ្រប់គ្រងព្រៃសហគមន៍នេះ ដោយសារតែបងប្អូនប្រជាពលរដ្ឋ ចូលមកកាប់ទន្ទ្រានដីព្រៃយកមកធ្វើជាកម្មសិទ្ធិផ្តាល់ខ្លួន។ បច្ចុប្បន្ន យើងគ្រប់គ្រងព្រៃសហគមន៍នេះ បានល្អប្រសើរជាងមុន ដោយមានការគាំទ្រពីអាជ្ញាធរស្រុក រដ្ឋបាលព្រៃឈើ ព្រះសង្ឃ ព្រមទាំងបងប្អូនប្រជាពលរដ្ឋនៅក្នុងស្រុក។ ជាក់ស្ដែងនៅថ្ងៃនេះ សហគមន៍ព្រៃអូរទឹកចេញ បានទទួលការឧបត្ថម្ភគាំទ្រពីបុណ្យផ្កាប្រាក់សាមគ្គីចំនួន ១០លានរៀល រួមនិងថវិកាមួយចំនួន ទឹកសុទ្ធចំនួន ១០០យួរ សម្លៀកបំពាក់ចំនួន ១១កំប្លេ សម្រាប់ក្រុមល្បាតព្រៃសរុប១១នាក់ផងដែរ។
អត្ថបទ និងរូបភាព៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
