កាលពីរសៀលថ្ងៃទី៨ ខែមីនា ឆ្នាំ២០២២ ក្រុមហ៊ុនហ្វេមីលីកាកាវខេមបូឌា បានចុះហត្ថលេខាលើអនុស្សរណៈនៃការយោគយល់ជាមួយក្រុមហ៊ុនអាណាចក្របៃតង លើកិច្ចព្រមព្រៀងកក់ទិញកូនដើមកាកាវ នៅរោងសម្ងួតរបស់ក្រុមហ៊ុនហ្វេមីលីកាកាវកម្ពុជា ដែលមានទីតាំងស្ថិតនៅក្នុងឃុំល្វា ស្រុកពួក ខេត្តសៀមរាប ។
គួររំលឹកថា ជាមួយនឹងពិធីចុះហត្ថលេខាលើអនុស្សរណៈនៃការយោគយល់ រវាងក្រុមហ៊ុនហ្វេមីលីកាកាវខេមបូឌា និងក្រុមហ៊ុនអាណាចក្របៃតងនេះដែរ ពិធីនេះ ក៏មានការរៀបចំកម្មវិធីនៃការចែករំលែកនូវបទពិសោធន៍ដល់កសិករអំពីការដាំ និង ការថែទាំដំណាំកាកាវ ។
លោកស្រី ស៊ុ សុរង្សី នាយិកាក្រុមហ៊ុនហ្វេមីលីកាកាវខេមបូឌា មានប្រសាសន៍ថា៖ ក្រុមហ៊ុនហ្វេមីលីកាកាវនេះ បានដំណើរការអស់រយៈពេល៣ឆ្នាំមកហើយ ហើយកាលពីថ្ងៃទី៨ ខែមីនា ឆ្នាំ២០២០កន្លងទៅនេះ ក្រុមហ៊ុនបានចុះហត្ថលេខាលើអានុស្សរណៈនៃការយោគយល់គ្នា ជាមួយក្រុមហ៊ុន COCOA Network Co.,LTD ( K.U.N ) នៃប្រទេសថៃ ស្តីអំពីកិច្ចសហប្រតិបត្តិការ ដាំដុះដំណាំកាកាវ និងប្រមូលទិញផលពីកសិករ ដើម្បីនាំចេញទៅក្រៅប្រទេសជាមួយគ្នានោះយើង បានចុះកិច្ចព្រមព្រៀងទិញកូន កាកាវ ប្រភេទឈុមផុនចំនួន១លានកូន ពីក្រុមហ៊ុននេះផងដែរ ដែលមកដល់ពេលនេះ យើងបានលក់ជូនប្រជាកសិករនៅតាម ២៤រាជធានីខេត្ត លើកលែងតែកោះកុង ដោយសារតែស្ថានភាពផ្លូវនៅឆ្ងាយ។
លោកស្រី ស៊ុ សុរង្សី បានបន្តថា កាកាវជាដំណាំកសិ-ឧស្សាហកម្ម ជាប្រភេទដំណាំកែច្នៃជានំចំណី ម្សៅភេសជ្ជៈ ជាអាហារ និងគ្រឿងសំអាងផ្សេងៗទៀត ឬជាឱសថអាហារបំប៉នជាដើមផងដែរ ហើយកន្លងមកក្រុមហ៊ុនតែងតែជម្រាបព័ត៌មានយ៉ាងលម្អិតទៅដល់កសិករដែលមានបំណងចង់ដាំកាកាវនេះ ទាំងការលក់ដើម និង ការទិញផ្លែ ដោយមានកិច្ចសន្យាជាមួយគ្នាច្បាស់លាស់ ជាពិសេសក្រុមហ៊ុនមិនលក់ជូនទេចំពោះកសិករដែលមានផ្ទៃដីលិចទឹក មិនមានប្រភពទឹក និង មិនមានប្រព័ន្ឋស្រោចស្រពជាដើម។
លោកស្រីនាយិកាក្រុមហ៊ុនហ្វេមីលីកាកាវកម្ពុជា បានឲ្យដឹងទៀតថា ដំណាំកាកាវ បើសិនជាមានការថែទាំល្អ នឹងចាប់ផ្តើមចេញផ្លែផ្កាក្នុងអាយុពី១ឆ្នាំកន្លះ ទៅ២ឆ្នាំ ខណៈឆ្នាំដំបូងអាចផ្តល់ផលតិចតួច គឺក្នុង១ដើមប្រហែលជា២០គីឡូក្រាម ក៏ប៉ុន្តែនៅឆ្នាំបន្ទាប់ កាកាវនឹងផ្តល់ផលទ្វេដង ដែលក្នុង១ឆ្នាំកសិករអាចប្រមូលផលពី២ទៅ ៤ដង ហើយនៅក្នុងឆ្នាំទី៣ កាកាវមួយដើមផ្តល់ផលពី ៥០ទៅ៦០គីឡូក្រាម និងគ្រប់អាយុពេញវ័យ ៥ឆ្នាំឡើងទៅ កាកាវ១ដើម អាចនឹងផ្តល់ផលពី ១០០ ទៅ១៥០គីឡូក្រាម ហើយក្រុមហ៊ុនលក់កូនទៅឲ្យកសិករក្នុង១ដើម តម្លៃ១២ ០០០រៀល និងទទួលទិញផ្លែមកវិញ ក្នុង១គីឡូក្រាម តម្លៃ១ ២០០រៀល យកតែផ្លែល្អមិនគិតពីតូចធំឡើយ ប៉ុន្តែការទទួលទិញផ្លែមកវិញ ក្រុមហ៊ុនទទួលយកតែកសិករណាដែលបានចុះកិច្ចសន្យាជាវកូនពីក្រុមហ៊ុនយកទៅដាំតែប៉ុណ្ណោះ។
បើតាមតំណាងកសិករមកពីស្រុកឱរ៉ាល់ខេត្តកំពង់ស្ពឺ បានឲ្យដឹងថា កសិករនៅស្រុកឱរ៉ាល់ចំនួន១២គ្រួសារបានដាំកាកាវជិត៤ពាន់ដើម ប៉ុន្តែវាបានងាប់អស់ជាងមួយពាន់ដើមដោយសារខ្វះទឹក ដូច្នេះក្នុងឱកាសនេះ សូមអំពាវនាវដល់កសិករដែលមានចំណាប់អារម្មណ៍ជាវដើមយកទៅដាំ និងដើម្បីទទួលបានទិន្នផលល្អតាមការរំពឹងទុក ត្រូវយកចិត្តទុកដាក់ពិនិត្យលើស្ថានភាពដី ថាតើស្ថានភាពដី ដែលគ្រោងនឹងដាំនោះមានគុណភាពអាចដាំបានឬអត់ ហើយមានប្រភពទឹក និងប្រព័ន្ឋស្រោចស្រពគ្រប់គ្រាន់ទេ ហើយអាចមានលទ្ឋភាពរៀបចំប្រព័ន្ឋស្រោចស្រពបានដែរឬអត់ ហើយបើខ្វះកត្តាទាំងនេះ ដំណាំកាកាវ នឹងមិនបានផលឡើយ។
តំណាងកសិករមួយចំនួនទៀត ក៍បានបង្ហាញនូវក្តីបារម្ភផងដែរ អំពីការនាំដើមកាកាវដែលគ្មានប្រភពយកទៅដាំដោយគ្មានកិច្ចសន្យាត្រឹមត្រូវ ក៍ប្រឈមនឹងការលក់ទិន្នផលដែរ ព្រោះដោយសារពូជយកទៅដាំខុសពីប្រភេទពូជឈុមផុនដែលក្រុមហ៊ុនបានចុះកិច្ចព្រមព្រៀងជាមួយក្រុមហ៊ុន COCOA Network Co.,LTD ( K.U.N ) ប្រទេសថៃ ខណៈដែលនៅក្នុងពិភពលោក មានពូជ៦៥ប្រភេទ ហើយពូជឈុមផុន ខាងក្រុមហ៊ុន COCOA Network Co.,LTD ( K.U.N ) ប្រទេសថៃជាប់លេខ១ ព្រោះវាជាប្រភេទពូជស្រាល ផ្តល់ផលតែក្នុងរយៈពេលពីរឆ្នាំក្រោយពីការដាំនិងថែទាំត្រឹមត្រូវតាមបច្ចេកទេស ហេតុនេះដើម្បីចៀសវាងនូវការខាតបង់ថវិកា និងពេលវេលា បងប្អូនកសិករមុននឹងសម្រេចចិត្តជាវកូនដើមកាកាវយកទៅដាំ គឺត្រូវពិនិត្យកិច្ចសន្យាឱ្យបានច្បាស់លាស់ និងស្គាល់ប្រភពក្រុមហ៊ុន៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
