ក្រោមគំនិតផ្ដួចផ្ដើមរបស់ឯកឧត្តម ទៀ សីហា ប្រធានគណ:កម្មាធិការសាខាកាកបាទក្រហមកម្ពុជា ខេត្តសៀមរាប ផ្ទះមនុស្សធម៌ទី៨២នេះ ក្រោមការឧបត្ថម្ភដោយឧកញ៉ា អុឹង លីហេង និង លោកជំទាវ តាំង ហ្កិចលាង បានផ្តល់ថវិកា តាមរយ:គណ:កម្មាធិការសាខាកាកបាទក្រហមកម្ពុជាខេត្ត សម្រាប់សាងសង់សរុបទឹកប្រាក់អស់ចំនួន $៣,៨០០ (បីពាន់ប្រាំបីរយដុល្លារ) ផ្ទះទំហំ ៦ម៉ែត្រ x ៦ម៉ែត្រ មាន២បន្ទប់ ដំបូលប្រក់ស័ង្កសីភ្លីក្បឿង ជញ្ជាំងស្មាតបត បាតក្រាលការ៉ូ មានកម្ពស់ផុតពីដី០,៥០ម៉ែត្រ សង់លើផ្ទៃដីទំហំ ៖ ១០ម៉ែត្រ X ១០០ម៉ែត្រ ជាដីម្តាយក្មេកចែកឱ្យ។ ផ្ទះមនុស្សធម៌នេះ ត្រូវបានប្រគល់ជូនអ្នកស្រី សំ អង ស្ត្រីមេម៉ាយក្រីក្រ អាយុ៤៧ឆ្នាំ មានកូន៥នាក់ ស្ថិតនៅភូមិចាន់ហៀរ ឃុំបឹងមាលា ស្រុកស្វាយលើ ខេត្តសៀមរាប។ ក្រោមអធិបតីភាពលោកជំទាវ ទាង អេង ទៀ សីហា អនុប្រធានគណ:កម្មាធិការសាខាកាកបាទក្រហមកម្ពុជា ខេត្តសៀមរាប លោកជំទាវ អនុប្រធានគណ:កិត្តិយសាខា លោក លោកស្រី គណ:កិត្តិយស គណ:កម្មាធិការ អនុសាខា និងអាជ្ញាធរមូលដ្ឋានផងដែរ នាព្រឹកថ្ងៃទី០៦ ខែមីនា ឆ្នាំ២០២២។
មានប្រសាសន៍ក្នុងឱកាសនោះ លោកជំទាវ ទាង អេង ទៀ សីហា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណ:កម្មាធិការសាខាកាកបាទក្រហមខេត្តឋ ដែលតែងតែយកចិត្តទុកដាក់គិតគូរចំពោះសុខទុក្ខបងប្អូនប្រជាពលរដ្ឋគ្រប់រូប ដោយមិនប្រកាន់វណ្ណ: ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចមានពាក្យស្លោកមួយឃ្លា បានលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល”។ ចំពោះផ្ទះមនុស្សធម៌ ដែលប្រគល់ជូនអ្នកស្រី សំ អង ចាប់ពីពេលនេះតទៅ ដើម្បីបានជាជម្រក ជាម្លប់ដ៏កក់ក្តៅតទៅថ្ងៃអនាគត ជាទ្រព្យសម្បត្តិផ្ទាល់ខ្លួនផងដែរ។ លោកជំទាវ ក៏បានក្រើនរម្លឹកដល់លោកយាយ លោកតា អ៊ំពូមីង សូមមេត្តាថែរក្សាសុខភាពឲ្យបានល្អគ្រប់ៗគ្នា ប្រសិនបើបងប្អូន និងកូនៗមានជំងឺ ឬគ្រោះថ្នាក់ផ្សេងៗ សូមប្រញាប់បញ្ជូនទៅមណ្ឌលសុខភាព ដែលនៅជិតបងប្អូនបំផុត ដើម្បីព្យាបាល។ មួយវិញទៀត សូមចូលរួមសហការទប់ស្កាត់ជំងឺកូវីដ-១៩ តាមការណែនាំរបស់ក្រសួងសុខាភិបាល និងតាមការណែនាំរបស់ប្រមុខរាជរដ្ឋាភិបាល គឺ៣.កុំ និង៣.ការពារឱ្យបានខ្ជាប់ខ្ជួន ។
ក្នុងឱកាសនោះដែរ ក៏មានអំណោយមនុស្សធម៌បន្ថែមសម្រាប់គ្រួសារទទួលបានផ្ទះជារួមមាន៖ មុង១, ភួយ៣, សារុង១, ក្រមា១, កន្ទេល១, អង្ករ៦០គ.ក្រ, មី ១កេស, ត្រីខ ១យួរ, ខ្នើយ២, អាវយឺត២, សម្ភារ:ផ្ទះបាយមួយចំនួន និងថវិកាចំនួន ៤សែនរៀល។ ជាមួយគ្នានេះដែរ សមាគមនារីកម្ពុជាដើម្បីសន្ដិភាព និងអភិវឌ្ឍន៍ ខេត្តសៀមរាប បានឧបត្ថម្ភផ្ទាំងសូឡា និងអំពូល១ឈុត, ប្រតិភូរួមដំណើរក៏បានឧបត្ថម្ភនូវថវិកាមួយចំនួនបន្ថែមទៀតផងដែរ។ សម្រាប់លោកតា លោកយាយ ចូលរួមក្នុងពិធីប្រគល់ផ្ទះនោះ ចំនួន៥០នាក់ ម្នាក់ៗទទួលបាន៖ អង្ករ ៣០គ.ក្រ, មី ១កេស, ត្រីខ ១យួរ, ទឹកត្រី ១យួរ ឃីត១កញ្ចប់ (មុង ភួយ សារុង ក្រមា) អាវយឺត២ និងថវិកា៤ម៉ឺនរៀល៕
ព័ត៌មានជាតិ ថ្មីៗ
អត្ថបទនិងរូបភាព: លោកស៊ាន សុផាត កែសម្រួលដោយ លីវ សុខុន!!!
