នាព្រឹកថ្ងៃទី៤ ខែមីនា ឆ្នាំ២០២២នេះ ឯកឧត្តម នាយឧត្ដមសេនីយ៍ សាស្ត្រាចារ្យ សេង ផល្លី ប្រធានបណ្ឌិត្យសភានគរបាលកម្ពុជា បានដឹកនាំប្រតិភូអញ្ជើញជួបសំណេះសំណាល និងសួរសុខទុក្ខជាមួយសិស្សនគរបាល និងនាយនគរបាលរង ដែលកំពុងសិក្សាវគ្គបណ្តុះបណ្តាល កម្រិតបឋមវិជ្ជាជីវៈនគរបាល ជំនាន់ទី១៥ លើកទី១ ចំនួន ២០០នាក់ មកពីស្នងការដ្ឋាននគរបាលខេត្តឧត្តរមានជ័យ និងខេត្តបន្ទាយមានជ័យ នៅសាលានគរបាលជាតិភូមិភាគ៤ ខេត្តសៀមរាប។
ក្នុងឱកាសនោះ ឯកឧត្តមនាយឧត្ដមសេនីយ៍សាស្ត្រាចារ្យ សេង ផល្លី មានប្រសាសន៍ថា ក្រោមការយកចិត្តទុកដាក់ពីថ្នាក់ដឹកនាំក្រសួងមហាផ្ទៃ ក្រោមកិច្ចដឹកនាំបញ្ជាផ្ទាល់ពី សម្តេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ បណ្ឌិត្យសភានិងសាលានគរបាលភូមិភាគនីមួយៗ បានធ្វើកំណែទម្រង់លើការងារសំខាន់ៗ ជាពិសេសការអភិវឌ្ឍន៍ហេដ្ឋារចនាសម្ព័ន្ធ និងសម្ភារ:សិក្សា ការពង្រឹងវិន័យ និងការកសាងវប្បធម៌គុណភាព សំដៅលើកកម្ពស់សមត្ថភាពវិជ្ជាជីវៈកងកម្លាំងនគរបាល ដើម្បីឆ្លើយតបទៅនឹងតម្រូវការអង្គភាពសាមី ព្រមទាំងស្របតាមគោលនយោបាយកំណែទម្រង់កងកម្លាំងប្រដាប់អាវុធ របស់រាជរដ្ឋាភិបាល ក្រោមការដឹកនាំដ៏ឈ្លាសវៃបំផុត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តម ក៏បានថ្លែងកោតសរសើរ និងអរគុណ ចំពោះគណៈគ្រប់គ្រងសាលានគរបាលជាតិភូមិភាគ៤ និងគ្រូនគរបាលទាំអអស់ ដែលខិតខំយកចិត្តទុកបំពេញភារកិច្ចទទួលខុសត្រូវ និងការបង្ហាត់បង្រៀនបានល្អ ព្រមទាំងកោតសរសើរសិស្សនគរបាលទាំងអស់ ដែលបានប្រឹងប្រែងរៀនសូត្រ ហ្វឹកហាត់ និងគោរពវិន័យបានល្អ ដើម្បីក្លាយជាមន្ត្រីនគរបាលដែលមានលក្ខណសម្បត្តិសមស្របក្នុងការបម្រើជាតិ និងប្រជាពលរដ្ឋ។ ជាមួយគ្នានោះក៏សូមឲ្យប្អូនសិស្សនគរបាលគ្រប់រូប ត្រូវបន្តយកចិត្តទុកដាក់សិក្សារៀនសូត្រ ដោយធ្វើស្វ័យសិក្សាទាំងទ្រឹស្ដី នឹងការអនុវត្តជាក់ស្តែង គោរពវិន័យឱ្យបានខ្ជាប់ខ្ជួន ប្រកាន់ខ្ជាប់នូវទស្សនៈ រៀនឱ្យចេះ មិនមែនរៀនឱ្យចប់នោះទេ និងត្រូវបង្កើនការយក ចិត្តទុកដាក់ក្នុងការធានាឲ្យបាននូវសុវត្ថិភាពសុខភាព ក្នុងការបង្ការទប់ស្កាត់ការរីករាលដាលនៃជំងឺកូវីដ-១៩ ដោយប្រកាន់ខ្ជាប់នូវវិធានការ ៣កុំ និង៣ការពារ ឲ្យបានជាប់ជាប្រចាំ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
