នៅព្រឹកថ្ងៃទី០៤ ខែមីនា ឆ្នាំ២០២២នេះ ក្រុមអ្នកវិទ្យាសាស្ត្រមច្ឆជាតិ និងអង្គភាពជំនាញជលផលបានរៀបចំពិធីព្រលែងពូជត្រី ចំនួន៣ប្រភេទ ដែលតំណាងឲ្យប្រទេសកម្ពុជា ដែលជិតផុតពូជមួយហ្វូងចូលទៅក្នុងបឹងទន្លេសាប នៅក្នុងឡូតិ៍អភិរក្សរបស់ខណ្ឌរដ្ឋបាលជលផលសៀមរាប ដែលស្ថិតនៅក្នុងបឹងទន្លេសាប ភូមិសាស្ត្រសង្កាត់ចុងឃ្នៀស ក្រុងសៀមរាប ដើម្បីជួយសង្គ្រោះត្រីដែលរងគ្រោះជិតផុតពូជខ្លាំងបំផុតក្នុងពិភពលោក។
លោកបណ្ឌិត ហ្សេប ហូហ្គេន ជីវវិទូមច្ឆជាតិនៅសាកលវិទ្យាល័យណេវ៉ាដា រ៉េណូ និងជាអ្នកដឹកនាំគម្រោងអច្ឆរិយភាពនៃទន្លេមេគង្គ ដែលគាំទ្រដោយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ USAID បានមានប្រសាសន៍ថា នេះគឺជាជំហានដំបូង ក្នុងកិច្ចខិតខំប្រឹងប្រែងដើម្បីស្ដារចំនួនត្រីទឹកសាបដ៏ធំបំផុតរបស់ពិភពលោក ហើយការថែររក្សាទុកបម្រុងត្រី ត្រូវបានបង្ហាញឲ្យឃើញថា វាជាវិធីសាស្ត្រដ៏មានប្រសិទ្ធភាពក្នុងការការពារជីវចម្រុះក្នុងទឹក និងការជំរុញជីវម៉ាសរបស់ត្រី ដែលជាសកម្មភាពមួយក្នុងចំណោមសកម្មភាពជាច្រើន ដែលគេត្រូវការដើម្បីស្ដារប្រភេទសត្វទាំងនេះឲ្យជៀសផុតពីការខិតជិតការផុតពូជ។
លោក ពុម្ព ស៊ីថា អគ្គនាយករដ្ឋបាលជលផលក្នុងប្រទេសកម្ពុជា បានមានប្រសាសន៍ថា រដ្ឋាភិបាលកម្ពុជាបានចាត់វិធានការ ក្នុងការបង្កើតកន្លែងអភិរក្សត្រី ការពារតំបន់ស្នូលនៃតំបន់បម្រុងជីវមណ្ឌលទន្លេសាប និងបង្កើតសហគមន៍នេសាទជាផ្លូវការ និងតំបន់បម្រុងដែលពាក់ព័ន្ធ ដែលសកម្មភាពទាំងនេះធ្វើឲ្យកម្ពុជាក្លាយជាកន្លែង ស័ក្តិសមបំផុតក្នុងការចាប់ផ្ដើមស្តារចំនួនត្រីទន្លេមេគង្គដែលជិតផុតពូជ។ លោកថា ថ្ងៃនេះជាផ្នែកនៃកិច្ចខិតខំប្រឹងប្រែងរយៈពេលជាច្រើនឆ្នាំ ដើម្បីសាកល្បងមើលពីប្រសិទ្ធភាពនៃការប្រើប្រាស់ បណ្តាញត្រីបម្រុងដ៏ធំរបស់កម្ពុជា ដើម្បីលែងត្រីជិតផុតពូជដែលគេបានចិញ្ចឹមទុកឲ្យត្រលប់ទៅក្នុងធម្មជាតិវិញ។ គោលដៅសំខាន់គឺការពារត្រីរហូតដល់ពួកវាធំល្មម អាចធ្វើការបន្តពូជបាន ដើម្បីគាំទ្រដល់វិស័យជលផល និងជីវៈចម្រុះ។
យោងតាមសេចក្តីប្រកាសព័ត៌មានរបស់គម្រោងអច្ឆរិយៈមេគង្គបានឲ្យដឹងថា ត្រីទាំងបីប្រភេទដែលត្រូវព្រលែងនោះ មាន ៖ ត្រីរាជចំនួន២ក្បាល , ត្រីគល់រាំងចំនួន ៥០០ក្បាល និងត្រីប្រាចំនួន ១៥០០ក្បាល។ ត្រីរាជ ជាប្រភេទត្រីជិតផុតពូជបំផុត និងជាត្រីដែលកាន់កាប់កំណត់ត្រាពិភពលោកថា ជាត្រីទឹកសាបដ៏ធំបំផុតរបស់ពិភពលោកដែលមានទម្ងន់រហូតដល់ ២៩៣គីឡូក្រាម (៦៤៦ផោន) ខណៈត្រីប្រា ដែលធ្លាប់ជាអាហារសំខាន់នៅក្នុងតំបន់ ត្រូវបានគេសម្គាល់ថា ចំនួនរបស់វាបានធ្លាក់ចុះយ៉ាងខ្លាំងនៅក្នុងធម្មជាតិ និងត្រីគល់រាំងដែលជិតផុតពូជ និងជាប្រភេទត្រីកាបដ៏ធំបំផុតរបស់ពិភពលោក និងជានិមិត្តរូបមច្ឆជាតិរបស់កម្ពុជា។
បឹងទន្លេសាប ដែលគេរាប់ជាបឹងដ៏ធំបំផុតនៅអាស៊ីអាគ្នេយ៍ និងជាជម្រករបស់ត្រីជាង ៣០០ប្រភេទ គឺជាកន្លែងសំខាន់មួយ សម្រាប់ជីវចម្រុះទឹកសាប និងជាតំបន់បម្រុងជីវមណ្ឌលរបស់អង្គការយូណេស្កូ។ ជាប្រវត្តិសាស្ត្រ វាបានបម្រើការជាកន្លែង ចិញ្ជឹមកូនត្រីដ៏សំខាន់សម្រាប់ត្រីខ្នាតយក្សដែលជិតផុតពូជ និងសម្រាប់ចំនួនត្រីធ្វើការផ្លាស់ទីជាច្រើនទៀតនៅក្នុងអាង ទន្លេមេគង្គ។ ក្នុងរយៈពេលប៉ុន្មានឆ្នាំចុងក្រោយនេះ ត្រីទាំងនេះបានស្ថិតនៅក្រោមការគំរាមកំហែងកាន់តែខ្លាំងឡើង ពីការសាងសង់ទំនប់វារីអគ្គិសនី នេសាទហួសកម្រិត និងគ្រោះរាំងស្ងួត។
ដើម្បីប្រយុទ្ធប្រឆាំងនឹងការគំរាមកំហែងទាំងនេះទៅលើចំនួនត្រី ដែនជម្រកសត្វត្រីមួយចំនួនដែលគ្រប់គ្រងដោយ រដ្ឋាភិបាល និងតំបន់អភិរក្សសហគមន៍ត្រូវបានបង្កើតឡើងនៅក្នុងបឹងទន្លេសាប ដែលបង្កើតបានជាបណ្តាញដ៏ធំបំផុត មួយនៃតំបន់អភិរក្សជលផលនៅលើពិភពលោក៕
អត្ថបទ និងរូបភាព ៖ លោក ជា ស្រស់ និង លោក យូ វង្ស
កែសម្រួលអត្ថបទ ៖ លោក លីវ សាន្ត
