នាព្រឹកថ្ងៃទី៣ ខែមីនា ឆ្នាំ២០២២នេះ មន្ទីរវប្បធម៍និងវិចិត្រសិល្ប:ខេត្តសៀមរាប បានរៀបចំប្រារព្ធ “ទិវាវប្បធម៌ជាតិ” ៣មីនា លើកទី២៤ ឆ្នាំ២០២២ ក្រោមប្រធានបទ «យុវជនដើម្បីវប្បធម៌ជាតិ» នៅសាលាវិចិត្រសិល្ប:ភូមិភាគ៤ ខេត្តសៀមរាប ដើម្បីរំលឹកដល់គុណូបការៈបុព្វបុរសខ្មែរគ្រប់ជំនាន់ ដែលបានពលីទាំងកម្លាំងកាយ កម្លាំងចិត្ត កម្លាំងបញ្ញា និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ដ៏សម្បូរបែបនិងមានតម្លៃមិនអាចកាត់ថ្លៃបាន បន្សល់ទុកមកដល់កូនចៅជំនាន់ក្រោយ ។
លោក មួន សុភាព ប្រធានមន្ទីរវប្បធម៍និងវិចិត្រសិល្ប:ខេត្តសៀមរាប បានមានប្រសាសន៍ថា ទិវាវប្បធម៌ជាតិ គឺជាទិវាដ៏មានសារៈសំខាន់មួយរបស់ប្រជាជាតិកម្ពុជា ដើម្បីបំផុសនូវស្មារតីស្រឡាញ់ជាតិ វប្បធម៌ ទំនៀម ទម្លាប់ ប្រពៃណី និងអត្តសញ្ញាណជាតិ ក្នុងចំណោមប្រជាពលរដ្ឋខ្មែរគ្រប់រូប ហើយក្រោមប្រធានបទ «យុវជនដើម្បីវប្បធម៌ជាតិ»នេះ ក្នុងបរិបទនៃការរីកចម្រើនបែបឌីជីថលជាសាកល នៅក្នុងសតវត្សរ៍ទី២១នេះ យុវជនកម្ពុជាមិនត្រឹមតែត្រូវមានការអប់រំ ការបណ្ដុះបណ្តាលជំនាញវិជ្ជាជីវៈ និងចំណេះដឹងផ្នែកបច្ចេកវិទ្យាប្រកប ដោយគុណភាព និងសមធម៌ប៉ុណ្ណោះនោះទេ ប៉ុន្តែក៏ត្រូវចូលរួមយ៉ាងពេញលេញ ក្នុងសកម្មភាពសិល្បៈវប្បធម៌ ទាំងក្នុងទិដ្ឋភាពសង្គម និងទិដ្ឋភាពសេដ្ឋកិច្ចផងដែរ។
លោកមួន សុភាព បន្តថា ក្នុងស្មារតីយកចិត្តទុកដាក់ខ្ពស់របស់រាជរដ្ឋាភិបាលកម្ពុជាចំពោះវិស័យវប្បធម៌ជាតិ ដែលជាដួងព្រលឹង ជាអត្តសញ្ញាណជាតិ ជាកិត្យានុភាពជាតិសម្រាប់ផ្សារភ្ជាប់ទំនាក់ទំនងពីបុគ្គលម្នាក់ទៅបុគ្គលម្នាក់ពីសហគមន៍មួយទៅសហគមន៍មួយ ក៏ដូចជាពីប្រទេសមួយទៅប្រទេសមួយ ដើម្បីនាំមកនូវសាមគ្គីភាព សន្តិភាព និងសុខដុមនីយកម្ម រាជរដ្ឋាភិបាលកម្ពុជាសម្រេចរៀបចំទិវាវប្បធម៌ជាតិ ៣មីនា លើកទី២៤ ឆ្នាំ២០២២ ក្រោមប្រធានបទ “យុវជនដើម្បីវប្បធម៌ជាតិ” ក្នុងគោលបំណងជំរុញឱ្យប្រជាពលរដ្ឋ ពិសេសយុវជនទូទាំងប្រទេស៖ ចូលរួមកាន់តែសកម្មឡើងថែមទៀតក្នុងការថែរក្សានិងការពារមរតកវប្បធម៌ជាតិ លើកកម្ពស់មនសិការនិងស្មារតីចូលរួមផ្ទេរ ព្រមទាំងទទួលយកនូវចំណេះដឹង ជំនាញ និងបច្ចេកទេស សិល្បៈវប្បធម៌ សំដៅជំរុញការអភិរក្សនិងអភិវឌ្ឍវប្បធម៌ជាតិ ក៏ដូចជាវប្បធម៌ចម្រុះរបស់សហគមន៍ ជនជាតិដើមភាគតិចនៅកម្ពុជាឱ្យបានស្ថិតស្ថេរគង់វង្ស ដើម្បីជំរុញឱ្យមានការចូលរួមដោយមានការទទួលខុសត្រូវរបស់យុវជន ក្នុងកិច្ចអភិរក្សនិងអភិវឌ្ឍន៍វប្បធម៌ ជាតិ ដោយមិនប្រកាន់នូវនិន្នាការនយោបាយ ជំនឿ សាសនា និងពណ៌សម្បុរឡើយ។
លោកប្រធានមន្ទីរវប្បធម៍និងវិចិត្រសិល្ប:ខេត្តសៀមរាប បន្តទៀតថា កម្លាំងយុវជន គឺជាសក្តានុពលធនធានមនុស្សដ៏សំខាន់មិនអាចខ្វះបាន នៅក្នុងការរួមចំណែកអភិរក្ស និងអភិវឌ្ឍវប្បធម៌ជាតិ ហើយក៏ជាមូលដ្ឋានគ្រឹះសម្រាប់ការអភិវឌ្ឍសង្គមជាតិផងដែរ ហេតុនេះសម្រាប់ទិដ្ឋភាពសង្គម យុវជនកម្ពុជាត្រូវទទួលបាននូវការលើកទឹកចិត្តនិងការបណ្តុះស្មារតីស្រឡាញ់ជាតិ និងស្រឡាញ់វប្បធម៌ ដោយត្រូវរួមចំណែកយ៉ាងសកម្ម ក្នុងការអភិរក្ស និងលើកស្ទួយតម្លៃវប្បធម៌និងសិល្បៈជាតិ ចៀសវាងនូវភាពភ្លើតភ្លើនភ្លេចខ្លួន និងឈានដល់ការបំផ្លាញវប្បធម៌ជាតិដោយខ្លួនឯងផ្ទាល់ ដូច្នេះក្នុងឱកាសនេះ សូមអំពាវនាវដល់យុវជនកម្ពុជា ត្រូវចូលរួមឱ្យកាន់តែសកម្មឡើងថែមទៀត ក្នុងសកម្មភាពគាំទ្រ និងការផ្ដួចផ្ដើមគំនិតច្នៃប្រឌិតបង្កើតថ្មី ដោយឈរលើមូលដ្ឋានរក្សាការពារអត្តសញ្ញាណជាតិ និងស្មារតីសហគ្រិនភាពឱ្យបានកាន់តែផុសផុលឡើង ដើម្បីពង្រឹងនិងពង្រីកសេដ្ឋកិច្ចវប្បធម៌របស់ជាតិឱ្យកាន់តែមានភាពរីកចម្រើន ក្នុងស្មារតីយកចិត្តទុកដាក់រក្សាលំនឹងនៃការអភិវឌ្ឍសិល្បៈវប្បធម៌ ជាមួយនឹងការអភិវឌ្ឍផ្នែកវិទ្យាសាស្ត្រនិងបច្ចេកវិទ្យា។
គួររំលឹកថា ទិវាវប្បធម៌ជាតិ ត្រូវបានបង្កើតឡើងកាលពីឆ្នាំ១៩៩៩ ហើយត្រូវបានរៀបចំប្រារព្ធធ្វើឡើងជារៀងរាល់ឆ្នាំ ក្រោមប្រធានបទផ្សេងៗគ្នា ដោយយោងទៅតាមបរិបទនិងអាទិភាពជាក់ស្ដែងនៃការងារវប្បធម៌និងវិចិត្រសិល្បៈរបស់ប្រទេសកម្ពុជា ៕
អត្ថបទ និងរូបភាព ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
