ស្ពានថ្មឆ្លងស្ទឹង ជីក្រែង ស្ថិតនៅ ចំណុចមុខ វត្តស្លែង ក្នុងភូមិតារាម ឃុំជីក្រែង ស្រុកជីក្រែង ខេត្តសៀមរាប បានបាក់ដាច់ចេញពីគ្នា ដោយសាររថយន្ត ធន់ធ្ងន់ដឹក ថ្ម គ្រួសបើកឆ្លងកាត់ កាលពី វេលាម៉ោង ១១និង ៣០ នាទី ព្រឹក ថ្ងៃទី២៥ ខែកុម្ភៈ ឆ្នាំ២០២២។
តាមប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា ស្ពានថ្មដែលបាក់នេះ ជាស្ពានចាស់ទ្រុឌទ្រាម ហើយអាជ្ញាធរមូលដ្ឋានបានយករនាំងមកដាក់ឃាំងមិនឲ្យមានរថយន្តធុនធ្ងន់បើកបរឆ្លងកាត់ទេ ប៉ុន្តែនៅម៉ោងកើតហេតុ ក៏មានរថយន្តធុនធំមួយគ្រឿងដឹកថ្មឆ្លងកាត់ ក៏បណ្តាលឲ្យបាក់ស្ពានជាពីរកំណាត់ និងធ្លាក់រថយន្តចូលក្នុងស្ទឹង និងកៀបជាប់អ្នកបើកបរបណ្តាលឲ្យរងរបួសស្រាល។
ពាក់ព័ន្ធករណីនេះ លោកវរសេនីយ៍ទោ តាំង លីហេង អធិការនគរបាលស្រុកជីក្រែង បានឲ្យដឹងនៅរសៀលថ្ងៃទី២៥កុម្ភៈនេះថា បន្ទាប់ពីកើតហេតុរូបលោកផ្ទាល់ បានដឹកនាំកម្លាំងទៅជួយសង្គ្រោះយកអ្នកបើកបរដែលកៀបជាប់ក្នុងកាប៊ីន រួចបញ្ជូនទៅកាន់មន្ទីរពេទ្យ។ លោកបានបន្តថា រថយន្តខាងលើបានដឹកថ្ម ឆ្លងកាត់ស្ពាន ពេលមកដល់ពាក់កណ្តាលក៏ស្រាប់តែបាក់តែម្តង៕
អត្ថបទ និងរូបភាព ៖ ជា ស្រស់ និងសាន សុផាត
