នៅសាលាឃុំលាងដៃ ស្រុកអង្គរធំ ខេត្តសៀមរាប នាព្រឹកថ្ងៃទី២៥ ខែកុម្ភៈ ឆ្នាំ២០២២ ក្រុមគ្រូពេទ្យតំបន់ប្រតិបត្តិការសឹកសៀមរាប ដឹកនាំដោយលោកវរៈសនីយ៍ឯក វិញ វឿន មេបញ្ជាការរងតំបន់ប្រតិបត្តិការសឹករងសៀមរាប បានធ្វើការចុះចាក់វ៉ាក់សាំងបង្ការជំងឺកូវីដ-១៩ ដូសជំរុញទី៤ ប្រភេទ Pfizer ជូនដល់យោធិន គ្រួសារយោធិន និង អតីតយុទ្ធជនជិត២០០នាក់។
មានប្រសាសន៍នាពេលនោះ លោកវរៈសនីយ៍ឯក វិញ វឿន មេបញ្ជាការរងតំបន់ប្រតិបត្តិការសឹករងសៀមរាប បញ្ជាក់ថា យោងតាមបទបញ្ជារបស់ នាយឧត្តមសេនីយ៍ គន់ គឹម អនុប្រធានសមាគន៍អតីតយុទ្ធជនកម្ពុជា និង ជាអគ្គលេខាធិការសមាគមន៍អតីតយុទ្ធជន និង បទបញ្ជារបស់លោកមេបញ្ជាការយោធភូមិ ភាគទី៤
ក្រុមគ្រូពេទ្យចុះធ្វើការចាក់វ៉ាក់សាំងការពារជំងឺកូវីដ-១៩ ដូសទី៤ ដែលជាដូសជំរុញ ប្រភេទ Pfizer ជូនដល់បងប្អូនយោធិន គ្រួសារយោធិន និង អតីតយុទ្ធជន នៅតាមបណ្តាស្រុកទាំង១១ ស្រុក ចាប់ពីថ្ងៃទី១៥ កុម្ភ:មក ហើយស្រុកអង្គរធំ គឺជាស្រុកចុងក្រោយ។
ចំពោះបងប្អូន យោធិន គ្រួសារយោធិន និង អតីតយុទ្ធជន ដែលនៅពុំទាន់បានចាក់ដូសជំរុញនេះ ក្រុមការងារ នឹងបន្តចាក់ជាលើក ទី២បន្តទៀត។
លោក ឡុង រដ្ឋារក្ស អភិបាលស្រុកអង្គរធំ បានថ្លែងអំណរគុណដល់ សម្តេចតេជោ ហ៊ុន សែន នាយករដ្ឋមន្ត្រី ដែលតែងតែគិតគូរពីសុខភាពរបស់មន្ត្រីរាជការ កងកម្លាំងប្រដាប់អាវុធ និង ប្រជាពលរដ្ឋកម្ពុជា តាមរយៈការចាក់វ៉ាក់សាំងបង្ការជំងឺកូវីដ-១៩ ដោយឥតគិតថ្លៃ ចាប់ពីដូសទី១ រហូដល់ដូសជំរុញជាបន្តបន្ទាប់។
លោកអភិបាលស្រុក លើកឡើងបន្ថែមថា គិតមកដល់ពេលនេះប្រជាពលរដ្ឋ ទូទាំងប្រទេស បានចាក់វ៉ាក់សាំងសរុបជាង១៤ លាននាក់រួចមកហើយ ទន្ទឹមបោក សូមអំពាវនាវដល់ប្រជាពលរដ្ឋ ក៏ដូចជាបងប្អូនយោធិន គ្រួសារយោធិន និងអតីតយុទ្ធជនទាំងអស់ ត្រូវបន្តការប្រុងប្រយ័ត្នការពារខ្លួនបន្ថែមទៀត ដើម្បីជៀសផុតពីជំងឺកូវីដ-១៩ ដោយត្រូវអនុវត្តនូវវិធានការ ៣កុំនិង៣ការពារ ឲ្យបានខ្ជាប់ខ្ជួន ពិសេសក្រោយពេលចាក់វ៉ាក់សាំងរួចនេះ មិនត្រូវពិសារគ្រឿងស្រវឹងរយៈពេលយ៉ាងតិច១សប្តាហ៍ ដើម្បីឲ្យវ៉ាក់សាំងមានប្រសិទ្ធភាពក្នុងការប្រឆាំងមេរោគកូវីដ-១៩៕
អត្ថបទ និងរូបភាព : លោក ម៉ី សុខារិទ្ធ
កែសម្រួល : លោក សេង ផល្លី
