គិតចាប់ពីពាក់កណ្ដាលខែធ្នូ ឆ្នាំ២០២១ មកដល់ថ្ងៃទី២១ ខែកុម្ភៈនេះ អ្នកដំណើរប្រហែលជាង៥០០០នាក់ បានធ្វើដំណើរតាមយន្តហោះមកកាន់ខេត្តសៀមរាប ក្នុងនោះភ្ញៀវទេសចរដែលបានទិញសំបុត្រចូលទស្សនាតំបន់ប្រាសាទ នៅគ្រឹះស្ថានអង្គរមានចំនួនប្រមាណពី២០០-៣០០នាក់ ក្នុងមួយថ្ងៃ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប ក្នុងកិច្ចប្រជុំរៀបចំក្រុមការងារប្រតិបត្តិ ដើម្បីវាយតម្លៃ និងគ្រប់គ្រងតំបន់គោលដៅទេសចរណ៍សុវត្ថិភាពខេត្តសៀមរាប នៅថ្ងែទី២៤ ខែកុម្ភៈ ឆ្នាំ២០២២ តាមរយៈប្រព័ន្ធវីដេអូ។
តាមសេចក្ដីរាយការណ៍បន្ថែមពីមន្ត្រីជំនាញក្នុងកិច្ចប្រជុំនោះបង្ហាញថា ក្នុងចំណោមអ្នកដំណើរទាំងអស់ ដែលបានមកដល់អាកាសយានដ្ឋានអន្តរជាតិខេត្តសៀមរាប ត្រូវបានធ្វើតេស្តរហ័សរកមេរោគកូវីដ-១៩ ក្នុងនោះមានប្រមាណ ១.៥ភាគរយ រកមានវិជ្ជមានមេរោគកូវីដ-១៩។ ដោយឡែក សម្រាប់ករណីរកឃើញជំងឺកូវីដក្នុងខេត្តសៀមរាប រយៈពេល ២សប្ដាហ៍ចុងក្រោយនេះ មានត្រឹមតែ១៦នាក់ និងស្លាប់ម្នាក់ប៉ុណ្ណោះ។ ទន្ទឹមនោះ នៅទូទាំងខេត្ត កុមារ និងប្រជាពលរដ្ឋទទួលបានវ៉ាក់សាំងមានចំនួនសរុបជាង៨១ម៉ឹននាក់ លើសពី៨០ភាគរយ។
បើតាមការលើកឡើងរបស់ ឯកឧត្តម ទៀ សីហា អភិបាលខេត្តសៀមរាប បញ្ជាក់ថា កាលពីពេលថ្មីៗនេះ ជំងឺកូវីដ-១៩ ប្រភេទអូមីក្រុង ត្រូវបានរកឃើញជាបន្តបន្ទាប់នៅតាមបណ្ដាក្រុង-ស្រុក ក្នុងខេត្តសៀមរាប។ ជាមួយនេះរដ្ឋបាលខេត្ត តាមរយៈមន្ទីរសុខាភិបាលខេត្ត បានកំណត់ប្រភពចម្លង និងស្ថិតក្នុងស្ថានភាពគ្រប់គ្រងបាន ដែលនឹងឈានទៅកាត់បន្ថយប្រភពចម្លងនៅក្នុងអន្តរកាលដ៏ខ្លីខាងមុខនេះ។ ចំពោះសោភណ្ឌភាពក្នុងខេត្តសៀមរាប ដែលជាកត្តាទាក់ទាញភ្ញៀវទេសចរ បច្ចុប្បន្នកាន់តែមានភាពស្រស់បំព្រង បន្ទាប់ពីការស្ថាបនាហេដ្ឋារចនាសម្ព័ន្ធផ្លូវ៣៨ខ្សែបានរួចរាល់ ខណៈការបំពាក់ភ្លើងបំភ្លឺសាធារណៈ និងទីតាំងសួនមួយចំនួនបាននិងកំពុងរៀបចំជាបន្តបន្ទាប់។ ដោយឡែក តំបន់ទេសចរណ៍ចុងឃ្នៀស ដែលរាជរដ្ឋាភិបាលបានសម្រេចដកហូតពីក្រុមហ៊ុនស៊ូ ជីង ប្រគល់មកឱ្យរដ្ឋបាលខេត្តគ្រប់គ្រង និងកែលម្អសោភណ្ឌភាព ក្រុមការងារពាក់ព័ន្ធ បាននឹងកំពុងរៀបចំទីតាំងទេសចរណ៍ជាប់បឹងទន្លេសាបនេះ ឱ្យកាន់មានសណ្ដាប់ធ្នាប់ និងអនាម័យ ព្រមទាំងគ្រោងស្ថាបនាផ្លូវតភ្ជាប់មកកាន់ផ្លូវ៣៨ខ្សែផងដែរ។
ព័ត៌មានជាតិ ថ្មីៗ
លើកជាមតិក្នុងកិច្ចប្រជុំនោះដែរ ឯកឧត្តម ប៊ុន រដ្ឋា នាយកអាកាសយានដ្ឋានអន្តរជាតិសៀមរាប បង្ហាញថាចំពោះអ្នកដំណើរ ដែលមានឯកសារចាក់វ៉ាក់សាំងរួចរាល់ និងតេស្តរហ័សពុំសូវមានបញ្ហាចោទនោះទេ ប៉ុន្តែចំពោះភ្ញៀវដែលពុំបានចាក់វ៉ាក់សាំង ចាំបាច់ត្រូវធ្វើPCR Test និងធ្វើចត្តាឡីស័ក ១៤ថ្ងៃដដែល បញ្ហានេះក្រុមការងារត្រូវរៀបចំកន្លែងស្នាក់នៅសមរម្យ សម្រាប់ពួកគាត់។ ដោយឡែក ចាប់ពីថ្ងៃទី២២ ខែកុម្ភៈនេះទៅ ភ្ញៀវដែលហោះហើរចេញពីប្រទេសកម្ពុជា ឆ្លងកាត់ប្រទេសសិង្ហបុរី គឺពុំតម្រូវឱ្យអ្នកដំណើរធ្វើ PCR Test ឬ Rapid Test មុនចេញដំណើរនោះឡើយ។
បន្ទាប់ពីការពិភាក្សា និងស្ដាប់នូវរបាយការណ៍របស់អង្គរប្រជុំរួចមក ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានវាយតម្លៃជារួមថា ខេត្តសៀមរាប នឹងអាចក្លាយគោលដៅទេសចរណ៍មានសុវត្ថិភាព ពីជំងឺកូវីដ-១៩ ដោយផ្អែកលើការចាក់វ៉ាក់សាំង ចំនួនឆ្លង nigចំនួនអ្នកស្លាប់ជាដើម ជាពិសេស បន្ទាប់ពីការធ្វើតេស្តPCR មុនពេលភ្ញៀវទេសចរត្រឡប់ទៅវិញ មានករណីតិចតួចប៉ុណ្ណោះ ដែលមានករណីឆ្លងជំងឺកូវីដ-១៩។
ទោះជាយ៉ាងនេះក្ដី ឯកឧត្តមរដ្ឋមន្ត្រី គូសបញ្ជាក់ថា ឧស្សាហកម្ម អាជីវកម្ម និងទីតាំងទេសចរណ៍ទាំងអស់ក្នុងខេត្ត ត្រូវបន្តពង្រឹងការអនុវត្តវិធានសុវត្ថិភាព SOP និងការណែនាំរបស់ក្រសួងសុខាភិបាល រដ្ឋបាលខេត្តឱ្យបានខ្ជាប់ខ្ជួន ដើម្បីពង្រឹងគោលដៅទេសចរណ៍ទាំង៦ រួមមាន៖ តំបន់ឧទ្យានជាតិភ្នំគូលែន តំបន់ទេសចរណ៍ជុំវិញតំបន់ការពារប្រាសាទបន្ទាយស្រី តំបន់បេតិកភណ្ឌអង្គរ តំបន់ទីក្រុងសៀមរាប តំបន់បឹងទន្លេសាប តំបន់ទីក្រុងសៀមរាបថ្មី (Grand Siem Reap)។
អត្ថបទ និងរូបភាព៖ លោក សេង ផល្លី
