លោក ម៉ៃ សាមេត ចៅសង្កាត់សៀមរាប បានអំពាវនាវដល់ព្រះសង្ឃ ដូនជីតាជី និងបងប្អូនប្រជាពលរដ្ឋទាំងអស់ ដែលមិនទាន់ទទួលបានការចាក់វ៉ាក់សាំងការពារជំងឺកូវីដ-១៩ គ្រប់ចំនួនកំណត់ទេ សូមរូសរាន់ទៅទទួលការចាក់ឲ្យបានគ្រប់ចំនួនកំណត នៅតាមទីតាំងដែលអាជ្ញាធរបានកំណត់។ បន្ថែមពីនេះសូមបងប្អូនអាណាព្យាបាលទាំងអស់ ក៏ត្រូវត្រៀមឲ្យបានរួចរាល់មានសំបុត្រកំណើត និងសៀវភៅស្នាក់នៅ សម្រាប់កូនចៅដែលមានអាយុ ៣ដល់ឆ្នាំ ដើម្បីចាក់វ៉ាក់សាំងជូនពួកគាត់នៅពេលឆាប់ៗខាងមុខនេះផងដែរ។
លោក ម៉ៃ សាមេត ក៍អំពាវនាវសូមឱ្យបងប្អូនយើងទាំងអស់គ្នា ទោះជាបានចាក់វ៉ាក់សាំងគ្រប់ចំនួនហើយក្ដី ក៏ត្រូវចូលរួមជាចាំបាច់ដោយប្រកាន់ខ្ជាប់នូវសេចក្តីអំពាវនាវរបស់ក្រសួងសុខាភិបាល ក៍ដូចជាវិធានការ ៣ការពារ ៣កុំ និង២ចូលរួម របស់រាជរដ្ឋាភិបាល ក្នុងការទប់ស្កាត់ការការចម្លងនៃជំងឺកូវីដ-១៩ និងមេរោគបំលែងថ្មីអូមីក្រុង រួមគ្នាការពារទប់ស្កាត់កុំឱ្យមេរោគដ៍សាហាវនេះបន្តឆ្លងចូលសហគមន៍បានជាទៀត។
លោកចៅសង្កាត់បានលើកឡើងយ៉ាងដូច្នេះ ក្នុងពិធីប្រគល់អំណោយជូនដល់ប្រជាពលរដ្ឋជួបការលំបាកក្នុងជីវភាពប្រចាំថ្ងៃចំនួន ១២០គ្រួសារ ដែលរៀបចំឡើងនៅក្នុងវត្តអធ្វាសង្កាត់សៀមរាប ក្រុងសៀមរាបខេត្តសៀមរាបកាលពីរសៀលថ្ងៃទី២០ ខែកុម្ភៈ ឆ្នាំ២០២២។
ក្នុងឱកាសនោះដែរ លោកចៅសង្កាត់សៀមរាប ក៏បានកោតសរសើរ និងថ្លែងអំណរគុណដល់ក្រុមការងារយុវជនចុះជួយមូលដ្ឋានសង្កាត់សៀមរាប ព្រមទាំងសប្បុរសដែលបានកៀរគរ និងផ្តល់នូស្បៀងអាហារនាពេលនេះ ទោះតិចតួចក្តី ដើម្បីយកមកចែករំលែកដល់គ្រួសារខ្វះខាតលើជីវភាពប្រចាំថ្ងៃ ក្នុងដំណាក់កាលវិបត្តិដោយសារជំងឺកូវីដ-១៩ ដែលនេះបង្ហាញឱ្យឃើញពីវប្បធម៌ចែករំលែក ជួយទុក្ខធុរៈគ្នាទៅវិញទៅមកក្នុងគ្រាលំបាក និងបញ្ជាក់ពីទឹកចិត្ត និងស្មារតីយកអាសារ ជួយសង្គ្រោះគ្នាទៅតាមលទ្ឋភាព ស្របតាមគោលនយោបាយរបស់រាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់បងប្អូនប្រជាពលរដ្ឋ។ លោកចៅសង្កាត់ ក៏បានចាត់ទុកការចូលរួមផ្តល់ជាស្បៀងអាហារពេលនេះ ក៍ដូចជាពេលកន្លងមកដល់គ្រួសារជួបការលំបាក របស់ព្រះសង្ឃ និងសប្បុរសជននានា គឺជាគំរូល្អមួយសម្រាប់កូនចៅជំនាន់ក្រោយរៀនសូត្រតាម។
សូមបញ្ជាក់ថា ចំពោះបងប្អូនទាំង ១២០គ្រួសារ ដែលទទួលបានអំណោយនាពេលនេះ មួយចំនួនជួបការលំបាកដោយសារក្នុងដំណាក់កាលជួបនូវវិបត្តិជំងឺកូវីដ-១៩ គ្រួសារខ្លះគ្មានចំណូលព្រោះការងារត្រូវបានបិទ ការលក់ដូរ និងអាជីវកម្មតូចតាចរបស់ពួកគាត់ត្រូវបានផ្អាក ខ្លះគាត់ជាចាស់ជរាគ្មានទីពឹង ខ្លះមានពិការភាព។ ចំពោះអំណោយជាគ្រឿងឧបភោគបរិភោគដែលប្រគល់ជូនបងប្អូនប្រជាពលរដ្ឋទាំង ១២០គ្រួសារនេះ ក្នុងមួយគ្រួសារទទួលបាន៖ អង្ករ ១៥គីឡូក្រាម និងទឹកសុទ្ឋ ១យួរ ដែលអំណោយទាំងនេះ បានមកពីទឹកចិត្តសប្បុរសធម៌របស់សប្បុរសជនជិតឆ្ងាយ និងជាអំណោយរបស់អង្គការមនុស្សធម៌ Pod Project ផ្តល់តាមរយៈ លោក ទូច ដារិទ្ឋ ក្រុមការងារយុវជនសង្កាត់សៀមរាប និងបានការចូលរួមពីព្រះគ្រូ វិសុទ្ឋិញាណ ភ្លឿនរ័ត្ន គ្រូសូត្រស្តាំវត្តអធ្វា ផងដែរ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
