ក្នុងឱកាសជួបសំណេះសំណាជាមួយសិស្សានុសិស្ស នៅសាលាវិទ្យាល័យ ហ៊ុន សែន អង្គរធំ ស្ថិតក្នុងស្រុកអង្គរធំខេត្ដសៀមរាប នៅព្រឹកថ្ងៃទី១៤ ខែមីនា ឆ្នាំ២០២២នេះ ឯកឧត្ដម ផៃ សុខខេង នាយករងខុទ្ធការល័យ និងទីប្រឹក្សាសម្ដេចពិជ័យសេនា ទៀ បាញ់ មានបញ្ជាក់ថា ការសេពគ្រឿងញៀន តែងមានផលប៉ះពាល់ធ្ងន់ធ្ងរដល់សង្គមជាតិទាំងមូល និងប៉ះពាល់ភ្លាមៗដល់ផ្លូវកាយ ផ្លូវចិត្ត ហើយអាចបង្កគ្រោះថ្នាក់យ៉ាងធ្ងន់ធ្ងរដល់ការលូតលាស់បញ្ញា ស្មារតី និងផ្លូវអារម្មណ៍ ខណៈដែលបច្ចុប្បន្ននេះ បទល្មើសជួញដូរ ចែកចាយ និងប្រើប្រាស់គ្រឿងញៀន នៅតែជាបញ្ហាគួរឲ្យព្រួយបារម្ភ និងកំពុងធ្វើឲ្យប៉ះពាល់ដល់សង្គម មិនថាទាំងនៅក្នុងរាជធានីភ្នំពេញ និងនៅតាមបណ្តាខេត្តនានាទូទាំងប្រទេស បណ្ដាលឱ្យប៉ះពាល់ធនធានមនុស្សកាន់តែច្រើនឡើងៗគួរឲ្យកត់សម្គាល់។
ឯកឧត្ដមបន្តថា ការសេពគ្រឿងញៀននេះ វាមិនត្រឹមតែប៉ះពាល់កិត្តិយសខ្លួនឯង និងក្រុមគ្រួសារយើងប៉ុណ្ណោះនោះទេ វាថែមទាំងបានប៉ះពាល់ដលសង្គមជាតិផងដែរ ខណៈបច្ចុប្បន្ននេះ យុវជនគឺជាក្រុមដែលងាយរងគ្រោះជាងគេ ក្នុងនោះមានយុវជនមួយចំនួនតូច ត្រូវបានគេអូសទាញឲ្យប្រើប្រាស់វា ដោយសារតែវាធ្វើឲ្យសប្បាយនៅគ្រាដំបូងៗ ដូច្នេះក្នុងឱកាសនេះ សូមឲ្យប្អូនជាសិស្សានុសិស្សទាំងអស់ ត្រូវជៀសឲ្យឆ្ងាយពីការប្រើប្រាស់គ្រឿងញៀននេះ ហើយត្រូវយកចិត្ដទុកដាក់រៀនសូត្រឲ្យបានខ្ជាប់ខ្ជួន ដើម្បីឱ្យក្លាយជាសិស្សពូកែ ដើម្បីអនាគត់ក្រុមគ្រួសារនិងប្រទេសជាតិ។
ឯកឧត្ដម ផៃ សុខខេង បន្ថែមថា បញ្ហាមួយទៀតដែលកំពុងកើតមានឡើងជារៀងរាល់នាបច្ចុប្បន្ននេះ គឺការគ្រោះថ្នាក់ចរាចរណ៍ បណ្ដាលធ្វើឲ្យមនុស្សស្លាប់ និង រងរបួស ដែលពេលខ្លះ បានក្លាយខ្លួនទៅជាជនពិការអស់មួយជីវិត ព្រមទាំងខូចខាតទ្រព្យសម្បត្តិ និងយានយន្តរបស់ខ្លួនផងដែរ ដែលបញ្ហានេះ បានកើតឡើងដោយសារកត្ដាយានយន្ដ កត្ដាមនុស្សដែលអ្នកបើកបរខ្វះការប្រុងប្រយ័ត្ន និងមិនគោរពច្បាប់ឱ្យបានត្រឹមត្រូវ និង ការសេពគ្រឿងស្រវឹងហួសកម្រិតជាដើម ដូច្នេះដើម្បីចូលរួមចំណែកក្នុងការកាត់បន្ថយករណីគ្រោះថ្នាក់ចរាចរណ៍នេះ យើងទាំងអស់គ្នា ត្រូវគោរពច្បាប់ចរាចរណ៍ និង ស្លាកសញ្ញាចរាចរណ៍ឲ្យបានខ្ជាប់ខ្ជួន ក្នុងពេលកំពុងធ្វើដំណើរនៅលើផ្លូវសាធារណៈ ៕
អត្ថបទ និង រូបភាព ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
