ក្នុងរយៈពេល៧ឆ្នាំចុងក្រោយនេះ ការសម្រាលកូនតាមផ្ទះដោយឆ្មបបុរាណ នៅជនបទ ត្រូវបានបញ្ចប់ហើយ បន្ទាប់ពីស្រ្ដីមានផ្ទៃពោះពួកគាត់យល់ដឹងកាន់តែច្បាស់ ពីសុខភាពមាតានិងទារក នៅពេលសម្រាលកូន។
លោក ស៊ិន ចាន់ថន ប្រធានមណ្ឌលសុខភាពនៃឃុំពាក់ស្នែង ស្រុងអង្គរធំ ខេត្ដសៀមរាប លោកមានប្រសាសន៍កាលពីថ្ងៃទី១៤ ខែមីនានេះថា មុនឆ្នាំ២០១៥ ស្រី្ដមានផ្ទៃពោះស្ទើគ្រប់គ្នានៅឃុំពាក់ស្នែង បានសម្រាលកូននៅតាមផ្ទះដោយឆ្នបបុរាណ ទៅតាមទំនៀបទម្លាប់ពីបុរាណកាលរបស់ពួកគាត់។ ការសម្រាលកូននៅតាមផ្ទះនេះ ពួកគាត់ប្រឈមនឹងគ្រោះថ្នាក់ទាំងម្ដាយនិងកូន ដូចជាការកាត់ស្បូនមិនត្រឹមត្រូវជាដើម ប៉ុន្ដែចាប់ពីឆ្នាំ២០១៥ ដល់បច្ចុប្បន្ននេះ ស្ដ្រីមានផ្ទៃពោះ លែងមានការសម្រាលកូននៅតាមផ្ទះពីឆ្មបបុរាណទៀតហើយ ដោយពួកគាត់បានទៅសម្រាលកូននៅមន្ទីរពេទ្យជាមួយពេទ្យឆ្មបដែលមានជំនាញត្រឹមត្រូវ និងមិនមានគ្រោះថ្នាក់មួយរយភាគរយ បើទោះបីពួកគាត់នៅឆ្ងាយពីមណ្ឌលសុខភាពក៍ដោយ។ ជាមួយគ្នានោះ ស្ដ្រីមានផ្ទៃពោះ ពួកគាត់ក៍បានទៅពិនិត្យផ្ទៃពោះមុនសម្រាលគ្រប់ចំនួនកំណត់ក្នុងមួយខែ៤ដង ដែលស្មើនឹង៩០ភាគរយ ទៅតាមការណែនាំពីក្រុមគ្រូពេទ្យផងដែរ។
លោកបានបន្ដថា ការបញ្ឍប់បាន១០០ភាគរយនូវស្រី្ដសម្រាលកូនតាមផ្ទះនេះ បន្ទាប់ពីមានការយល់ដឹងច្រើនពីគ្រោះថ្នាក់នៃការសម្រាលកូនដោយឆ្មបបុរាណ ខណៈដែលអាជ្ញាធរបានយកចិត្ដទុកដាក់ផ្សព្វផ្សាយពីគ្រោះថ្នាក់ផ្សេងៗនៅពេលសម្រាលកូន ជាពិសេសរាជរដ្ឋាភិបាលបានផ្ដល់ជាកញ្ចប់ថវិកាលើកទឹកចិត្ដដល់ពួកគាត់ ជាពិសេសមន្ទីរពេទ្យនិងអាជ្ញាធរ បានដាក់លក្ខ័ណ្ឌនិងធ្វើកិច្ចសន្យាជាមួយស្រ្ដីមានផ្ទៃពោះ បើមិនទៅទទួលសេវានៅមន្ទីរពេទ្យត្រូវប្រឈមនិងបង់ប្រាក់ ហើយទៅទទួលសេវានៅមន្ទីរពេទ្យនិងទទួលបានសម្ភារៈថវិកាមួយកញ្ចប់ថវិកាពីរាជរដ្ឋាភិបាល ក៍ដូចជាសប្បុរស់ជនផងដែរ។ប៉ុន្ដែយ៉ាងនេះក្ដីលោក អំពាវដល់ស្ដ្រីមានផ្ទៃពោះ ក៍ដូចប្រជាពលរដ្ឋមានជំងឹត្រូវទៅទទួលសេវាព្យាបាលនៅមន្ទីរពេទ្យរដ្ឋ ដើម្បីធានាបាននូវសុខភាពល្អ។
លោក អេង សំបាន អភិបាលរងស្រុកអង្គរធំ លោកមានប្រសាសន៍ទទួលស្គាល់ថា ពិតមានជាលែងមិនមានស្ដ្រីមានផ្ទៃសម្រាលកូននៅតាមផ្ទះហើយ ដោយសារការសម្រាលកូនដោយឆ្មបបុរាណប្រឈមនឹងក្រោះថ្នាក់ទាំងម្ដាយនិងកូន ដោយករណីនេះ អាជ្ញាធរក៍ដូជរាជរដ្ឋាភិបាលបានយកចិត្ដទុកដាក់ដល់ពួកគាត់ ជាពិសេសការផ្ដល់ថវិកាលើកទឹកចិត្ដពេលទៅសម្រាលកូននៅមន្ទីរពេទ្យ។ លោកបានបន្ដថា អាជ្ញាធរនឹងបន្ដយកយកចិត្ដទុកដាក់ជួយឧបត្ថម្ភដល់ស្ដ្រីមានផ្ទៃ និងបន្ដផ្សព្វផ្សាយឱ្យពួកគាត់យល់បន្ថែមទៀតពីគ្រោះថ្នាក់នៃការសម្រាលកូននៅតាមផ្ទះ។លោកបន្ដ ការថែទាំសុខមាលភាពប្រជាពលរដ្ឋ មិនត្រឹមតែចំពោះស្ដ្រីមានផ្ទៃពោះនឹងសម្រាលកូននោះទេ គឺបានយកចិត្ដទុកដាក់ដល់ប្រជាពលរដ្ឋទូទៅថែមទៀតផង។ លោកស្នើឱ្យប្រជាពលរដ្ឋដែលទៅព្យាបាលក៍ដូចពិនិត្យសុខភាពនៅមណ្ឌលសុខភាពជឿជាក់លើក្រុមគ្រូពេទ្យ បើទោះបីមណ្ឌលសុខភាពនេះនៅតាមជនបទក្ដី។
បើតាមលោក ស៊ិន ចាន់ថន ប្រធានមណ្ឌលសុខភាពឃុំពាក់ស្នែង បានបញ្ជាក់ថា មណ្ឌលសុខភាពនេះមានពេទ្យឆ្មបចំនួន ៣នាក់ និងមានស្រ្ដីមានផ្ទៃពោះទៅសម្រាលកូន នៅមណ្ឌលសុខភាព គិតជាមធ្យមចំនួន ១០នាក់ ក្នុងមួយខែ ខណៈដែលមានប្រជាពលរដ្ឋទៅពិនិត្យ និងពិគ្រោះជំងឺទូទៅចាប់ពី ១,០០០ ទៅ ១,៥០០ករណីក្នុងរយៈពេលមួយខែ៕
អត្ថបទ និង រូបភាព៖ លោក ឈិត សាវី
