នៅថ្ងៃទី១៧ខែមីនាឆ្នាំ២០២២ ក្រសួងអប់រំយុវជននិងកីឡា សហការគាំទ្រពីអង្គការដៃគូនិងអាជ្ញាធមូលដ្ឋានបានរៀបចំពិធីទស្សនកិច្ចសិក្សា ពិធីផ្ទេរ-ទទួលសម្ភារៈគាំទ្រ និងសាលារៀនបានអនុវត្តកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ នៅសាលាបឋមសិក្សាដូនឪក្នុងស្រុកអង្គរធំ ខេត្តសៀមរាប ក្រោមអធិបតីភាព ឯកឧត្តមបណ្ឌិតសភាចារ្យ ហង់ជូន ណារ៉ុន រដ្ឋមន្រ្តីក្រសួង អប់រំ យុវជន និងកីឡា លោក ពិន ប្រាកដ អភិបាលរងខេត្ត តំណាងដ៍ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងវត្តមានអញ្ជើញចូលរួម ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា លោកស្រី Claire Conan (ក្លែរ ខូណាន់) នាយិកាប្រចាំប្រទេស នៃកម្មវិធីស្បៀងអាហារពិភពលោក រួមជាមួយវត្តមាន ឯកឧត្តម លោកជំទាវ លោក លោកស្រី ប្រតិភូក្រសួងអប់រំ យុវជន និងកីឡា លោក លោកស្រី ថ្នាក់ដឹកនាំមន្ទីរ-អង្គភាព មន្រ្តីរាជការ កម្លាំងប្រដាប់អាវុធ ក្រុមប្រឹក្សាស្រុក អភិបាលស្រុក ក្រុមប្រឹក្សាឃុំលាងដៃ លោកគ្រូ-អ្នកគ្រូ ក្មួយៗសិស្សានុសិស្ស ជាច្រើនទៀតផងដែរ។លោក ពិន ប្រាកដ អភិបាលរងខេត្តមានប្រសាសន៍ថា៖ការរីករាលដាលនៃជំងឺកូវីដ-១៩ ចូលក្នុងសហគមន៍ រាជរដ្ឋាភិបាល ត្រូវបង្ខំចិត្តផ្អាកដំណើរការគ្រឹះស្ថានសាធារណៈ និងឯកជន គ្រប់កម្រិត ជាបណ្តោះអាសន្ន ដោយជំនួសដោយការបង្រៀនពីចម្ងាយ (តាមអនឡាញ)វិញ ហើយមកដល់ចុងឆ្នាំ២០២១ គ្រឹះស្ថានសាធារណៈ និងឯកជន បានបើកដំណើរការឡើងវិញ។ លោកអភិបាលរងខេត្តបញ្ជាក់ថា៖បេសកកម្មវិស័យអប់រំក្នុង ក្របខណ្ឌគោលដៅអភិវឌ្ឍដោយចីរភាព ជាមួយគ្នានេះ មន្ទីរអប់រំ យុវជន និងកីឡាខេត្ត ដែលជាសេនាធិការឱ្យរដ្ឋបាលខេត្ត នៅតែមានមហិច្ចតាខ្ពស់ថែមទៀត ក្នុងគោលដៅធ្វើឱ្យកុមារ និងយុវជន គ្រប់រូបទទួលបាននូវសេវាអប់រំប្រកបដោយសមធម៌ បរិយាប័ន្ន និង ប្រកបដោយប្រសិទ្ធភាពខ្ពស់។ បើពិនិត្យជារួមឃើញថា មានកុមារ ប្រមាណជិត ២% នៅក្រៅសាលារៀន ទោះបីជាពួកគេដល់វ័យត្រូវ ចូលសិក្សាហើយក៏ដោយ កុមារមួយចំនួនចូលរៀនពុំបានជាប់លាប់ ការបោះបង់ការសិក្សា ការរៀនធ្លាក់មធ្យមភាគ អត្រាត្រួតថ្នាក់ និង អត្រាឆ្លងភូមិសិក្សាពុំទាន់ឆ្លើយតបទៅនឹងសំណូមពរ។ល។ ដែលជា បញ្ហាសេសសល់ទាមទារឱ្យវិស័យអប់រំ និងអ្នកពាក់ព័ន្ធជួយគាំទ្របន្ថែម ទៀតទាំងហេដ្ឋារចនាសម្ព័ន្ធរូបវ័ន្ត ថវិកា បច្ចេកទេសជាដើម។ លោកស្រី Claire Conan (ក្លែរ ខូណាន់) នាយិកាប្រចាំប្រទេស នៃកម្មវិធីស្បៀងអាហារពិភពលោក មានប្រសសន៍ថា៖ពីឆ្នាំ១៩៩៩មក មានកុមារជាង២លាននាក់នៃសាលាបឋមសិក្សាសរុបចំនួន១១១៣សាលាក្នុងខេត្តគោលដៅចំនួន១០ ដែលទទួលអត្ថប្រយោជន៍ពីកម្មវិធីផ្តល់អាហារតាមសាលារៀន។តាមរយៈកម្មវិធីនេះបានជួយសម្រួលនិងលើកកំពស់ដល់ការចុះឈ្មោះចូលរៀន ការតាមដានវត្តមានសិក្សានិងការយកចិត្តទុកដាក់របស់កុមារក្នុងថ្នាក់រៀន ហើយពួកគាត់ក៍ទទួលបានអាហារប្រកបដោយអាហារូបត្ថម្ភដើម្បីជួយកុមារឱ្យមានសុខភាពល្អនិងជាពិសេសជួយសម្រួលដល់កុមារក្នុងគ្រួសារក្រីក្រនិងងាយរងគ្រោះ និងរួមចំណែកជួយលើកកំពស់សេដ្ឋកិច្ចនៅក្នុងមូលដ្ឋានតាមរយៈការទិញកសិផលពីកសិករក្នុងសហគមន៍ផងដែរ និយាយរួមកម្មវិធីផ្តល់អាហារតាមសាលារៀនជាការវិនិយោគមួយបែបក្នុងការកសាងធនធានមនុស្សដែលជាមូលដ្ឋានគ្រឺះក្នុងការអភិវឌ្ឍប្រទេសកម្ពុជា។ពីឆ្នាំ២០១៩មក កម្មវិធីស្បៀងអាហារពិភពលោកបានផ្ទេរសាលាបានអនុវត្តកម្មវិធីផ្តល់អាហារតាមសាលារៀនចំនួន២៩០សាលា ដែលក្នុងនោះបានប្រើប្រាស់ថវិកាប្រមាណជា៣លានដុល្លារ ពេលនេះក៍បានផ្ទេរសាលាចំនួន៨៥បន្ថែមទៀតជូនដល់រាជរដ្ឋាភិបាលកម្ពុជាផងដែរ។ឯកអគ្គរដ្ឋទូតអាមេរិក ប្រចាំកម្ពុជា េឯកអគ្គរដ្ឋទូតអាមេរិក ប្រចាំកម្ពុជា លោក Patrick Murphy ដោយមើលឃើញពីសារសំខាន់នៃកម្មវិធីផ្តល់អាហារតាមសាលានេះ ក្រសួងកសិកម្មសហរដ្ឋអាមេរិក បានផ្តល់ថវិកាប្រមាណជាង៨៤លានដុល្លាដល់កម្មវិធីស្បៀងអាហារពិភពលោក ដើម្បីគាំទ្រដល់កម្មវិធីនេះ សម្រាប់សិស្សបឋមសិក្សាទូទាំងប្រទេសកម្ពុជា។ លោករំពឹងថា បើទោះណាជាជំនួយត្រូវបានបញ្ចប់នៅពេលណាមួយ កម្មវិធីនេះនៅតែអាចបន្តប្រកបដោយនិរន្តរភាពនៅកម្ពុជា ឯកឧត្តម Patrick Murphy មានប្រសាសន៍ថា៖ដោយមើលឃើញពីសារសំខាន់នៃកម្មវិធីផ្តល់អាហារតាមសាលានេះ ក្រសួងកសិកម្មសហរដ្ឋអាមេរិក បានផ្តល់ថវិកាប្រមាណជាង៨៤លានដុល្លាដល់កម្មវិធីស្បៀងអាហារពិភពលោក ដើម្បីគាំទ្រដល់កម្មវិធីនេះ សម្រាប់សិស្សបឋមសិក្សាទូទាំងប្រទេសកម្ពុជា។ ឯកឧត្តម រំពឹងថា បើទោះណាជាជំនួយត្រូវបានបញ្ចប់នៅពេលណាមួយ កម្មវិធីនេះនៅតែអាចបន្តប្រកបដោយនិរន្តរភាពនៅកម្ពុជា។ថ្លែងក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡាមានប្រសាសន៍ថា៖កម្មវិធីផ្ដល់អាហារតាមសាលារៀន ជាអាទិភាពមួយរបស់វិស័យអប់រំ ក្នុងចំណោមកម្មវិធីជំនួយសង្គមជាច្រើន ដូចមានចែងក្នុងគោលនយោបាយជាតិស្តីពីការគាំពារសង្គម។ ក្រសួងអប់រំ យុវជន និងកីឡា ក្នុងនាមជាសេនាធិការឱ្យរាជរដ្ឋាភិបាល និងជាស្ថាប័នប្រតិបត្តិ បានប្ដេជ្ញាអនុវត្ត និងសម្រេចឱ្យបាននូវ សូចនាករនានា។
ដូចមានចែងក្នុងក្របខណ្ឌគោលនយោបាយជាតិស្តីពីការគាំពារសង្គម ក្នុងនោះរួមមាន កម្មវិធីផ្តល់អាហារូបករណ៍ដល់សិស្សក្រីក្រ, និងកម្មវិធីផ្ដល់អាហារតាមសាលារៀន សំដៅធានាដល់ការធ្វើឱ្យមានលំនឹងប្រាក់ចំណូលរបស់ប្រជាជនស្ថិតក្នុងក្រុមគ្រួសារក្រីក្រ, ងាយរងគ្រោះ, និងទទួលបានអត្ថប្រយោជន៍ ពីកម្មវិធីជំនួយសង្គម ប្រកបដោយសមធម៌ និងបរិយាបន្ន ជាពិសេសក្នុងដំណាក់កាលនៃការប្រយុទ្ធប្រឆាំងនឹងជំងឺកូវីដ-១៩។ ឯកឧត្តម បញ្ជាក់ថា៖ក្នុងឆ្នាំសិក្សា ២០២១-២០២២ នេះ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា បានអនុញ្ញាតឱ្យក្រសួងពង្រីកវិសាលភាពរបស់កម្មវិធីផ្តល់អាហារតាមសាលារៀនពីចំនួន ២០៥ សាលា ទៅដល់ ២៩០សាលា ក្នុងខេត្តគោលដៅចំនួន ៩ បើទោះបី កម្ពុជាកំពុងប្រយុទ្ធប្រឆាំងនឹងជំងឺកូវីដ១៩ យ៉ាងណាក៏ដោយ។ ទន្ទឹមជាមួយនោះ ផែនការយុទ្ធសាស្រ្ត ផ្ទេរ-ទទួល កម្មវិធីផ្ដល់អាហារតាមសាលារៀន កំពុងត្រូវបានពិភាក្សា រវាងរាជរដ្ឋាភិបាលកម្ពុជា និងកម្មវិធីស្បៀងអាហារពិភពលោក ដើម្បីធានាឱ្យការអនុវត្តប្រព័ន្ធជំនួយសង្គម កាន់តែមានគុណភាព គណនេយ្យភាព សង្គតិភាព ចីរភាព និងបរិយាបន្ន សម្រាប់ឆ្នាំ២០២៣ ដល់ឆ្នាំ ២០២៨។ ជាជំហានបន្ទាប់ ក្រសួងនឹងពិភាក្សាជាមួយក្រសួងសេដ្ឋកិច្ច និងហិរញ្ញវត្ថុ និងអ្នកពាក់ព័ន្ធ ដើម្បីជំរុញការដាក់ចេញនូវអនុក្រឹត្យ និងប្រកាសអន្តរក្រសួងស្តីពី ការអនុវត្តកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍។
ព័ត៌មានជាតិ ថ្មីៗ
អត្ថបទ និង រូបភាព៖ លោក យូ វង្ស និង លោកជា ស្រស់
