ថ្លែងក្នុងពិធីបិទការផ្សព្វផ្សាយខ្លឹមសារអនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី២៩ នៅវត្តទេពពោធិវង្សស្ថិតក្នុងក្រុងសៀមរាបនារសៀលថ្ងៃទី២៩ ខែមីនា ឆ្នាំ២០២២ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានផ្តល់អនុសាសន៍មួយចំនួនប្រគេន ព្រះមន្ត្រីសង្ឃ តាមវត្តអារាមទូទាំងក្រុងសៀមរាប និងជូនចំពោះ លោកតាអាចារ្យ គណៈកម្មការវត្តនានា សម្រាប់ជាមូលដ្ឋាន ដើម្បីលើកកម្ពស់វិស័យព្រះពុទ្ធសាសនាឱ្យកាន់តែរីកចំរើន និងគួរជាទីជ្រះថ្លាសម្រាប់ជនានុជនគោរពប្រតិបត្តិ។ ក្នុងអនុសាសន៍ទាំងនោះបានជំរុញដល់មន្ត្រីសង្ឃគ្រប់អង្គ ត្រូវពង្រឹង និងធានាឱ្យបាននូវភាពល្អប្រសើររបស់ព្រះពុទ្ធសាសនា និងតម្លៃរបស់ព្រះសង្ឃថេរវាទកម្ពុជា ជានិរន្តរ៍ ដោយត្រូវបង្កើន និងការរឹតបណ្តឹង ការគ្រប់គ្រង ការប្រតិបត្តិធម៌វិន័យឱ្យបានល្អទាំងក្នុងជួរមន្ត្រីសង្ឃ និង ក្នុងជួរភិក្ខុ សាមណេរក្រោមឪវាទ បន្តទប់ស្កាត់ការបិណ្ឌបាត្រ ឃោសនារៃអង្គាសដែលមិនសមស្របជាដើម និង ត្រូវបន្តពង្រឹង និងជំរុញវិស័យពុទ្ធិកសិក្សាឱ្យបានរីកចំរើនគ្រប់កំរិត ដោយត្រូវអនុវត្តតាមគន្លងប្រក្រតីភាពថ្មី គឺត្រូវអនុវត្តនូវវិធានការ ៣ការពារ ៣កុំ របស់ប្រមុខរាជរដ្ឋាភិបាល ព្រមទាំងត្រូវបន្តសហការជាមួយមន្ទីរធម្មការ និងសាសនា អាជ្ញាធរមូលដ្ឋាន ដោះស្រាយនូវរាល់អធិករណ៍ នៅតាមបណ្តាវត្តអារាមក្នុងមូលដ្ឋានរបស់ខ្លួន។
ឯកឧត្តម ប្រធានក្រុមប្រឹក្សាខេត្តក៍បានជំរុញដល់មន្ត្រីសង្ឃគ្រប់អង្គ និងដាស់តឿនឱ្យលោកតាអាចារ្យ គណៈកម្មការវត្ត ត្រូវបន្តចុះអប់រំសីលធម៌ពុទ្ធសាសនា ដល់សិស្សានុសិស្សតាមសាលារៀនរដ្ឋ និងឯកជន និងតាមសហគមន៍ ដើម្បីលើកកម្ពស់ចរិយាធម៌ សីលធម៌សង្គមក្នុងជួរយុវវ័យ ជាមួយគ្នានេះ ក៍ត្រូវបន្តរួមសាមគ្គីគ្នា ដើម្បីរួមចំណែកក្នុងកិច្ចការមនុស្សធម៌ ក្នុងនោះរួមមាន ៖ ការជួយដល់អ្នកខ្វះខាត អ្នកខ្វះទីពឹង ជនរងគ្រោះ ជនងាយរងគ្រោះ ជួយដល់មន្ទីរពេទ្យដែលមានតំរូវការចាំបាច់ និង/ ឬ ជួយតាមរយៈអង្គការមនុស្សធម៌ផ្សេងៗទៀត មានកាកបាទក្រហមជាដើម។
ឯកឧត្តម អ៊ាន ឃុន មានប្រសសន៍សង្កត់ធ្ងន់ថា៖ព្រះគ្រូអនុគណក្រុង/ស្រុក ព្រះគ្រូឧបជ្ឈាយ៍ខេត្ត ក្រុង/ស្រុក និងវត្ត ត្រូវសហការជាមួយរដ្ឋបាលក្រុង/ស្រុក ឃុំ/សង្កាត់ ត្រូវចូលរួមពិនិត្យលក្ខណៈសម្បត្តិបុគ្គល ដែលមានបំណងសាងព្រះផ្នួស ដោយមុនចេញបដិញ្ញាណបំបួស ឬទិដ្ឋាការអនុញ្ញាត ដល់បុគ្គលណា បុគ្គលនោះត្រូវតែមានលក្ខណៈសម្បត្តិល្អ មានសីលធម៌រស់នៅស្អាតស្អំ ដើម្បីក្លាយជាបព្វជិតគួរឱ្យគោរពបូជា ជ្រះថ្លានៅពេលអនាគត។ ចំណុចនេះសំខាន់ណាស់ កន្លងមកមានជនខិលខូចមួយចំនួន បានជ្រកពួនក្នុងព្រះពុទ្ធសាសនា និងបានប្រព្រឹត្តនូវអំពើអបាយមុខមួយចំនួន រួមមាន ការប្រើប្រាស់គ្រឿងញៀន និងប្រព្រឹត្តបទល្មើសផ្សេងៗ ផងដែរ។
ក្នុងនាមក្រុមប្រឹក្សា គណៈអភិបាលខេត្ត ឯកឧត្តម អ៊ាន ឃុន បានបង្ហាញនូវក្តីសោមនស្សសប្បាយរីករាយ ចំពោះការផ្សព្វផ្សាយខ្លឹមសារអនុសំវច្ឆរ មហាសន្និបាតមន្ត្រីសង្ឃទូទាំងប្រទេស លើកទី២៩នេះដែលសបញ្ជាក់ពីស្មារតីរួមគ្នាលើកស្ទួយតម្លៃព្រះពុទ្ធ-សាសនា ដែលជាសាសនារបស់រដ្ឋឱ្យរីកចំរើន ស្ថិតស្ថេរ និងគង់វង្សរុងរឿងរហូតតទៅ។ បច្ចុប្បន្នស្ថានភាពប្រទេសយើងបានវិវត្តន៍ទៅរកភាពប្រក្រត្រីឡើងវិញ ការឆ្លងរីករាលដាលនៃជំងឺកូវីដ-១៩ ត្រូវបានប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី ដឹកនាំចាត់វិធានការគ្រប់គ្រងបានយ៉ាងមានប្រសិទ្ធភាព។ ជាមួយនោះ អត្រានៃការឆ្លងក៏មានការធ្លាក់ចុះ ចំនួននៃការចាក់វ៉ាក់សាំងបានកើនឡើង ប្រជាពលរដ្ឋគ្រប់រូប រួមទាំងកុមារអាយុចាប់ពី ៣ឆ្នាំឡើង ត្រូវបានទទួលការចាក់វ៉ាក់សាំងគ្រប់ៗ គ្នា។ ប្រការនេះ ដែលនឹងធ្វើឱ្យមានភាពស៊ាំនៅក្នុងសហគមន៍ ពិសេសជួយការពារបាននូវការស្លាប់បាត់បង់ជីវិតដោយសារជំងឺកូវីដ-១៩ ថែមទៀត។
ក្នុងរបាយការណ៍របស់ លោក វណ្ណ ប៊ុនណា ប្រធានមន្ទីរធម្មការ និងសាសនាខេត្ត ថា៖ខេត្តសៀមរាប មានពុទ្ធសាសនាពីរនិកាយ គឺគណៈមហានិកាយ និង គណៈធម្មយុត្តិកនិកាយ មានវត្តសរុបចំនួន ២៥៧ វត្ត និងអាស្រម ២១ មានព្រះសង្ឃចំនួន ៥.៥០១ អង្គ ក្នុងនោះវត្តគណមហានិកាយ មាន២៤៩ វត្ត និងអាស្រម ២០ ព្រះសង្ឃមានចំនួន៥.៣៩៩ អង្គ វត្តគណៈធម្មយុត្តិកនិកាយ មានចំនួន០៨ វត្ត និងអាស្រម ១ មានព្រះសង្ឃ ចំនួន ១០២ អង្គ អាចារ្យចំនួន ៦៤២ នាក់ គណៈកម្មការវត្តចំនួន ១.៦៧៤នាក់ តាជី ២៧៦ នាក់ ដូនជី ៧៦៤ នាក់ ក្មេងវត្ត ៣១៨ នាក់ សិស្សនិស្សិតស្នាក់នៅវត្ត ២៩នាក់។ រីឯមណ្ឌលវិបស្សនាធុរៈមាន ២៤ កន្លែង និងព្រះសង្ឃ សីលវ័ន្ត សីលវតី ចំនួន ២៨៩ រូប ទីបច្ឆា មានចំនួន ១២៣កន្លែង។ ដោយឡែក ក្រុងសៀមរាប មានវត្តទាំងពីរគណៈចំនួន ៤៤ វត្ត និងអាស្រម១ ព្រះសង្ឃសរុប ១.៣៧៤អង្គ ។វត្តគណៈមហានិកាយមាន ៤០ វត្ត និង អាស្រម១ មានព្រះសង្ឃ ១,៣១៨ អង្គ និង វត្តគណៈធម្មយុត្តិកនិកាយមាន ៤វត្ត មានព្រះសង្ឃចំនួន ៥៦ អង្គ។
សូមបញ្ជាក់ថា៖សាលាគណក្រុងសៀមរាប សហការជាមួយមន្ទីរធម្មការនិងសាសនាខេត្តបានរៀបចំ ពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី ២៩ ប្រព្រឹត្តទៅ រយៈពេល ០១ ថ្ងៃ នៅថ្ងៃទី២៩ ខែមីនា ឆ្នាំ២០២២ ដោយមានសមាជិក សមាជិកាចូលរួមចំនួន ២៣០ អង្គ/នាក់ ក្នុងនោះមានព្រះចៅអធិការវត្ត ព្រះគ្រូសូធ្យស្តាំ ឆ្វេង លោកតាអាចារ្យ គណៈកម្មការវត្តតាមបណ្តាវត្តក្នុងក្រុងសៀមរាបនិង ចៅសង្កាត់ទាំង១២ ព្រមទាំងមន្ត្រីការិយាល័យពាក់ពន្ធ័នៅរដ្ឋបាលក្រុង និង មន្ទីរធម្មការខេត្តចូលរួមផង ។ អង្គពិធី បានស្តាប់នូវរបាយការណ៍បូកសរុបលទ្ធផលការងារ រយៈពេលមួយឆ្នាំរបស់ព្រះគ្រូអនុគណក្រុងសៀមរាប និង បានពិភាក្សាទៅលើខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី ២៨ ដែលបានដាក់ចេញកាលពីឆ្នាំកន្លងទៅផងដែរ៕
អត្ថបទ និង រូបភាព៖ លោក យូ វង្ស
