កាលពីរសៀលថ្ងៃទី៣០ ខែមីនា ឆ្នាំ២០២២នេះ គណ:បញ្ជាការឯកភាពរដ្ឋបាលខេត្តសៀមរាប មានបើកកិច្ចប្រជុំ ក្រោមអធិបតីភាពដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ប្រធានគណ:បញ្ជាការឯកភាពរដ្ឋបាលខេត្ត ដោយមានការចូលរួមសំណាក់ឯកឧត្តម លោកជំទាវ អភិបាលរងខេត្ត ស្នងការនគរបាល មេបញ្ជាការកងកម្លាំងប្រដាប់អាវុធ និង អស់លោក លោកស្រី ថ្នាក់ដឹកនាំស្ថាប័ន ប្រធានមន្ទីរ អង្គភាពជុំវិញខេត្ត ប្រធាន គណ:បញ្ជាការឯកភាពក្រុង ស្រុក និងមន្ត្រីពាក់ព័ន្ធចូលរួមផងដែរ។ ក្នុងនោះឯកឧត្តមប្រធានគណ:បញ្ជាការឯកភាពរដ្ឋបាលខេត្ត បានដាក់នូវរបៀបវារ:កិច្ចប្រជុំ ដោយផ្តោតទៅលើការពិភាក្សាសំខាន់ៗដូចជា៖ ១-ការចាត់វិធានការបង្រ្កាបបទល្មើសជលផលនៅបឹងទន្លេសាបដែលស្ថិតនៅក្នុងភូមិសាស្ត្រក្រុង ស្រុកទាំង៦, ទី២- ការរក្សាសន្តិសុខ សណ្តាប់ធ្នាប់ សម្រាប់ពិធីសម្ពោធដាក់អោយប្រើប្រាស់ជាផ្លូវការផ្លូវ៣៨ខ្សែ និងពិធីបុណ្យចូលឆ្នាំថ្មី និងទី៣-ប្រកាសសេចក្តីសម្រេច ស្តីពីការបង្កើត ក្រុមការងារត្រួតពិនិត្យ ស្រាវជ្រាវ និងបង្រ្កាបបទល្មើសជលផលក្នុងភូមិសាស្ត្រខេត្តសៀមរាប។
បន្ទាប់ពីស្តាប់សេចក្តីរាយការណ៍នអំពីការចុះបង្រ្កាប និងទប់ស្កាត់បទល្មើសនេសាទរបស់មន្ត្រីជលផល និងការរាយការណ៍ អំពីការងារសន្តិសុខ សណ្តាប់ធ្នាប់ និងការរៀបចំផែនការ ការពារសន្តិសុខ សណ្តាប់ធ្នាប់សាធារណ:របស់អង្គភាពប្រដាប់អាវុធទាំងបីរួចមក ឯកឧត្តមអភិបាលខេត្ត និងជាប្រធានគណ:បញ្ជាការឯកភាព បានណែនាំឱ្យអាជ្ញាធរមូលដ្ឋានក្រុង ស្រុក និងបណ្តាអង្គភាពពាក់ព័ន្ធ ត្រូវអនុវត្តនូវផែនការខាងលើតាមភារកិច្ចរៀងៗខ្លួន ប្រកបដោយស្មារតីទទួលខុសត្រូវ និងប្រសិទ្ធភាពខ្ពស់ ដើម្បីធានាឱ្យដំណើរប្រព្រឹត្តទៅ ប្រកបដោយការទទួលខុសត្រូវ និងជោគជ័យគ្រប់កម្មវិធីខាងលើ។ ជាមោទនភាពរបស់ព្រះរាជាណាចក្រកម្ពុជា លើឆាកជាតិ អន្តរជាតិ និងតំបន់ ឯកឧត្តម អភិបាលខេត្ត បានលើកឡើងដែរថា ការរក្សាសន្តិសុខ សណ្តាប់ធ្នាប់ ធ្វើឱ្យភ្ញៀវទេសចរជាតិ និងអន្តរជាតិចាប់អារម្មណ៍ចូលមកទស្សនាកំសាន្តខេត្តនេះ ។
ឯកឧត្តម បានមានប្រសាសន៍ទៀតថាគោលបំណងនៃកិច្ចប្រជុំនេះគឺ ដើម្បីប្រមូលធាតុចូលសំខាន់ៗបន្ថែមទៀតពីគ្រប់ភាគីពាក់ព័ន្ធ ពិសេសជាមួយ គណ:បញ្ជាការកងឯកភាពក្រុង ស្រុកទាំង៦ដែល ទាក់ទងនឹងស្ថានភាពភូមិសាស្រ្តមុខសញ្ញាជនល្មើសជលផល ដោយប្រើឧបករណ៍នេសាទសំខាន់ៗដែលជនល្មើសប្រើប្រាស់ ត្រូវវិធានការ ឬយន្តការទប់ស្កាត់ និងបង្គ្រាបកន្លងមកអោយមានប្រសិទ្ធផលខ្ពស់។ ក្នុងនោះដែរឯកឧត្តម ក៏បានដាក់ចេញនូវបទបញ្ជា និងវិធានការមួយចំនួនដល់គ្រប់សមត្ថកិច្ច នៃកងកម្លាំងប្រដាប់អាវុធ និងគណ:បញ្ជាការឯកភាពក្រុង ស្រុក ក្នុងការគ្រប់គ្រង និងបង្ក្រាបនូវរាល់សភាពការណ៍ ដែលកើតមានឡើងនៅតាមមូលដ្ឋាន។ ត្រូវស្រាវជ្រាវរាល់សំណុំរឿងបទល្មើសនេសាទ ដែលស្ថិតក្រោមសមត្ថកិច្ចរបស់ខ្លួន ដើម្បីយកមកចាត់ការតាមច្បាប់ឱ្យបានឆាប់រហ័ស ដោយម៉ឺងម៉ាត់ និងប្រកបដោយការទទួលខុសត្រូវខ្ពស់ សំដៅពង្រឹងប្រសិទ្ធភាពច្បាប់ និងការពារធនធានធម្មជាតិ ពិសេសធនធានជលផលនៅតំបន់បឹងទន្លេសាប។ ការកំណត់ឧបករណ៍សំខាន់មួយចំនួន ដែលជនល្មើសប្រើប្រាស់ធ្វើឲ្យប៉ះពាល់ធ្ងន់ធ្ងរដល់ធនធានជលផល ដើម្បីធ្វើការបង្ក្រាបជាបន្ទាន់ ត្រូវតាមដានត្រួតពិនិត្យជាប្រចាំនូវរាល់សកម្មភាពល្មើសជលផលជាប្រចាំ និងធ្វើអន្តរាគមន៍តាមការចាំបាច់ហើយត្រូវធ្វើការធ្វើជំរឿន និងការស្រាវជ្រាវ រកឧបករណ៍ និងមធ្យោបាយដែលប្រព្រឹត្តបទល្មើសជាបន្ទាន់។ ត្រូវពង្រឹងការអនុវត្តច្បាប់ឱ្យបានម៉ឺងម៉ាត់ និងដោយគ្មានការយោគយល់ចំពោះបទល្មើសនេសាទ និងជនល្មើសនេសាទ ដែលបំផ្លិចបំផ្លាញធនធានជលផលនៅតំបន់បឹងទន្លេសាប។ ចំពោះវិស័យព្រៃឈើ និងជលផល យើងត្រូវចូលរួមការពារទាំងអស់គ្នា និងបង្ក្រាបអោយខាងតែបាន ដោយត្រូវរួមគ្នាគិត រួមគ្នាធ្វើ និងរួមគ្នាទទួលខុសត្រូវ ជៀសវាងឃុបឃិត និងការពារបទល្មើសសម្រាប់ប្រយោជន៍។ ឯកឧត្តម ទៀ សីហា បានមានប្រសាសន៍បន្តទៀតថា អាជ្ញាធរខេត្តបានត្រៀមរួចជាស្រេចចំពោះការងារសន្តិសុខ សណ្តាប់ធ្នាប់ នឹងសុវត្ថិភាព សម្រាប់ពិធីសម្ពោធដាក់ឱ្យប្រើប្រាស់ជាផ្លូវការផ្លូវ ៣៨ខ្សែ ក្នុងក្រុងសៀមរាប និងពិធីបុណ្យចូលឆ្នាំថ្មីប្រពៃណីខ្មែរ ប្រកបដោយមោទនភាព។ ហើយគណ:បញ្ជាការឯកភាពរដ្ឋបាល ក្រុង ស្រុក ត្រូវអនុវត្តតាមតួនាទី និងភារកិច្ចរបស់ខ្លួនឲ្យល្អប្រសើរថែមទៀត ជាពិសេសគឺកងកម្លាំងចម្រុះ មានស្នងការដ្ឋាននគរបាលខេត្ត កងរាជអាវុធហត្ថខេត្ត និងកងកម្លាំងភូមិភាគ៤ខេត្ត ធ្វើយ៉ាងណា ដើម្បីរក្សាសន្តិសុខ និងសុវត្ថិភាពជូនដល់ប្រមុខរាជរដ្ឋាភិបាលឲ្យបានតឹងរឹងបំផុត។
ឯកឧត្តម ក៏ស្នើឲ្យគ្រប់កងឯកភាព និងគណ:បញ្ជាការឯកភាពរដ្ឋបាលក្រុង ស្រុក ត្រូវយកចិត្តទុកដាក់ និងពង្រឹងរៀបចំផែនការការពារសន្តិសុខ សណ្តាប់ធ្នាប់ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងមុខនេះផងដែរ ៕
អត្ថបទ និងរូបភាព: លោកស៊ាន សុផាត និងលោកទ្រា ពន្លឺ កែសម្រួលដោយ លីវ សុខុន!!!
