កាលពីរសៀលថ្ងៃទី៣១ ខែមីនា ឆ្នាំ២០២២ម្សិល មិញនេះ ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ ឧត្តមទីប្រឹក្សា គណៈសង្ឃនាយក សមាជិកថេរសភាសង្ឃ និងជាព្រះចៅអធិការវត្តរាជបូណ៌ បានប្រគល់ថវិកាចំនួន៨.៦៤០.០០០រៀល ក្នុងនោះ ៤លានរៀលជាថវិកាផ្ទាល់របស់ព្រះអង្គ និង៤លានរៀលទៀត ជាថវិកាបានពីភិក្ខុ សាមណេរក្នុងវត្ត , ប្រាក់ដុល្លារចំនួន១.៦៥៥ដុល្លារ និងគ្រឿងឧបភោគបរិភោគរួមមាន ៖ អង្ករចំនួន៥តោន , មីចំនួន៩កេសធំ និង៥០កេសតូច , ត្រីខចំនួន១០កេស , ទឹកស៊ីអ៊ីវចំនួន៤០យួរ , ទឹកត្រីចំនួន៤០យួរ , ស្ករសចំនួន៣ការ៉ុង , ទឹកសុទ្ឋ១០០កេស ព្រមទាំងអាល់កុលចំនួន៥កាន ជូណដល់សាខាកាកបាទក្រហមកម្ពុជា ខេត្តសៀមរាប ក្រោមវត្តមានលោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប តំណាងដ៍ខ្ពង់ខ្ពស់ឯកឧត្តម ទៀ សីហា អភិបាលខេត្តនិងជាប្រធានគណៈកម្មាធិការសាខា សម្រាប់យកទៅចែកជូនបងប្អូនប្រជាពលរដ្ឋដែលរងគ្រោះ និងងាយរងគ្រោះដោយសារឧបទ្ទវហេតុផ្សេងៗ ។
មានប្រសាសន៍ក្នុងឱកាសនោះ លោកជំទាវ ទាង អេង ទៀសីហា បានថ្លែងនូវអំណរព្រះគុណ និងអរគុណចំពោះទឹកព្រះទ័យ និងទឹកចិត្តមនុស្សធម៌របស់ព្រះសង្ឃ និងសប្បុរសជនក្នុងទីជិតឆ្ងាយ ចំពោះសកម្មភាពការងារមនុស្សធម៌របស់ក្រុមការងារសាខាកាកបាទក្រហមកម្ពុជាខេត្តសៀមរាប ដែលជានិច្ចកាលបានយកចិត្តទុកដាក់គិតគូពីសុខទុក្ខរបស់បងប្អូនប្រជាពលរដ្ឋជួបការលំបាក ជួបគ្រោះមហន្តរាយផ្សេងៗក្នុងពេលកន្លងមកជាពិសេសគ្រួសារក្រីក្រ ជនងាយរងគ្រោះ ចាស់ជរាគ្មានទីពឹង កុមារកំព្រា ស្ត្រីម៉េម៉ាយជាដើម ។
ព័ត៌មានជាតិ ថ្មីៗ
លោកជំទាវ បន្តទៀតថា ៖ កាកបាទក្រហម គឺជាស្ថាប័នមនុស្សធម៌ ក្រោមការដឹកនាំដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សាខាកាកបាទក្រហមកម្ពុជាខេត្តសៀមរាប ដឹកនាំដោយ ឯកឧត្តម ទៀ សីហា បានពុះពារយកចិត្តទុកដាក់ និងដឹកនាំបំពេញបេសកកម្មការងារមនុស្សធម៌ទូទំាងខេត្តសៀមរាប ដូចជាការ ចុះសួរសុខទុក្ខអ្នកជំងឺ ដែលសម្រាកព្យាលបាលនៅមន្ទីរពេទ្យខេត្ត ការចែកអំណោយដល់ គ្រួសារក្រីក្រ ជនគ្មាន ទីពឹង ជនចាស់ជរា ក្មេងកំព្រា ចុះសំណេះសំណាល សួរសុខទុក្ខ ផ្តល់សំភារៈការពារ និងថែរក្សា សុខភាព អនាម័យ ដល់មន្ទីរ ពេទ្យ និងមណ្ឌលសុខភាពនានាផងដែរ ក្រោមទិសស្លោក ទីណាមានការលំបាក ទីនោះតែងតែមាន កាកបាទក្រហមកម្ពុជា ឬ ទុក្ខលំបាករបស់បងប្អូន គឺជាទុក្ខលំបាករបស់ សម្តេច ប៊ុន រ៉ានី ហ៊ុនសែន ។
បើតាមសេចក្តីរាយការណ៍របស់ លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប បានឲ្យដឹងថា ៖ ក្នុងរយៈពេលមួយត្រីមាស ពីខែមករាដល់ខែមីនាឆ្នាំ២០២២ សាខាកាកបាទក្រហមកម្ពុជាខេត្ត បានផ្តល់គ្រឿងឧបភោគបរិភោគ ជូនគ្រួសារងាយរងគ្រោះបានចំនួន៥.៤៥២គ្រួសារ , ផ្តល់ជូនគ្រួសាររងគ្រោះដោយអគ្គិភ័យចំនួន៦ខ្នងផ្ទះ , ផ្តល់ជូនគ្រួសារងាយរងគ្រោះដោយខ្យល់កន្ត្រាក់ចំនួន៧៨ខ្នងផ្ទះ និង ផ្តល់ជូនគ្រួសាររងគ្រោះដោយគ្រោះឧបទ្ទវហេតុចំនួន២៣នាក់ ៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
