លោក ប្រាក់ សោភ័ណ អភិបាលរងខេត្តសៀមរាប បានរំពឹងទុកថា ព្រឹត្តិការណ៍សង្ក្រាន្តសៀមរាប ដែលរៀបចំឡើងដើម្បីអបអរបុណ្យចូលឆ្នាំថ្មី ឆ្នាំខាល ដែលនឹងមកដល់នៅ១សប្ដាហ៍ខាងមុខនេះ នឹងអាចទាក់ទាញភ្ញៀវទេសចរ ឱ្យមកទស្សនាខេត្តសៀមរាបកាន់តែច្រើន និងធ្វើឱ្យសេដ្ឋកិច្ចនៅក្នុងខេត្តសៀមរាប បានងើបល្អប្រសើរឡើងវិញ។ លោកថាបច្ចុប្បន្នអាជ្ញាធរខេត្ត បាននឹងកំពុងខ្នះខ្នែងយ៉ាងខ្លាំង លើការងារសំអាតទីធ្លាសាធារណៈ សំអាតសំរាមនៅតាមដងស្ទឹង ព្រមទាំងតុបតែងលំអ នៅតាមដងផ្លូវនានា ដោយដាក់ទង់ជាតិនិងអំពូលភ្លើងពណ៌ជាច្រើនកន្លែង ដើម្បីបង្អួតភ្នែកអ្នកទេសចរ ដែលនឹងចូលមកលេងក្នុងខេត្តសៀមរាប។
លោកអភិបាលរងខេត្ត បានបញ្ជាក់ថា សម្រាប់ការតុបតែង និងសំណង់នានា ដើម្បីរង់ចាំទទួលព្រឹត្តិការណ៍សៀមរាបសង្ក្រាន្ត គិតត្រឹមថ្ងៃទី៦ ខែមេសា ឆ្នាំ២០២២ គឺជិតរួចរាល់ទាំងស្រុងហើយ បន្ទាប់ពីខេត្តសៀមរាប ក៏ដូចជាខេត្តដទៃទៀតនៅក្នុងប្រទេសកម្ពុជា គឺបានខកខានប្រារព្ធព្រឹត្តិការណ៍ បុណ្យចូលឆ្នាំថ្មីប្រពៃណីជាតិខ្មែរ រយៈពេល ២ឆ្នាំមកហើយ ចាប់តាំងពីជំងឺកូវីដ-១៩ បានគំរាមកំហែងនៅពាលពេញពិភពលោកមក។
សូមជម្រាបថា ព្រឹត្តិការណ៍សៀមរាបសង្ក្រាន្ត ខាងមុខនេះនឹងមានរៀបចំពីរកន្លែង ទីមួយគឺធ្វើឡើងនៅក្នុងក្រុងសៀមរាប និងមួយកន្លែងទៀត ធ្វើនៅតំបន់ ប្រាសាទចៅសាយទេវតា និងប្រាសាទធម្មានន្ន ដោយនៅកណ្ដាលក្រុងសៀមរាប គឺមានរៀបចំឱ្យមានការ ជិះទូកកម្សាន្ត ក្នុងស្ទឹងសៀមរាប មាន ពិព័រណ៍ម្ហូបអាហារ ផ្សារបណ្តែតទឹក មានប្រគុំតន្រ្តីស្គរដៃ ការសម្តែងសិល្បៈនៅលើផែ ទឹកនិងការប្រគុំតន្រ្តីខ្នាតយក្សជាដើម។
ចំណែកនៅឯប្រាសាទចៅសាយទេវតា និងប្រាសាទធម្មានន្ន ដែលនៅតាមបណ្ដោយផ្លូវទៅកាន់ វង្សធំ នៃក្រុងអង្គរធំវិញគឺមានកម្មវិធីភូមិខ្ញុំ ដោយមានកម្មវិធីកំសាន្ដបែបបុរាណដូចជាពិធីបួងសួងសុំសេចក្តីសុខ ពិធីទទួលទេវតាឆ្នាំថ្មី ពិធីពួនភ្នំខ្សាច់ និងមានការរៀបចំជាភូមិខ្ញុំ ដោយមានលេងល្បែងប្រជាប្រិយ និងការសំដែងល្ខោនបាសាក់ ដែលនឹងប្រព្រឹត្តទៅចាប់ពីថ្ងៃទី១២-១៦ ខែមេសា។
ចំពោះពិធីភូមិសង្ក្រាន្តនៅក្នុងតំបន់ប្រាសាទចៅសាយទេវតា ប្រាសាទធម្មនន្នដែលជាកម្មវិធីមួយទៀតនោះ គឺតម្រូវឱ្យអ្នកចូលរួមកំសាន្ដ ស្លៀកសំលៀកបំពាក់ប្រពៃណីខ្មែរ ដូចជាហូល ផាមួង អាវប៉ាក់ ខោចែវជាដើម ក្នុងគោលបំណងរួមគ្នា លើកតម្លៃវប្បធម៌ប្រពៃណីជាតិខ្មែរ៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
