សម្រាប់ពីធីបុណ្យចូលឆ្នាំថ្មីប្រពៃណីជាតិខ្មែរ នៅខែមេសា ឆ្នាំ២០២២ខាងមុខនេះ រដ្ឋបាលខេត្តសៀមរាប សហការរៀបចំដោយសហភាពសហព័ន្ធយុវជនកម្ពុជាខេត្តសៀមរាប បានបង្កើតនូវព្រឹត្តិការណ៍ដ៏សប្បាយរីករាយ ហៅថា សៀមរាបសង្ក្រាន្ត ដែលប្រព្រឹត្តិណ៍ទៅចាប់ពីថ្ងៃទី១២ដល់១៦ខែមេសា ឆ្នាំ២០២២។
ចំពោះចំណាប់អារម្មណ៍របស់យុវជនក្នុងខេត្តសៀមរាប លើកឡើងប្រហាក់ប្រហែលគ្នានេះថា សម្រាប់ខេត្តសៀមរាប បានអាក់ខានរៀបចំពិធីបុណ្យចូលឆ្នាំប្រពៃណីជាតិខ្មែររយៈពេល២ឆ្នាំជាប់គ្នាមកហើយ។ ដូច្នេះ ពិធីបុណ្យចូលឆ្នាំខ្មែរ ឆ្នាំថ្មីខាងមុខនេះ ពិតជាមានកម្មវវិធីសប្បាយៗជាច្រើន ខណៈសោភណ្ឌភាពតាមដងផ្លូវក្នុងក្រុងជាពិសេសផ្លូវ ៣៨ខ្សែបានស្ថាបនារួចរាល់។
បើតាមឱ្យដឹងពី លោក ប្រាក់ សុភ័ណ្ឌ អភិបាលរងខេត្តសៀមរាប បង្ហាញថា ការរៀបចំ តុបតែង លម្អ សម្រាប់អបអរពិធីបុណ្យចូលឆ្នាំខ្មែរ ក៏ដូចជាសៀមរាបសង្ក្រាន្ត បានដំណើរការជិតរួចរាល់ហើយ ជាពិសេសនៅតាមដងស្ទឹងសៀមរាប។
លោកអភិបាលរងខេត្ត បញ្ជាក់ថា សៀមរាបសង្ក្រាន្ត ត្រូវបានរៀបចេញជា២ទីតាំង ដែលទីតាំងទី១ ស្ថិតនៅប្រាសាទចៅសាយទេវតា និងប្រាសាទធម្មនន្ទ ក្នុងតំបន់រមណីដ្ឋានអង្គរ ដែលមានដូចជា ពិធីបួងសួងសុំសេចក្តីសុខ ពិធីទទួលទេវតាឆ្នាំថ្មី ពិធីពួនភ្នំខ្សាច់ ការសម្ដែងល្ខោនបាសាក់ ជាពិសេសការលេងល្បែងប្រជាប្រិយខ្មែរ ដែលតម្រូវឱ្យអ្នកចូលរួម ស្លៀកសំលៀកបំពាក់ប្រពៃណីខ្មែរ ដូចជាហូល ផាមួង អាវប៉ាក់ ខោចែវ ជាដើម ដើម្បីបង្ហាញពីការចូលរួមថែរក្សាវប្បធម៌ដូនតា និងបង្ហាញដល់ភ្ញៀវទេសចរជាតិនិងអន្តរជាតិ បានឃើញពិធីដ៏កម្រទាំងនេះ នៅក្នុងរមណីយដ្ឋានបេតិកភណ្ឌ។ និងទីតាំងទី២ រៀបចំនៅក្នងក្រុងសៀមរាបតាមបណ្ដោយដងស្ទឹង ដែលមានដូចជាកម្មវិធីជិះទូកកម្សាន្ត ពិព័រណ៍ម្ហូបអាហារ ផ្សារបណ្តែតទឹក តន្រ្តីស្គរដៃ ការប្រគុំតន្រ្តីខ្នាតយក្សពីរកន្លែង ការប្រកួតកីឡាប្រដាល់ផងដែរ។
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
