កញ្ញា ម៉េង សុវណ្ណលីលីន ស្ថាបត្យករ និងជាក្រុមការងារបច្ចេកទេសជួសជុលខ្លោងទ្វារតាកាវ មានឲ្យដឹងថា ដំណើរការជួសជុលខ្លោងទ្វារតាកាវ នៅភាគខាងលិចរបស់ក្រុងអង្គរធំ គិតមកដល់ត្រឹមថ្ងៃទី០៨ ខែមេសា ឆ្នាំ២០២២នេះ បានសម្រេចលទ្ធផលប្រមាណ ៧០ភាគរយហើយ ដោយក្រុមការងារជួសជុលបានជួយសង្គ្រោះការខូចខាត របស់ខ្លោងទ្វារតាកាវ ឱ្យប្រសើរឡើងវិញជាច្រើនចំណុច ដូចជា រូបដំរីទាំង៤ ដែលខូចខាតធ្ងន់ធ្ងរ ត្រូវបានជួសជុលជិតរួចរាល់ មុខព្រហ្មខាងលិច និងខាងជើងដែលត្រូវជួសជុលត្រឹមម្កុដ ក៏ជិតរួចរាល់ដែរ ចំណែកមុខព្រហ្មខាងកើត និងខាងត្បូង កំពុងជួសជុលបន្ត ហើយបច្ចុប្បន្នក្រុមអ្នកជំនាញកំពុងសម្រុកការងារជួសជុលមុខព្រហ្មឱ្យហើយរួចរាល់ ដើម្បីឈានទៅដល់ការជួសជុលកំពូលទាំង៤ របស់ខ្លោងទ្វារតាកាវដែលជាជំហានជួសជុលចុងក្រោយ។
កញ្ញា ម៉េង សុវណ្ណលីលីន បន្តទៀតថា ការជួសជុលនេះបន្ទាប់ពីក្រុមការងារពិនិត្យឃើងថា ខ្លោងទ្វានេះមានសភាពខូចខាត់ខ្លាំងដោយសារ អាយុកាល អាកាសធាតុ ធម្មជាតិ និងកត្តាមនុស្ស ដែលបណ្តាលឱ្យបង្កាន់ដៃរបស់ខ្លោងទ្វារដែលមានរូបយក្ស និងទេវតាជាច្រើនដួលរលំ ហើយរចនាសម្ពន្ធរបស់ខ្លោងទ្វារមួយភាគធំ ដូចជា រូបដំរីទាំង៤ និងមុខព្រហ្មជាដើម បានរងការខូចខាតខ្លាំង ដែលតម្រូវឱ្យធ្វើការជួសជុលនិងសង្គ្រោះជាចាំបាច់។ ការងារនេះដែរក្រុមអ្នកជំនាញ បានធ្វើការងារជួយសង្គ្រោះខ្លោងទ្វារតាកាវ ចាប់តាំងពីអំឡុងខែធ្នូ ឆ្នាំ២០១៩ ដោយគម្រោងនេះមានរយៈពេលប្រមាណ ២ឆ្នាំ ដើម្បីអនុវត្ត តែដោយសារមានបញ្ហាមួយចំនួន ទើបកាលពីថ្ងៃទី២១ ខែកុម្ភៈ ឆ្នាំ២០២១ គម្រោងជួសជុលខ្លោងទ្វារនេះចាប់ផ្ដើមឡើងធ្វើការជួសជុលឡើងវិញបន្តទៀត៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
