ប្រជាពលរដ្ឋជាច្រើននាក់ នៅស្រុកស្វាយលើ ខេត្ដសៀមរាប បាននំាចូលរួមសប្បាយរីករាយលេងល្បែងកំសាន្ដប្រជាប្រិយ ដោយពួកគាត់តុបតែងខ្លួន និងស្លៀកសំលៀកបំពាក់របៀបខ្មែរបុរាណ លេងកំសាន្ដ ដើម្បីលើកស្ទួយវប្បធម៌ប្រពៃណីជាតិខ្មែរ និងដើម្បីអបអរឆ្នាំថ្មីប្រពៃណីជាតិខ្មែរ។ ទីតាំងដែលបានរៀបចំកំសាន្ដក្នុងពិធីបុណ្យចូលឆ្នាំថ្មីនេះ ធ្វើឡើងនៅសួនផ្កាធិស័ក្ដិជើងភ្នំគូលេន ខេត្ដសៀមរាប។
ប្រជាពលរដ្ឋ ដែលបានចូលរួមក្នុងពិធីនេះ បានសម្ដែងការសប្បាយចិត្ដ ចំពោះការផ្ដល់ការបង្កើតការសប្បាយដោយមានលេងល្បែងប្រជាប្រិយ នៅតំបន់ជនបទនាជើងភ្នំគូលេននេះ។ ពួកគាត់ថា ល្បែងប្រពៃណីវប្បធម៌ខ្មែរ គឺជាទំនៀមទម្លាប់មួយដែលប្រជាជនខ្មែរគ្រប់រូបមិនអាចបំភ្លេចបាន ជាពិសេសត្រូវលើកមកលេងក្នុងពិធីចូលឆ្នាំប្រពៃណីខ្មែរ ពួកគាត់បានគាំទ្រការលើកយល្បែងប្រជាប្រិយវប្បធម៌ប្រពៃណីខ្មែរមកបង្ហាញដល់យុវជនជំនាន់ក្រោយ ឱ្យពួកគាត់បានយល់ និងថែរក្សាទៅថ្ងៃអនាគត ហើយនឹងស្នើឱ្យមានការបង្កើតកម្មវិធីសង្ក្រាន្ដឆ្នាំឱ្យល្បែងប្រជាប្រិយខ្មែរគ្រប់ទីកន្លែង។
បើតាមលោក ប៉ែត រតនា ដែលជាអ្នករៀបចំកម្មវិធីនេះ បានដឹងថា ក្នុងរយៈពេល ៣ថ្ងៃ នៃពិធីបុណ្យចូលឆ្នាំថ្មីប្រពៃណីខ្មែរនេះ ធិស័ក្ដិសួនផ្កាជើងភ្នំគូលេន បានរៀបចំសង្ក្រាន្ដឆ្នាំថ្មី បង្កើតឱ្យមានលេងល្បែងប្រជាប្រិយកំសាន្ដ រួមមាន លែងវាយក្អម លាក់កន្សែង បោះឈូង របាំត្រុត ការប្រគុំតន្ដ្រីស្គរដៃ រាំវង់ រំាក្បាច់ និងការលែងកំសាន្ដជាច្រើនទៀត ដែលជារបៀបខ្មែរ ដើម្បីផ្ដល់ការសប្បាយដល់ប្រជាពលរដ្ឋនៅទីនោះ និងដើម្បីលើកស្ទួយតំបន់ទេសចរណ៍ វប្បធម៌ធម្មជាតិ នៅជើងភ្នំគូលេន។ ការរៀបចំល្បែងកំសាន្ដជារបៀបវប្បធម៌ខ្មែរនៅតំបន់ជនបទដាច់ស្រយ៉ាងនាជើងភ្នំគូលេនេះ គឺធ្វើឡើងកំបំណង ដើម្បីរក្សាវប្បធម៌ប្រពៃណីខ្មែរ និងដើម្បីឱ្យយុវជនជំនាន់ក្រោយបានស្គាល់ និងយល់ដឹង ហើយឱ្យចូលរួមថែរក្សាវប្បធម៌របស់ជាតិខ្មែរផងដែរ។ ជាមួយគ្នានោះក៍ចង់ឱ្យអ្នកទេសចរដែលទៅកំសាន្ដ នៅសួនផ្កាជើងភ្នំគូលេន បានលេងល្បែងប្រជាប្រិយជាមួយអ្នកភូមិ ខណៈដែលពួកគាត់មិនបានចូលរួមលេងកំសាន្ដនៅក្នុងក្រុងសៀមរាបអង្គរ។
ព័ត៌មានជាតិ ថ្មីៗ
គួរឲ្យដឹងដែរថា បើតាមរបាយការណ៍នៃមន្ទីរទេសចរណ៍ខេត្ដសៀមរាប បានបង្ហាញថា ក្នុងឱកាសបុណ្យចូលឆ្នាំថ្មីប្រពៃណីខ្មែរ មានរយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២២នេះ មានអ្នកទេសចរជាតិ និងអន្ដរជាតិចំនួន ៤០០.៥៩១នាក់នោះ គឺអ្នកទេសចរជាតិ និងបងប្អូនប្រជាពលរដ្ឋក្នុងខេត្ត មានចំនួនប្រមាណ ៣៩៧.០០០នាក់ ក្នុងនោះភ្ញៀវទេសចរមកពីតាមបណ្តាខេត្ត មានចំនួនប្រមាណ ៤៥ទៅ៥០% ប្រមាណជា ១៨០.០០០-១៩០.០០០នាក់ ដែលធ្វើដំណើរកម្សាន្តជាលក្ខណៈគ្រួសារ។ ពួកគាត់បានទៅកំសាន្ដនៅ រមណីយដ្ឋានអង្គរមានចំនួនប្រមាណ ៣៤៨.០០០នាក់ រមណីយដ្ឋានឧទ្យានជាតិភ្នំគូលេន មានចំនួនប្រមាណ ២៤.៥០០នាក់ តំបន់ទន្លេសាបមានចំនួនប្រមាណ ២.៥០០នាក់ សហគមន៍ទេសចរណ៍-អេកូទេសចរណ៍ និងតំបន់ផ្សេងៗ មានចំនួនប្រមាណ ២២.០០០នាក់។ ដោយឡែក ភ្ញៀវទេសចរបរទេសផ្ទៃក្នុង មានចំនួន ៣.៥៩១នាក់៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
