នៅព្រឹកថ្ងៃទី២១ ខែមេសា ឆ្នាំ២០២២នេះ រដ្ឋបាលខេត្តសៀមរាប សហការជាមួយរដ្ឋបាលក្រុងសៀមរាប និង សហភាពសហពន្ឋ័យុវជនកម្ពុជាខេត្ត បានរៀបចំបើកយុទ្ឋនាការបោសសម្អាតអនាម័យ និងបរិស្ថាន តាមដងផ្លូវសំខាន់ៗក្នុងក្រុងសៀមរាប ដើម្បីលើកកម្ពស់សោភ័ណភាពក្រុងសៀមរាប ក្រោមអធិបតីភាពលោក អ៊ឹង គឹមលាង អភិបាលរងខេត្ត ដោយមានការចូលរួមពីសំណាក់លោក លោកស្រី ជាថ្នាក់ដឹកនាំនិងមន្ត្រីរាជការនៃមន្ទីរ អង្គភាពនានាក្នុងខេត្ត រដ្ឋបាលក្រុងសៀមរាប ក្រុមយុវជននៃសហភាពសហពន្ឋ័យុវជនកម្ពុជាខេត្ត លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋក្នុងក្រុងសៀមរាបជាច្រើនរូបទៀត ។
លោកស្រី លឹម ផល្លីកា អភិបាលក្រុងសៀមរាបស្តីទី មានប្រសាសន៍ថា ក្រោមគំនិតផ្តួចផ្តើមរបស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ថ្ងៃនេះរដ្ឋបាលខេត្តសៀមរាប សហការជាមួយរដ្ឋបាលក្រុងសៀមរាប និង សហភាពសហពន្ឋ័យុវជនកម្ពុជាខេត្ត បានរៀបចំបើកយុទ្ឋនាការបោសសម្អាតអនាម័យ និងបរិស្ថាន តាមដងផ្លូវសំខាន់ៗក្នុងក្រុងសៀមរាប ដើម្បីបង្ហាញពីភាពស្រឡាញ់បរិស្ថានស្អាត និង ដើម្បីលើកកម្ពស់សោភ័ណភាពក្រុងឱ្យមានសម្រស់ស្រស់ស្អាត ជាទីក្រុងគ្មានសំរាម និងជាទីក្រុងប្រកបដោយភាពទាក់ទាញ ស័ក្ដិសមជាកូនចៅរបស់ដូនតាខ្មែរសម័យអង្គរ និងពង្រីកនូវគំនិតស្រឡាញ់បរិស្ថានដែលជាអត្តសញ្ញារបស់សៀមរាបផ្ទះខ្ញុំ ឱ្យកាន់តែធំទូលាយទៅដល់មហាជនគ្រប់ស្រទាប់ឱ្យស្រឡាញ់បរិស្ថានគ្រប់ៗគ្នា ដោយចាប់ផ្តើមគ្មានសំរាមរាយប៉ាយនៅមុខផ្ទះរៀងៗខ្លួន ។
លោក អ៊ឹង គឹមលាង អភិបាលរងខេត្តសៀមរាប មានប្រសាសន៍ថា បន្ទាប់ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដល់ជូននូវការកសាងហេដ្ឋារចនាសម្ព័ន្ឋផ្លូវចំនួន៣៨ខ្សែ ប្រព័ន្ឋលូបង្ហូរទឹក កែលំអដងស្ទឹងសៀមរាប កែលំអស្ថាបនាឱ្យមានផ្លូវសម្រាប់ថ្មើជើង ផ្លូវជិះកង់ និងជំរាលសម្រាប់ជនមានពិការភាពផងនោះ បានធ្វើឲ្យក្រុងសៀមរាបទាំងមូល កាន់តែមានសោភ័ណភាពស្រស់បំព្រង ស័ក្ដិសមជាក្រុងទេសចរណ៍វប្បធម៌ ប្រវត្តិសាស្ត្រ និងធម្មជាតិ បង្កើតបាននូវភាពទាក់ទាញចំណាប់អារម្មណ៍កាន់តែខ្លាំងឡើងពីសំណាក់ប្រជាពលរដ្ឋទាំងនៅក្នុងខេត្ត និង ក្រៅខេត្ត ចង់មកទស្សនាខេត្តសៀមរាបកាន់តែច្រើនឡើង ខណៈរយៈពេល៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២២កន្លងទៅនេះ ខេត្តសៀមរាប ស្ថិតក្នុងចំណាត់ថ្នាក់លេខ៣ ក្នុងចំណោមរាជធានី ខេត្តទាំង២៥ ដែលមានអ្នកទេសចរចូលមកទស្សនាកម្សាន្តច្រើនជាងគេ ។
លោក អ៊ឹង គឹមលាង បន្តថា ដោយសារតែភាពល្បីល្បាញនៃប្រាង្គប្រាសាទអង្គវត្ត និង ប្រាង្គប្រាសាទបុរាណផ្សេងៗជាច្រើនទៀត បានធ្វើឲ្យខេត្តសៀមរាប នៅតែជាខេត្តគោលដៅទេសចរដ៏ធំក្នុងពិភពលោក គួបផ្សំនឹងប្រទេសកម្ពុជាយើងមានសុខសន្តិភាពពេញបរិបូរណ៍ក្នុងទូទាំងប្រទេស ជាពិសេសធាតុស៊ាំក្នុងសហគមន៍ បន្ទាប់ពីប្រជាពលរដ្ឋ បានទទួលការចាក់វ៉ាក់សាំងការពារជំងឺកូវីដ-១៩ ទាំងដូសមូលដ្ឋាន និង ដូសជំរុញ ចំនួនជាង៩០ភាគរយផងនោះ នៅពេលខាងមុខនេះ និង ឆ្នាំបន្តបន្ទាប់ទៀត នឹងមានភ្ញៀវទេសចរចង់មកទស្សនាខេត្តសៀមរាបកាន់តែច្រើនឡើង ប៉ុន្តែប្រការសំខាន់គឺការចូលរួមរបស់ប្រជាពលរដ្ឋយើង ដែលខណៈពេលនេះ ក្នុងនាមអាជ្ញាធរខេត្ត សូមអំពាវនាវដល់ប្រជាពលរដ្ឋ ជាពិសេសអាជីវករ និងម្ចាស់អាជីវកម្មដ្ឋាននានាដែលកំពុងប្រកបអាជីវកម្មតាមបណ្តាដងផ្លូវសំខាន់ៗក្នុងក្រុងដូចជា ភោជនីយដ្ឋាន សណ្ឋាគារ ផ្ទះសំណាក់និងលំនៅដ្ឋានឯកជនក្តី សូមចូលរួមសម្អាតជាប្រចាំដោយការបោសសម្អាតនិងវេចខ្ចប់សំណល់សម្រាមដាក់ទៅតាមធុងតាមគោលដៅ និងរួសរាន់បញ្ចេញសំរាមទៅតាមម៉ោងកំណត់ដែលអាជ្ញាធរក្រុងនិងមន្ទីរបរិស្ថានខេត្តបានកំណត់ ពោលគឺក្នុងក្រុងត្រូវប្រមូលសំរាមដាក់ក្នុងធុងនៅពេលយប់៕
អត្ថបទ និងរូបភាព៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
