នៅមន្ទីរព័ត៌មានខេត្តសៀមរាប នាព្រឹកថ្ងៃទី២២ ខែមេសា ឆ្នាំ២០២២នេះ អង្គការជំនួយផ្នែកច្បាប់នៃកម្ពុជា សហការជាមួយរដ្ឋបាលខេត្ត និង មន្ទីរព័ត៌មានខេត្តសៀមរាប បានរៀបចំសិក្ខាសាលាមួយ ស្តីពីអង្គភាពពាក់ព័ន្ឋការអនុវត្តច្បាប់របបសារព័ត៌មាន សម្រាប់អ្នកសារព័ត៌មាននិងមន្ត្រីអនុវត្តច្បាប់ក្នុងខេត្តសៀមរាបប្រមាណជាង៣០នាក់ ក្រោមអធិបតីភាពឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប។
គោលបំណងសំខាន់នៃសិក្ខាសាលានេះ គឺចង់ផ្តល់ជូនបន្ថែមដល់អ្នកសារព័ត៌មាននិងមន្ត្រីអនុវត្តច្បាប់ពាក់ព័ន្ឋក្នុងខេត្ត ឲ្យបានយល់ដឹងកាន់ច្បាស់អំពីសិទ្ធិនិងច្បាប់ស្តីពីរបស់សារព័ត៌មាន និងការប្រកាន់យករបស់អ្នកសារព័ត៌មាន អំពីក្រមសីលធម៌វិជ្ជាជីវៈរបស់ខ្លួន ដែលត្រូវអនុវត្តឱ្យស្របតាមទិដ្ឋភាពច្បាប់ និងលិខិតបទដ្ឋានគតិយុត្តិនានាដែលមានជាធរមាន ស្របពេលដែលវិស័យព័ត៌មាននៅកម្ពុជាមានការរីកចម្រើន ខណៈចំនួនអ្នកប្រើប្រាស់ប្រព័ន្ធបណ្តាញសង្គមនានាកាន់តែមានចំនួនកើនឡើងឥតឈប់ឈរផងនោះ ។
មានប្រសាសន៍បើកអង្គសិក្ខាសាលានេះ ឯកឧត្តម លីវ សុខុន ទីប្រឹក្សាក្រសួងព័ត៌មាននិងជាប្រធានមន្ទីរព័ត៌មានខេត្តសៀមរាប បានឲ្យដឹងថា ព័ត៌មាន គឺជាវិស័យមួយដ៏មានសារៈសំខាន់ ក្នុងការទំនាក់ទំនងរវាងប្រជាពលរដ្ឋជាមួយសង្គម និងសេដ្ឋកិច្ចជាតិ និងអន្តរជាតិ តាមរយៈការមើល ការអាន និង ការស្តាប់ ពីបណ្តាញផ្សព្វផ្សាយនានា ទាំងក្នុង និងក្រៅប្រទេស ដែលបច្ចុប្បន្ននេះ យើងសង្កេតឃើញថា វិស័យព័ត៌មាននៅលើពិភពលោក ជាពិសេសនៅក្នុងព្រះរាជាណាចក្រកម្ពុជា មានសន្ទុះរីកចម្រើនគួជាទីមោទនៈ ប៉ុន្តែជាមួយនឹងការរីកចម្រើននៃវិស័យព័ត៌មាននេះ ក៏មានទាំងចំណុចវិជ្ជមានផង និងអវិជ្ជមានផង។
ព័ត៌មានជាតិ ថ្មីៗ
ឯកឧត្តម បន្តថា៖ ភាពវិជ្ជមានជាច្រើននៃវិស័យព័ត៌មាន បានធ្វើឲ្យប្រជាពលរដ្ឋអាចទទួលបានដំណឹងផ្សេងៗ ដែលពាក់ព័ន្ធនឹងស្ថិរភាពនយោបាយ សន្តិសុខ និងសុវត្ថិភាពសង្គម ស្ថានភាពសេដ្ឋកិច្ច និងការអប់រំផ្សេងៗ ទាំងការថែទាំសុខភាព ចំណីអាហារ អនាម័យបរិស្ថាន។ល។ ហើយតាមរយៈប្រព័ន្ឋផ្សព្វផ្សាយនានានេះ វាក៏ជាស្ពានចម្លងនូវរាល់សំណូមពរ បញ្ហា និង មតិយោបល់រវាងប្រជាពលរដ្ឋ ជាមួយរាជរដ្ឋាភិបាល និងពីរាជរដ្ឋាភិបាលមកប្រជាពលរដ្ឋវិញ បានដឹង និងធ្វើការដោះស្រាយ ប៉ុន្តែភាពអវិជ្ជមាន ក៏បានកើតមានញឹកញាប់ផងដែរ ដោយហេតុថា ស្ថាប័នព័ត៌មានឬបុគ្គលព័ត៌មានខ្លះ ផ្សព្វផ្សាយព័ត៌មានរបស់ខ្លួនខ្វះប្រភព មិនពិត បំពុល និងបំភ្លើស ដែលមានគោលបំណងទាញផលចំណេញខាងនយោបាយ ពីប្រព័ន្ធផ្សព្វផ្សាយនោះ ធ្វើឱ្យប្រជាពលរដ្ឋមានការយល់ច្រឡំចំពោះរាជរដ្ឋាភិបាល និងអាជ្ញាធរមានសមត្ថកិច្ច ធ្វើឱ្យប្រជាពលរដ្ឋមានការថ្នាំងថ្នាក់ ជាមួយអាជ្ញាធរមូលដ្ឋាននិងថ្នាក់ដឹកនាំ។
ឯកឧត្តម លីវ សុខុន បន្តថា ស្ថិតក្នុងឱកាសនេះ ក្នុងនាមក្រសួងព័ត៌មាន និងក្នុងនាមរដ្ឋបាលសាលាខេត្តសៀមរាប សូមសិក្ខាកាមទាំងអស់ ត្រូវខិតខំប្រឹងប្រែង ស្តាប់ការពន្យល់បកស្រាយរបស់វាគ្មិន និងពិភាក្សាសួរនាំឱ្យស្របទៅតាមចំណុចនៃប្រធានបទក្នុងអង្គសិក្ខាសាលា ដើម្បីឲ្យយើងទាំងអស់គ្នា បានយល់ដឹងកាន់តែច្បាស់អំពីតួនាទីភារកិច្ចក្នុងការអនុវត្តច្បាប់ របបសារព័ត៌មាន ស្របទៅតាមក្រមសីលធម៌វិជ្ជាជីវៈរៀងៗខ្លួន៕
អត្ថបទ និង រូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
