នៅទីស្នាក់ការលេខាធិការរដ្ឋានរៀបចំការបោះឆ្នោតខេត្តសៀមរាប នាព្រឹកថ្ងៃទី២២ ខែមេសា ឆ្នាំ២០២០ នេះ គណៈកម្មការរៀបចំការបោះឆ្នោតខេត្តសៀមរាប ហៅកាត់ថា គ.ខ.ប.សៀមរាប បានរៀបចំបើកកិច្ចប្រជុំមួយ ស្តីពីសន្តិសុខ សុវត្ថិភាព និងសណ្តាប់ធ្នាប់សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ក្រោមអធិបតីភាពលោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប និង ឯកឧត្ដម កុយ សង សមាជិកក្រុមប្រឹក្សាខេត្ត តំណាងឯកឧត្ដមប្រធានក្រុមប្រឹក្សាខេត្ត ដោយមានការចូលរួមពីសំណាក់លោក លោកស្រី ជាតំណាងមន្ទីរ អង្គភាពពាក់ព័ន្ធ កងកម្លាំងប្រដាប់អាវុធទាំង៣ប្រភេទ គណបក្សនយោបាយក្នុងខេត្ត សង្គមស៊ីវិល និង មន្ត្រីនៃគ.ខ.ប.សៀមរាបជាច្រើនរូបទៀត ។
លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប មានប្រសាសន៍ថា អនុវត្តតាមប្រតិទិនការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២នេះ ថ្ងៃនេះ យើងជួបប្រជុំគ្នាសាជាថ្មី ដើម្បីធ្វើការពិភាក្សាគ្នាស្វែងរកដំណោះស្រាយដ៏សមស្របមួយលើការងារសន្តិសុខ សុវត្ថិភាព និងសណ្តាប់ធ្នាប់ ដើម្បីធ្វើឲ្យដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២នេះ កាន់តែរលូន និងមានតម្លាភាព ហេតុនេះសូមលោក លោកស្រីដែលជាកម្លាំងមានសមត្ថកិច្ច និង តំណាងគណបក្សនយោបាយទាំងអស់ ប្រសិនបើមានបញ្ហាអ្វីសូមលើឡើង ដើម្បីដោះស្រាយរួមគ្នា ។
លោក នឹម វ៉ាន់សំ បន្តថា ជាមួយគ្នានេះដែរ គ.ខ.ប.សៀមរាប នឹងបង្ហាញជូននូវសកម្មភាពការងារដែលកំពុងអនុវត្តសព្វថ្ងៃនេះ គឺការចែកប័ណ្ណព័ត៌មានអ្នកបោះឆ្នោត ដែលបានដំណើរការតាំងពីថ្ងៃទី១៧ ខែមេសា ឆ្នាំ២០២២មក ហើយរហូតមកដល់ថ្ងៃទី២១ ខែមេសា ឆ្នាំ២០២២នេះ ជាដំណាក់កាលចែកតាមភូមិលើកទី១ នៅទូទាំងខេត្ត សម្រេចចែកបានប័ណ្ណចំនួន ១៧២ ០១៩ប័ណ្ណ នៃចំនួនប័ណ្ណសរុប ៥៨៨ ៥៥៣ប័ណ្ណ ហើយនៅសល់ចំនួន៤១៦ ៥៣៤ ប័ណ្ណទៀត នឹងត្រូវចែកបន្តរហូតដល់អស់ ។
ក្នុងឱកាសនោះដែរលោក នឹម វ៉ាន់សំ បានក្រើនរំលឹកដល់មន្ត្រីបោះឆ្នោតទាំងអស់ក្នុងខេត្តសៀមរាប ត្រូវបន្តអនុវត្តនូវតួនាទីរបស់ខ្លួន ដោយគោរពឱ្យបានខ្ជាប់ខ្ជួននូវច្បាប់ បទបញ្ជា និងនីតិវិធី និងក្រមសីលធម៌សម្រាប់មន្ត្រីបោះឆ្នោតឲ្យល្អប្រសើរ ជាពិសេសត្រូវបង្កើននូវចំណេះដឹងបន្ថែមទៀត ដើម្បីអនុវត្តការងារឲ្យកាន់តែមានប្រសិទ្ធភាព លើផែនការសកម្មភាពការងាររបស់គណៈកម្មាធិការជាតិរៀបចំការបោះឆ្នោត ព្រមទាំអអនុវត្តឲ្យខានតែបាននូវកំណែទម្រង់ការបោះឆ្នោតដែលនឹងត្រូវធ្វើតាមប្រព័ន្ធបច្ចេកវិទ្យាព័ត៌មាន ក្នុងន័យធានាឱ្យបាននូវប្រសិទ្ធភាពការងារបន្ថែមទៀត ដើម្បីឱ្យប្រជាពលរដ្ឋកាន់តែមានជំនឿទុកចិត្តកាន់តែខ្លាំងឡើងលើការបោះឆ្នោតនេះ ៕
អត្ថបទ និង រូបភាព៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
