នៅអង្គភាពលូទឹក និង ស្ថានីយចម្រោះទឹកកខ្វក់ខេត្តសៀមរាប នាព្រឹកថ្ងៃទី២២ ខែមេសា ឆ្នាំ២០២២នេះ ក្រសួងសាធារណការ និងដឹកជញ្ជូន សហការជាមួយរដ្ឋបាលខេត្តសៀមរាប បានរៀបចំកម្មវិធីអប់រំផ្សព្វផ្សាយអំពីបណ្តាញលូ និងទឹកកខ្វក់នៅក្រុងសៀមរាប ក្រោមអធិបតីភាពឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន និង លោក អ៊ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប ដោយមានការចូលរួមពីសំណាក់លោក លោកស្រី ជាប្រតិភូអមដំណើរ ថ្នាក់ដឹកនាំមន្ទីរ អង្គភាពនានាក្នុងខេត្ត រដ្ឋបាលក្រុងសៀមរាប ក្រុមយុវជនកាយរឹទ្ធិ ក្រុមយុវជនកាកបាទក្រហមកម្ពុជាខេត្ត លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋក្នុងក្រុងសៀមរាបជាច្រើនរូបទៀត។
លោក អ៊ឹង គឹមលាង អភិបាលរងខេត្តសៀមរាប បានលើកឡើងថា កម្មវិធីអប់រំផ្សព្វផ្សាយអំពីបណ្តាញលូ និងទឹកកខ្វក់នៅក្រុងសៀមរាបនាពេលនេះ ពិតជាមានសារៈសំខាន់ខ្លាំងណាស់ ដើម្បីលើកកម្ពស់បរិស្ថាន និងសុខភាពសាធារណៈផង និង លើកកម្ពស់សោភ័ណភាពក្រុងផង ព្រោះដោយសារការអភិវឌ្ឍរីកចម្រើនឥតឈប់ឈរពីមួយថ្ងៃទៅមួយថ្ងៃ ដែលក្នុងនោះរួមមាន៖ ការអភិវឌ្ឍទីក្រុង ហេដ្ឋារចនាសម្ព័ន្ធផ្លូវថ្នល់ ប្រព័ន្ធប្រឡាយទឹក សំណង់ អគារលំនៅឋាន ព្រមទាំងកំណើនប្រជាជនដែលរស់នៅក្នុងក្រុងមានការកើនឡើងយ៉ាងឆាប់រហ័សនោះ បានធ្វើឱ្យមានបញ្ហាចោទឡើងពាក់ព័ន្ធនឹងការគ្រប់គ្រងទឹកកខ្វក់ គឺជាកង្វល់ដ៏ធំមួយ ដែលត្រូវទាមទារឱ្យមានការយកចិត្តទុកដាក់ខ្ពស់ ក្នុងការដោះស្រាយឱ្យសមស្រប ទាន់ពេលវេលា និងចំគោលដៅ ខណៈទឹកកខ្វក់ចេញពីលំនៅឋាន និងអាជីវកម្មផ្សេងៗ ជាច្រើនបាននឹងកំពុងបញ្ចេញចោលទៅក្នុងស្ទឹង បឹង ប្រឡាយផ្សេងៗឬជ្រាបទៅក្នុងដី ដោយគ្មានការសម្អាតជាមុន។
លោក អ៊ឹង គឹមលាង បន្តថា ប្រសិនបើយើងទាំងអស់គ្នា បានយល់ដឹងច្បាស់ការគ្រប់គ្រងទឹកកខ្វក់ គួបផ្សំនឹងការកសាងហេដ្ឋារចនាសម្ព័ន្ឋផ្លូវចំនួន៣៨ខ្សែ ប្រព័ន្ឋលូបង្ហូរទឹក និង ការកែលំអដងស្ទឹងសៀមរាបផងនោះ នឹងធ្វើឲ្យក្រុងសៀមរាបទាំងមូល កាន់តែមានសោភ័ណភាពស្រស់បំព្រង ស័ក្ដិសមជាក្រុងទេសចរណ៍វប្បធម៌ ប្រវត្តិសាស្ត្រ និងធម្មជាតិ បង្កើតបាននូវភាពទាក់ទាញចំណាប់អារម្មណ៍កាន់តែខ្លាំងឡើងពីសំណាក់ប្រជាពលរដ្ឋទាំងនៅក្នុងខេត្ត និង ក្រៅខេត្ត ព្រមទាំងភ្ញៀវអន្តរជាតិ ចង់មកទស្សនាខេត្តសៀមរាបកាន់តែច្រើនឡើងថែមទៀត ខណៈបច្ចុប្បន្នប្រទេសជាតិទាំងមូលមានសុខសន្តិភាព និង ធាតុស៊ាំក្នុងសហគមន៍ បន្ទាប់ពីប្រជាពលរដ្ឋ បានទទួលការចាក់វ៉ាក់សាំងការពារជំងឺកូវីដ-១៩ ទាំងដូសមូលដ្ឋាន និងដូសជំរុញ បានចំនួនជាង៩០ភាគរយផងនោះ។
ឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន បានមានប្រសាសន៍ថា ដើម្បីប្រែក្លាយទីក្រុងសៀមរាប ឲ្យសក្តិសមជាទីក្រុងទេសចរណ៍ និងជាទីក្រុងឆ្លាតវៃ ចាប់តាំងពីឆ្នាំ២០០០មក រាជរដ្ឋាភិបាលកម្ពុជា បានខិតខំរៀបចំហេដ្ឋារចនាសម្ព័ន្ធ ធ្វើយ៉ាងណាឲ្យមានភាពស្រស់បំព្រង ដែលក្នុងនោះក៏មានការរៀបចំនូវបណ្តាញលូ ដោយមានការញែកចេញដាច់ពីគ្នា នូវប្រព័ន្ធលូរំដោះទឹកភ្លៀង និងប្រព័ន្ធទឹកកខ្វក់ ដូច្នេះវាមានសារៈសំខាន់ណាស់នៅក្នុងការចូលរួមជាមួយគ្នា ក្នុងការសម្អាតទឹកកខ្វក់ និង សម្អាតបរិស្ថាន ដើម្បីបាននូវសង្គមមួយដែលពោរពេញដោយផាសុខភាព តាមរយៈការប្រើប្រាស់ទឹកដែលស្អាត ព្រោះថាយោងតាមការសិក្សារបស់ធនាគារអភិវឌ្ឍន៍អាស៊ី បានបង្ហាញថា ប្រទេសកម្ពុជា បានចំណាយលើការព្យាបាលសុខភាពប្រមាណជា២៣០លានដុល្លាអាម៉េរិកក្នុងមួយឆ្នាំ ដែលស្មើនឹងប្រមាណ៣ភាគរយនៃGDPរបស់យើង។
ឯកឧត្តម វង្ស ពិសិដ្ឋ បន្តថា ការប្រើប្រាស់ទឹកមិនស្អាត ធ្វើឲ្យប្រជាជនយើងមានជំងឺច្រើន ជំងឺរាប់រយមុខ ដូច្នេះ ដើម្បីចូលរួមចំណែកក្នុងការដោះស្រាយបញ្ហាទឹកកខ្វក់ រាជរដ្ឋាភិបាលកម្ពុជា បានរៀបចំនូវគោលនយោបាយ ផែនការផែនការម ច្បាប់គតិយុ បទដ្ឋានបច្ចេកទេស ទាក់ទងនឹងការគ្រប់គ្រងទឹកកខ្វក់ ផ្សព្វផ្សាយអប់រំលើកកម្ពស់ការយល់ដឹងប្រជាជន ព្រមទាំងបានវិនិយោគ លើហេដ្ឋារចនាសម្ព័ន្ធប្រព័ន្ធទឹកកខ្វក់តាមបណ្តាក្រុង រាជធានី ទីប្រជុំជន រួមមាន៖ ខេត្តព្រះសីហនុ ខេត្តសៀមរាប ខេត្តបាត់ដំបងជាដើម សំដៅសម្រេចបាននូវសោភ័ណភាពទីក្រុង និងភាពទាក់ទាញ៕
អត្ថបទ និង រូបភាព៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
