នៅក្រុងសៀមរាប ថ្ងៃទី២៧ ខែមេសា ឆ្នាំ២០២២ សភាពាណិជ្ជកម្មកម្ពុជា សហការជាមួយក្រុមប្រឹក្សាអភិវឌ្ឍន៍កម្ពុជា (CDC) និងក្រសួងពាណិជ្ជកម្ម បានរៀបចំសិក្ខាសាលាស្ដីពី «ការយល់ដឹងពីការធ្វើអាជីវកម្មរបស់ពាណិជ្ជករកម្ពុជា ដើម្បីកាត់បន្ថយបញ្ហាប្រឈមផ្នែកផ្លូវច្បាប់» ដើម្បីផ្សព្វផ្សាយពីច្បាប់បញ្ញត្តិថ្មីៗ ជូនសមាជិក សមាជិកាសភាពាណិជ្ជកម្ម ពាណិជ្ជករ អាជីវករ និងសិស្សនិស្សិតនៅក្នុងខេត្ត បានយល់ដឹងឱ្យកាន់តែច្បាស់ និងទូលំទូលាយថែមទៀត សម្រាប់ជាប្រយោជន៍ក្នុងដំណើរការអាជីវកម្មរបស់ខ្លួនប្រកបដោយចីរភាព ព្រមទាំងកាត់បន្ថយកំហុសឆ្គងក្នុងការធ្វើអាជីវកម្ម។
លោកឧកញ៉ា ហ៊ុយ ភៀវ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្ម មណ្ឌលសៀមរាប ឧត្តរមានជ័យ បង្ហាញថា ច្បាប់ចំនួន៤ ដែលត្រូវបានលើកយកមកផ្សព្វផ្សាយនេះរួមមាន ៖ ១/ ច្បាប់ស្តីពីវិនិយោគ នៃព្រះរាជាណាចក្រកម្ពុជា ២/ ច្បាប់ស្ដីពីកិច្ចការពារអ្នកប្រើប្រាស់ ៣/ ច្បាប់ស្ដីពីការប្រកួតប្រជែង ៤/ ច្បាប់ស្តីពីការគ្រប់គ្រងគុណភាព សុវត្ថិភាពលើផលិតផល ទំនិញ និងសេវា ។ ច្បាប់ទាំង៤នេះ មានសារៈសំខាន់ណាស់ សម្រាប់អ្នកគ្រប់គ្នានៅក្នុងវិស័យធុរកិច្ច ដែលបង្ហាញពីភាពខុសគ្នា និងនិន្នាការប្រែប្រួលចាប់ពីពេលនេះ និងទៅអនាគត ក្នុងការប្រកបមុខរបរនានាទៅតាមបរិយាសអាជីវកម្ម។ ដូច្នេះ ការយល់ដឹងកាន់តែច្បាស់អំពីច្បាប់ ព្រមទាំងចំណេះដឹងដែលពាក់ព័ន្ធនឹងការប្រកបអាជីវកម្ម និងពាណិជ្ជកម្ម នឹងបញ្ចៀសការរងពិន័យ ឬមានទោសទណ្ឌផ្សេងៗ។ល។
គួររំលឹកថា ច្បាប់ ស្ដីពីវិនិយោគនៃព្រះរាជាណាចក្រកម្ពុជា ត្រូវបានប្រកាសឱ្យប្រើប្រាស់កាលពីថ្ងៃទី១៥ ខែតុលា ឆ្នាំ២០២១។ បើយោងតាមសភាពាណិជ្ជកម្មកម្ពុជា បានលើកឡើងថា ចំពោះច្បាប់នេះ សមាជិក សមាជិកា ពាណិជ្ជករ អាជីវករ នៅតាមបណ្ដាខេត្តភាគច្រើន នៅពុំទាន់បានយល់ដឹងច្បាស់នៅឡើយ ដូច្នេះទើបសភាពាណិជ្ជកម្មកម្ពុជា គ្រោងរៀបចំសិក្ខាសាលាផ្សព្វផ្សាយច្បាប់ថ្មីនេះជូនសមាជិក សមាជិកាសភាពាណិជ្ជកម្ម ពាណិជ្ជករ និងអាជីវករនៅតាមខេត្ត ដែលមានការិយាល័យសភាពាណិជ្ជកម្មបានយល់ដឹងកាន់តែទូលំទូលាយថែមទៀត ដើម្បីគៀងគរអ្នកវិនិយោគជាតិ អន្តរជាតិទៅវិនិយោគផ្ទាល់ដល់បណ្ដាខេត្តទាំងនោះ។
ជាការគាំទ្រ លោក ពិន ប្រាកដ អភិបាលរងខេត្តសៀមរាប បង្ហាញថា ការរៀបចំសិក្ខាសាលាផ្សព្វផ្សាយដល់ម្ចាស់ឬតំណាងក្រុមហ៊ុន សហគ្រាស អាជីវករ ពាណិជ្ជករ និងអ្នកវិនិយោគ ដើម្បីទទួលបានចំណេះដឹងពិតប្រាកដបន្ថែមពីអ្នកជំនាញ មកពីក្រសួង ស្ថាប័ន ធ្វើការបំភ្លឺពីច្បាប់ពាក់ព័ន្ធ និងបរិយាកាសក្នុងវិស័យធុរកិច្ចបច្ចុប្បន្ន។
ថ្លែងក្នុងឱកាសនោះ ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម លើកឡើងថា ក្នុងសម័យកាលដែលប្រទេសយើងកំពុងបោះជំហានទៅមុខ រាជរដ្ឋាភិបាលបានគិតគូរពីការរស់នៅរបស់ប្រជាពលរដ្ឋ ក្នុងនោះការប្រកបអាជីវកម្មប្រកបដោយភាពស្មោះត្រង់ ការគោរពច្បាប់ ក៏ត្រូវបានយកចិត្តទុកដាក់ផងដែរ។ ដូច្នេះការយល់ដឹងអំពីច្បាប់ធ្វើអាជីវកម្មរបស់ អាជីវករ ពាណិជ្ជករ អ្នកវិនិយោគ ក៏ដូចជាសាធារណជនទូទៅ គឺជាការបញ្ជៀសនូវការប៉ះពាល់ផលប្រយោជន៍គ្នាទៅវិញទៅមក ក្នុងការប្រកបរបររកស៊ីទទួលទានប្រចាំថ្ងៃ។
សូមជម្រាបថា សិក្ខាសាលាស្ដីពី «ការយល់ដឹងពីការធ្វើអាជីវកម្មរបស់ពាណិជ្ជករកម្ពុជាដើម្បីកាត់បន្ថយបញ្ហាប្រឈមផ្នែកផ្លូវច្បាប់» នឹងចាប់ផ្តើមពីថ្ងៃទី២៦ ខែមេសា ដល់ថ្ងៃទី៣ ខែមិថុនា ឆ្នាំ២០២២ នៅតាមបណ្តាខេត្តចំនួន១៧ ដោយមានមន្ត្រីជំនាញ អញ្ជើញមកពីក្រុមប្រឹក្សាអភិវឌ្ឍន៍កម្ពុជា(CDC) និងអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម ផ្តល់ចំណេះដឹងលម្អិតបន្ថែមទៀត អំពីបទប្បញ្ញត្តិពាក់ព័ន្ធនឹងច្បាប់ស្តីពីវិនិយោគនៃព្រះរាជាណាចក្រកម្ពុជា ច្បាប់ ស្តីពីកិច្ចការពារអ្នកប្រើប្រាស់, ច្បាប់ ស្តីពីការប្រកួតប្រជែង និងច្បាប់ ស្តីពីការគ្រប់គ្រងគុណភាព សុវត្ថិភាពលើផលិតផលទំនិញ និងសេវា។
អត្ថបទ និង រូបភាព៖ លោក ជា ស្រស់
កែសម្រួល៖ លោក សេង ផល្លី
