ថ្លែងក្នុងឱកាសអញ្ជើញជាអធិបតីក្នុងកិច្ចប្រជុំស្តីពីការបើកកិច្ចសវនកម្មផ្ទៃក្នុង ការិយបរិច្ឆេទ២០២១ និងបណ្តាឆ្នាំពាក់ព័ន្ធសម្រាប់ភូមិភាគ៤ នៅសាលាខេត្តសៀមរាប នាព្រឹកថ្ងៃទី២៨ ខែមេសា ឆ្នាំ២០២២ ឯកឧត្តម ឡាំ ជា រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានសវនកម្មផ្ទៃក្នុង បានមានប្រសាសន៍ថា ចាប់តាំងពីដើមឆ្នាំ២០២០ ទូទាំងប្រទេសនៅលើពិភពលោក រួមទាំងប្រទេសកម្ពុជា បានជួបបញ្ហាប្រឈមនូវការរីករាលដាលនៃជំងឺកូវីដ-១៩ ដែលមានផលប៉ះពាល់យ៉ាងខ្លាំងដល់ជីវភាពរស់នៅប្រជាពលរដ្ឋ សុខុមាលភាពសង្គម និងវិស័យផ្សេងៗ។ ជាមួយនោះអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានខកខានក្នុងការបំពេញបេសកកម្មចុះធ្វើការងារសវនកម្មតាមបណ្តារដ្ឋបាលរាជធានីខេត្តទូទាំងប្រទេសផងដែរ។
ឯកឧត្តម ឡាំ ជា មានប្រសាសន៍ទៀតថា សម្រាប់ឆ្នាំនេះ គឺខុសប្លែកពីឆ្នាំអនុវត្តកិច្ចសវនកម្មនាពេលកន្លងមក ដោយអគ្គនាយកដ្ឋានសវនកម្មផ្ទៃក្នុង បានរៀបចំកិច្ចប្រជុំបើកកិច្ចសវនកម្មផ្ទៃក្នុង ការិយបរិច្ឆេទ២០២១ និងបណ្តាឆ្នាំពាក់ព័ន្ធ នៅតាមបណ្តាភូមិភាគនីមួយៗ សរុបចំនួន ៦ភូមិភាគ ទូទាំងប្រទេស ពាក់ព័ន្ធនឹងការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ និងការគ្រប់គ្រងបុគ្គលិក ជាពិសេសសម្រាប់ខេត្តសៀមរាបនាឱកាសនេះផ្ទាល់។
ក្នុងឱកាសនេះដែរ ឯកឧត្តមក៏បានផ្តល់អនុសាសន៍ ចំនួន៣ ជូនរដ្ឋបាលខេត្ត ស្នងការដ្ឋាននគរបាលខេត្ត និងពន្ធនាគារខេត្ត ព្រមទាំងគណៈប្រតិភូអគ្គនាយកដ្ឋាន សវនកម្មផ្ទៃក្នុង ដូចខាងក្រោម៖
ទី១.គណៈប្រតិភូអគ្គនាយកដ្ឋានសវនកម្មផ្ទៃក្នុង ត្រូវបន្តពង្រឹងសមត្ថកិច្ចកិច្ចការជំនាញសវនកម្មរបស់ខ្លួនប្រកបដោយប្រសិទ្ធភាព និងការទទួលខុសត្រូវខ្ពស់ ពិសេសត្រូវធ្វើបច្ចុប្បន្នភាពលើច្បាប់ និងលិខិតបទដ្ឋានគតិយុត្តពាក់ព័ន្ធក្នុងវិស័យរដ្ឋបាលស៊ីវិល សន្តិសុខសាធារណៈ និងពន្ធនាគារ។
ទី២.គណៈប្រតិភូអគ្គនាយកដ្ឋានសវនកម្មផ្ទៃក្នុង ត្រូវតាមដានរាល់ការដាក់អនុសាសន៍ជូនសវនដ្ឋាន ដើម្បីកំណត់ពេលពេលវេលាក្នុងរយៈពេល ៦ខែ ឬយ៉ាងយូរបំផុត ១២ខែ សម្រាប់បន្តតាមដាន និងវាយតម្លៃលើសវនដ្ឋាន ក្នុងការគោរព និងអនុវត្តតាមអនុសាសន៍ របស់គណៈប្រតិភូអគ្គនាយកដ្ឋានសវនកម្មផ្ទៃក្នុង។
ទី៣.រដ្ឋបាលខេត្ត និងស្នងការដ្ឋាននគរបាលខេត្ត ត្រូវបន្តផ្សព្វផ្សាយអំពីគោលដៅនៃការចុះធ្វើសវនកម្មដល់រដ្ឋបាលសង្កាត់ និងប៉ុស្តិ៍នគរបាលរដ្ឋបាល ដើម្បីឱ្យអង្គភាពរងសវនកម្ម រៀបចំទុកដាក់នូវឯកសារហិរញ្ញវត្ថុ សក្ខីប័ត្រ និងឯកសារពាក់ព័ន្ធ ដែលជាកម្មវត្ថុនៃការចុះត្រួតពិនិត្យ របស់គណៈប្រតិភូអគ្គនាយកដ្ឋានសវនកម្មផ្ទៃក្នុង។
សូមជម្រាបថា ឯកឧត្តមថ្លែងយ៉ាងដូច្នេះ ក្នុងឱកាសអញ្ជើញជាអធិបតី ក្នុងពីធីប្រជុំស្តីពីការបើកកិច្ចសវនកម្មផ្ទៃក្នុង ការិយបរិច្ឆេទ២០២១ និងបណ្តាឆ្នាំពាក់ព័ន្ធសម្រាប់ភូមិភាគ៤ នៅសាលាខេត្តសៀមរាប នាព្រឹកថ្ងៃទី២៨ ខែមេសា ឆ្នាំ២០២២ អគ្គនាយកដ្ឋានសវនកម្មផ្ទៃក្នុង បានរៀបចំកិច្ចប្រជុំស្តីពីការបើកកិច្ចសវនកម្មផ្ទៃក្នុង ការិយបរិច្ឆេទ២០២១ និងបណ្តាឆ្នាំពាក់ព័ន្ធសម្រាប់ភូមិភាគ៤ (ខេត្តសៀមរាប កំពង់ធំ ឧត្តរមានជ័យ និងព្រះវិហារ) ដោយមានការចូលរួមពីឯកឧត្តមអនុរដ្ឋលេខាធិការ ទទួលបន្ទុកការងារសម្របសម្រួលកិច្ចការសវនកម្ម ភូមិភាគ៤ ឯកឧត្តមអភិបាលរងខេត្តទាំង៤ តំណាងឯកឧត្តម អភិបាលនៃគណៈអភិបាលខេត្តសាមីទាំង៤ ថ្នាក់ដឹកនាំ និងមន្រ្តីពាក់ព័ន្ធនៅរដ្ឋបាលខេត្តក្រុង ស្រុក ស្នងការដ្ឋាននគរបាលខេត្ត អធិការដ្ឋាននគរបាលក្រុងស្រុក និងប៉ុស្តិ៍នគរបាលរដ្ឋបាល និងលោកលោកស្រីប្រធានពន្ធនាគារ និងមន្រ្តីពាក់ព័ន្ធនៅពន្ធនាគារខេត្តផងដែរ។
មានប្រសាសន៍ក្នុងឱកាសនោះដែរ ឯកឧត្តម ទៀ សីហា អភិបាលខេត្តសៀមរាប ក៏បានជម្រាបជូនពីស្ថានភាពទូទៅក្នុងខេត្តសៀមរាប បន្ទាប់ពីស្ថានភាពនៃជំងឺកូវីដ-១៩ មានសភាពល្អប្រសើរ ជាមួយនឹងការទទួលបាននូវសមិទ្ធិផលថ្មីៗ នៃការអភិវឌ្ឍន៍ទោះស្ថិតក្នុងបរិបថនៃជំងឺកូវីដ ជាពិសេសនោះគឺសមទ្ធិផលផ្លូវ៣៨ខ្សែ ដែលទើបតែត្រូវបានសម្ពោធបើកឲ្យដំណើរការជាផ្លូវការកាលពីពេលថ្មីៗនេះ ក្រោមអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី និងជាស្ថាបនិកប្រតិបករសន្តិភាព បានធ្វើឲ្យក្រុងសៀមរាប កាន់តែមានសោភណ្ឌភាពស្រស់ត្រកាលទាំងពេលយប់ និងពេលថ្ងៃ ជាហេតុធ្វើឲ្យចរាចរណ៍នៅក្នុងក្រុងគ្មានភាពកកស្ទះដូចមុនៗឡើយ។ ហើយដើម្បីឲ្យសមស្របទៅតាមគោលការរបស់ប្រមុខរាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការបង្កើតនូវសមិទ្ធផលធំៗ សម្រាប់អភិវឌ្ឍន៍ប្រទេសជាតិក្នុងបរិបទកូវិដ។ ដូច្នេះ យើងរួមគ្នារក្សានៅសុខសន្តិភាព ស្ថិរភាពនយោបាយ សន្តិសុខសង្គមរឹងមាំ គឺជាកត្តាធានាឲ្យកម្ពុជា សម្រេចបានលទ្ធផលធំៗថ្មីៗបន្តទៀត ក្នុងដំណើរការអភិវឌ្ឍន៍សេដ្ឋកិច្ចសង្គមជាតិ និងកែលម្អរជីវភាពរស់នៅរបស់ប្រជាពលរដ្ឋ ឲ្យកាន់តែប្រសើរឡើងមួយកម្រឹតទៀត វាគឹជាកត្តាសន្តិភាព ស្ថិរភាពនយោបាយ ក៏ជាកូនសោរគន្លឹះ ដែលធ្វើឲ្យសេដ្ឋកិច្ចកម្ពុជា សម្រេចបានកំណើនសេដ្ឋកិច្ចយ៉ាងឆាប់រហ័សលើគ្រប់វិស័យ៕
អត្ថបទ និងរូបភាព៖ លោក អ៊ុន ណារាជ្យ
