សម្រាប់តំបន់ខ្លះក្នុងខេត្តសៀមរាប ប្រពៃណី តាមបែបជំនឿសាសនា ទំនៀមទម្លាប់ប្រពៃណី រាំលេង កំសាន្តល្បែងប្រជាប្រិយ៍ក្រោយចូលឆ្នាំខ្មែររួច នៅមានជាបន្តបន្ទាប់នៅឡើយ ដែលគេហៅថា ពិធីឆ្លងឆ្នាំ ផ្សឹកភ្នំខ្សាច់ ក្នុងនោះវត្តវ៉ាអារាមនៃតំបន់ខ្លះបានធ្វើពិធីឆ្លងឆ្នាំនៅថ្ងៃទី៣នៃថ្ងៃចូលឆ្នាំប្រពៃណីជាតិខ្មែរ វត្តខ្លះធ្វើក្រោយៗជាហូរហែរទៅតាមការមូលមតិគ្នារបស់អ្នកស្រុកភូមិនិងគណៈកម្មការ ចៅអធិការវត្ត ដើម្បីកំណត់យកថ្ងៃធ្វើពិធីឆ្លងឆ្នាំ វត្តអារាមនិងមូលដ្ឋានខ្លះនាំគ្នាធ្វើរហូតដល់រនោចខែពិសាខក៍មានដែរ។
ពាក់ព័ន្ធទៅនឹងប្រពៃណីនេះ វត្តប្រាសាទលលៃ ស្រុកប្រាសាទបាគងខេត្តសៀមរាប កាលពចុងសប្តាហ៍នេះ ព្រះចៅអធិការ ព្រះសង្ឃ គណៈកម្មការវត្ត និងពុទ្ឋបរិស័ទក្នុងភូមិក្បែរវត្តបានឯកភាពរៀបចំពិធីឆ្លងឆ្នាំ ផ្សឹកភ្នំខ្សាច់ គោចរចំរើនព្រះបរិត្តតាមដងផ្លូវទៅកាន់លំនៅឋានក្នុងភូមិមួយចំនួន ដើម្បីបញ្ចៀសនូវឧបទ្រុឌសៅហ្មងផងទាំងពួងពីឆ្នាំចាស់ ទទួលនូវសួស្តីសិរីបវររុងរឿងក្នុងឆ្នាំថ្មី ព្រមទាំងមានកម្មវិធីកំសាន្តនូវល្បែងប្រជាប្រិយ និងរាំលេងតាមប្រពៃណីផងដែរ។
ព្រះសមថមុនី មុត្ត វិបុល ចៅអធិការវត្តប្រាសាទលលៃ មានសង្ឃដីកាថា៖ពិធីនេះត្រូវបានអាក់ខានពីរឆ្នាំដោយសារតែការឆ្លងរីករាលដាលនៃជំងឺកូវីដ-១៩ តែដោយបានការអនុញ្ញាតិដំណើរការជាប្រក្រតីឡើងវិញនូវគ្រប់វិស័យពីរាជរដ្ឋាភិបាល ទើប ព្រះសង្ឃ គណៈកម្មការអាចារ្យវត្ត អាជ្ញាធរមូលដ្ឋានបានមូលមាត់គ្នារៀបចំកម្មវិធីតាមបែបប្រពៃណីទំនៀមទម្លាប់នេះឡើងវិញ ដោយបានការហការគាំទ្រពីអធិការនៃអធិការដ្ឋាននគរបាលស្រុក ប្រជាការពារភូមិ ដើម្បីសុខសុវត្ថិភាពនៃដំណើរការពិធី។ព្រះអង្គបន្តថា៖នៅតំបន់វត្តប្រាសាទលលៃ ជាពិសេសស្រុកប្រាសាទបាគងនេះ កម្មវិធីឆ្លងឆ្នាំផ្សឹកភ្នំខ្សាច់និងការសប្បាយជាមួយល្បែងប្រជាប្រិយខ្មែរ តែងតែប្រព្រឹត្តិជាទៀងទាត់ក្រោយចូលឆ្នាំជារៀងរាល់ឆ្នាំព្រោះជាទំនៀមទម្លាប់ ប្រពៃណីនៅតំបន់នេះ ដែលមានតាំងពីយូរយាណាស់មកហើយ អត់មានតែក្នុងសម័យ ប៉ុលពត ប៉ុណ្ណោះ។ ទម្លាប់បែបនេះ វាកើតឡើងតាំងពីសម័យណា ព្រះអង្គមិនដឹងទេ តែដឹងត្រឹមតែថា តាំងពីដឹងក្តីកាលណា បានឃើញនូវ ទម្លាប់ប្រពៃណីបែបនេះរួចទៅហើយ មិនមែនទើបនឹងកើតមាន ក្នុងសម័យកាល ក្រោយៗនេះទេ ។
ព្រះបវរវិជ្ជា ទេព ភឿន ព្រះវិន័យធរគណខេត្តនិងជាព្រះចៅអធិការស្រុកជីក្រែង មានសង្ឃដិកាថា៖ជាទូទៅតាមតំបន់ ភូមិស្រុកមួយចំនួននៃខេត្តនេះ ក្រោយពីបុណ្យចូលឆ្នាំបញ្ចប់ទៅហើយក្តីតែពួកគាត់នៅរក្សាវប្បធម៌ប្រពៃណីទំនៀមទម្លាប់បន្តការសប្បាយរីករាយ វត្តឬមូលដ្ឋានខ្លះធ្វើក្រោយចូលឆ្នាំភ្លាម ខ្លះក្រោយមួយសប្តាហ៍ ខ្លះ កន្លះខែ វត្តខ្លះរហូតដល់រនោចខែពិសាខក៍មាន គឺអាស្រ័យលើការឯកភាពគ្នាពីពុទ្ឋបរិស័ទ គណៈកម្មការវត្តនិងអាជ្ញាធរមូលដ្ឋាន ពីព្រោះខេត្តនេះសម្បូរទៅដោយប្រពៃណីទំនៀមទម្លាប់សម្បូរបែប ពួកគាត់បង្កការសប្បាយ និងផ្តល់ឱកាសបងប្អូនញាតិសន្តានដែលនៅឆ្ងាយ មកមិនទាន់ពិធីបុណ្យចូលឆ្នាំ ដើម្បីបានមកសប្បាយជាមួយគ្រួសារបងប្អូនអ្នកភូមិផងរបងជាមួយ និងមួយវិញទៀតជាពិធីអមផ្សារភ្ជាប់រវាងប្រពៃណីទំនៀមទំលាប់ជាមួយនឹងពិធីស្រង់ព្រះ ផ្ងូតទឹកឱ្យយាយាតា ឪពុកម្តាយ គឺដើម្បីបង្ហាញពីការគោរព ស្រឡាញ់ព្រះពុទ្ឋសាសនារបស់ខេមរជនខ្មែរ។ព្រះអង្គបន្តថា៖ពិធីស្រង់ព្រះ ផ្សឹកភ្នំខ្សាច់ ឆ្លងឆ្នាំ អមដោយល្បែងប្រជាប្រិយខ្មែរ គឺបញ្ជាក់ពីការរួមសាមគ្គីគ្នា ស្រឡាញ់រាប់អានគ្នា បង្ហាញជំហរស្រឡាញ់សិល្បៈ វប្បធម៌ អរិយធម៌ ប្រពៃណីទំនៀមទម្លាប់របស់ខ្លួនដែលដូនតាខ្មែរយើងបានបន្សល់ទុកមកឱ្យ គប្បីនាំគ្នាថែរក្សាការពារនូវអ្វីដែលជាអត្តសញ្ញាណជាតិសម្រាប់ឱ្យកូនខ្មែរជំនាន់ក្រោយរៀនសូត្រនិងយកគំរូតាម៕
