រដ្ឋបាលខេត្ដសៀមរាប បានប្រកាសធ្វើយុទ្ធនាការចាក់វ៉ាក់សាំងការពារជំងឺកូវីដ១៩ សម្រាប់ដូសទី៣ និងដូសទី៤ ឬដូសជម្រុញ ជូនប្រជាពលរដ្ឋ ដែលមានអាយុពី១៥ឆ្នាំឡើង និងអាយុ១៨ឆ្នាំឡើង នៅក្នុងភូមិសាស្ដ្រខេត្ដសៀមរាប ចាប់ពីថ្ងៃទី៦និងទី៧ ដល់ថ្ងៃទី២១ខែឧសភាឆ្នាំ២០២២នេះ ។
យោងសេចក្ដីជូនដំណឹងរបស់រដ្ឋបាលខេត្ដសៀមរាប ចេញផ្សាយថ្ងៃទី៥ ខែឧសភានេះ បានបង្ហាញថា យុទ្ធនាការចាក់វ៉ាក់សាំងកូវីដ១៩នេះ ធ្វើឡើងមានពីផ្នែក។ ផ្នែកទី១ សម្រាប់ប្រជាពលរដ្ឋមានអាយុចាប់ពី១៨ឆ្នំាឡើងចាប់ពីថ្ងៃទី៦ដល់ថ្ងៃទី២១ខែឧសភាឆ្នាំ២០២២ ដោយចាក់ប្រភេទវ៉ាក់សាំង (Astrazeneca) ដូសទី៣ និងដួសទី៤ (ដូសជម្រុញ) ដែលមានប្រជាពលរដ្ឋនៅក្នុងភូមិសាស្ត្រខេត្តសៀមរាប។ទីតាំងចាក់វ៉ាក់សាំង ចាប់ពីថ្ងៃទី០៦ ខែឧសភា ឆ្នាំ២០២២ នៅពលរដ្ឋស្រុកអង្គរធំ ទីតាំងវត្តសប្បរិការាម សាលាឃុំជប់តាត្រាវ សាលាឃុំស្វាយចេក និងសាលាឃុំលាងដៃនៅ នៅស្រុកជីក្រែង វត្តសិរីមង្គល(វត្តថ្មីក្របីរៀល) និងវត្តក្បាលដំរី។ស្រុកស្វាយលើ នៅវត្ដស្វាយលើ។នៅស្រុកសូទ្រនិគម នៅភោជនីយដ្ឋានពេញចិត្ត វត្តកំពង់ឃ្លាំង វត្តសំរោង និងវត្តឈូកត្រសាល។ សម្រាប់ក្រុងសៀមរាប ធ្វើឡើងនៅពីថ្ងៃទី០៧ខែឧសភា ឆ្នាំ២០២២ ស្ថិតនៅមន្ទីរពេទ្យបង្អែកខេត្ត វត្តព្រៃធំ វត្តប្រាសាទគោកចក វត្តព្រះឥន្ទ្រកោសី (វត្តលើ) មណ្ឌលសុខភាពមណ្ឌល១ និងវត្តពោធិ៍បន្ទាយជ័យ។ នៅស្រុកប្រាសាទបាគង ស្ថិតនៅវត្តស្វាយធំ សាលាឆទានភូមិតាកុយ វត្តគគីរ វត្តខ្សាច់ វត្តរលួស និងវត្តបន្ទាយឬស្សី។ នៅស្រុកក្រឡាញ់ ស្ថិតវត្តខ្នារជោ វត្តរង្សីសំពៅលូន វត្តមុន្នីរោងគោ វត្តសង្កែស្នួលកោះកែវរង្សី និងវត្តប្រាសាទ និងវត្ដរតនៈក្រសាំង។ ស្រុកបន្ទាយស្រី ស្ថិតនៅវត្តបន្ទាយស្រី វត្តព្រះដាក់ វត្តរុន និងវត្តធ្លកវារ៍។នៅស្រុកពួក ស្ថិតនៅវត្តស្វាយដង្គំ(វត្តថ្មី) វត្តមើល វត្តព្រៃជ្រូក និងផ្សារសសរស្ដម្ភថ្មី ។នៅស្រុកអង្គរជុំ ស្ថិតនៅវត្ដចារឈូករង្សី និងវត្តដំណាក់។ ស្រុកវ៉ារិន – ស្រុកស្រីស្នំ។ស្រុកវ៉ារិន ស្ថិតនៅវត្តស្រែណូយ វត្តច័ន្ទរង្សី និងវត្តសុវណ្ណបុទុម និងស្រុកស្រីស្នំ ស្ថិតនៅវត្តដូនសុខ សាលាឆទានចំការចេក និងវត្តប្រាសាទប្រីយ៍។ យុទ្ធនាការនេះចាប់ផ្ដើមពីម៉ោង ៧៖០០នាទីព្រឹក ដល់ម៉ោង១១៖០០នាទីថ្ងៃត្រង់ និងម៉ោង១៣៖៣០នាទី រសៀល ដល់ម៉ោង១៦៖០០នាទី។ប្រជាពលរដ្ឋត្រូវយកកាត ឬប័ណ្ណចាក់វ៉ាក់សាំងមកជាមួយជាចាំបាច់ ដើម្បីឱ្យក្រុមគ្រូពេទ្យងាយស្រួលក្នុងការផ្ទៀងផ្ទាត់ អត្តសញ្ញាណ ប៉ុន្ដែត្រូវតែបន្តអនុវត្តនូវវិធានការសុខាភិបាលដដែលគឺ ៣ការពារ និង៣កុំ។
ដោយឡែក យុទ្ធនាការចាក់វ៉ក់សាំងកូវីដ១៩ (ស៊ីណូវ៉ាក់)ដូសទី៣ ឬដូសជំរុញ សម្រាប់កុមារអាយុ ៥ឆ្នាំឡើង នៅក្នុងភូមិសាស្ត្រខេត្តសៀមរាប ធ្វើឡើងចាប់ផ្តើមពីថ្ងៃទី០៧ដល់ថ្ងៃទី២១ខែឧសភា ឆ្នាំ២០២២ សម្រាប់ក្រុងសៀមរាប នៅមន្ទីរពេទ្យបង្អែកខេត្ត មណ្ឌលសុខភាពមណ្ឌល០១ មណ្ឌលសុខភាពគោកចក។ មណ្ឌលសុខភាពជ្រាវ និងមណ្ឌលសុខភាពសៀមរាប ។ ស្រុកប្រាសាទបាគង នៅមណ្ឌលសុខភាពប្រាសាទបាគង ។ ស្រុកបន្ទាយស្រី មណ្ឌលសុខភាពបន្ទាយស្រី ។ស្រុកអង្គរធំមណ្ឌលសុខភាពអង្គរធំ ។ស្រុកជីក្រែង មណ្ឌលសុខភាពកំពង់ក្តី និងមណ្ឌលសុខភាពពងក្រោម ។នៅស្រុកស្វាយលើ មណ្ឌលសុខភាពស្វាយលើ ។ ស្រុកសូទ្រនិគម នៅមន្ទីរពេទ្យបង្អែកស្រុកសូទ្រនិគម និងមណ្ឌលសុខភាពពពេល ។នោស្រុកពួក នៅមន្ទីរពេទ្យបង្អែកស្រុកពួក មណ្ឌលសុខភាពសសរស្ដម្ភ និងមណ្ឌលសុខភាពរើល។ស្រុកអង្គរជុំ នៅមន្ទីរពេទ្យបង្អែកស្រុកអង្គរជុំ ។ស្រុកវ៉ារិន នៅមណ្ឌលសុខភាពស្រែណូយ។ស្រុកក្រឡាញ់ នៅមន្ទីរពេទ្យបង្អែកស្រុកក្រឡាញ់ មណ្ឌលសុខភាពស្រណាល មណ្ឌលសុខភាពសែនសុខ ។ ស្រុកស្រីស្នំ នៅមណ្ឌលសុខភាពស្រីស្នំ ។យុទ្ឋនាការនេះចាប់ផ្ដើមពីម៉ោង ៨:០០នាទីព្រឹក ដល់ម៉ោង ១១:៣០នាទីថ្ងៃត្រង់ និងម៉ោង១៤:០០នាទី និងរសៀល ដល់ម៉ោង១៦:៣០នាទី(មិនមានការឈប់សម្រាកថ្ងៃសៅរ៍ អាទិត្យ និងថ្ងៃបុណ្យ)។
អាណាព្យាបាលត្រូវយកកាត ឬប័ណ្ណចាក់វ៉ាក់សាំងមកជាមួយជាចាំបាច់ ដើម្បីឱ្យក្រុមគ្រូពេទ្យងាយស្រួលក្នុងការផ្ទៀងផ្ទាត់ អត្តសញ្ញាណ។សេចក្ដីជូនដំណឹងដដែលបានបន្ថែមថា ចំពោះកុមារអាយុ ៣ឆ្នាំ ទៅក្រោម៥ឆ្នាំមិនទាន់ចាក់ដូសទី១ សូមយកមកជាមួយនូវ សំបុត្រកំណើត ឬសំបុត្របញ្ជាក់កំណើត ឬសៀវភៅគ្រួសារ ឬលិខិតឆ្លងដែន និងប័ណ្ណសម្គាល់ខ្លួនមន្ត្រីរាជការ ឬប័ណ្ណសម្គាល់មន្ត្រីជាប់កិច្ចសន្យារបស់ឪពុកម្តាយផងដែរ៕
អត្ថបទ និងរូបភាព៖ លោក បូ សាវី
