ប្រធានក្រុមកាងារ នៃគណបក្សប្រជាជនកម្ពុជា ចុះជួយមូលដ្ឋានខេត្ដសៀមរាប បានជួបសំណេះសំណាលជាមួយបេក្ខជនពេញសិទ្ធិ និងបេក្ខជនបំរុងមនៃក្រុមប្រឹក្សាឃុំ សង្កាត់អាណត្តិទី៥ ឆ្នាំ២០២២ ដើម្បីបង្ហាញសារមួយចំនួន និងលើកទឹកចិត្តដល់ពួកគាត់់ សម្រាប់ការដណ្ដើមជ័យជំនះ ក្នុងការបោះឆ្នោតខាងមុខនេះ។ ពិធីនេះធ្វើឡើង នៅសាលប្រជុំសណ្ឋាគារសុខាសៀមរាប នាថ្ងៃទី០៧ ខែឧសភា ឆ្នាំ២០២២ ដោយមានអ្នកចូលរួមជាង១,៧០០នាក់។
ក្នុងឱកាសនោះ សម្តេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តសៀមរាប មានប្រសាសន៍ថា បេក្ខជនឃុំ សង្កាត់ អាណត្ដិទី៥ ឆ្នាំ២០២២ ទាំងពេញសិទ្ធិ និងបំរ៉ុង ត្រូវប្រឹងប្រែងខិតខំបំពេញការងារដោយបង្ហាញអំពីគោលនយោបាយរបស់គណបក្ស ផែនការរបស់គណបក្សសម្រាប់បំរើរាស្ត្រនៅពេលឈ្នះឆ្នោត ក្នុងការឃោសនារកសំលេងឆ្នោត ដែលនឹងចាប់ផ្ដើមនៅពេលដ៏ខ្លីខាងមុខនេះ។ការបោះឆ្នោតខាងមុខនេះគឺត្រូវបានប្រគួតប្រជែងតាមលទ្ធិប្រជាធិបតេយ្យសេរីពហុបក្ស ដូចនេះក្រុមបេក្ខជនទាំងអស់ត្រូវសាមគ្ដីគ្នា ត្រូវយកជ័យជំនះអោយបានជូនគណបក្ស នៃការបោះឆ្នោតអាណត្ដិទី៥ខាងមុខនេះ ដើម្បីជាមូលដ្ឋាន សម្រាប់ដល់ការបោះឆ្នោតជ្រើសរើសតំណាងរាស្ដ្រនាឆ្នាំ២០២៣ខាងមុខ។សម្ដេចពិជ័យសេនា ក៏បានណែនាំដល់ក្រុមការងារចុះជួយប្រជាពលរដ្ឋ នៅក្នុងខេត្ដសៀមរាប ត្រូវបំរើការងារអោយបានល្អ ដើម្បីអោយប្រជាពលរដ្ឋមានទំនុកចិត្ដនិងបោះឆ្នោតអោយគណបក្សប្រជាជនកម្ពុជា ឱ្យបានច្រើនជាអតិបរមា។ សម្តេច បានបន្តទៀតថា ដើម្បីឲ្យប្រទេសជាតិទទួលបាននូវសុខសន្តិភាព ស្ថិរភាពនយោបាយ មានការអភិវឌ្ឍលើគ្រប់វិស័យ សូមបងប្អូនប្រជាពលរដ្ឋបោះឆ្នោតគាំទ្រគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស និងជាប្រមុខរាជរដ្ឋាភិបាលកម្ពុជា។ ក្នុងគ្រប់កាល:ទេស:ណាមានសម្តេចតេជោ ហ៊ុន សែន គឺមិនអនុញ្ញាតឲ្យកើតមានសង្រ្គាមនៅកម្ពុជាឡើយ ។
សម្តេចពិជ័យ ក៏បានលើកពីសភាពការណ៍នយោបាយក្នុង និង ក្រៅប្រទេស ព្រមទាំងសូមឲ្យបងប្អូនកុំឲ្យចាញ់ឧបាយកលជនអគតិ ក្នុងគោលបំណងចង់បំផ្លាញលទ្ធិប្រជាធិបតេយ្យនៅកម្ពុជា និង សន្តិភាព ក្នុងគោលបំណងបម្រើតែមហិច្ឆិតាបរទេសតាមរយ:ការឃោសនាមិនឲ្យប្រជាពលរដ្ឋទៅចូលរួមការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ខាងមុខនេះ ។ សម្តេចពិជ័យសេនា បានជម្រុញឲ្យបងប្អូនសមាជិករបស់គណបក្សប្រជាជន នៅតាមភូមិ ឃុំ សង្កាត់ គ្រប់ទីកន្លែង ដែលមានតួនាទីនៅក្នុងជួរមន្ត្រីរាជការ ដូចជាលោកមេឃុំ ចៅសង្កាត់ លោកមេភូមិ និងក្រុមប្រឹក្សាឃុំ សង្កាត់ ត្រូវខិតខំបម្រើសេវាសាធារណ:នៅតាមមូលដ្ឋានរបស់ខ្លួន ទាំងសេវាតម្រូវការ សេវាចាំបាច់ ជាពិសេសលិខិតស្នាមផ្សេងៗ ដែលបម្រើឲ្យផលប្រយោជន៍ប្រជាពលរដ្ឋ ក្នុងការរស់នៅប្រចាំថ្ងៃ ឲ្យបានល្អប្រសើរឡើងថែមទៀត។ សម្តេចពិជ័យសេនា ទៀ បាញ់ ក៏បានបញ្ជាក់ផងដែរ អំពីគោលនយោបាយរបស់គណបក្សប្រជាជន ដែលជាមូលដ្ឋានគ្រឹះមួយដ៏រឹងមាំរបស់គណបក្ស ដោយឈរលើស្មារតីសាមគ្គីភាពផ្ទៃក្នុងបានល្អ ហ៊ានថា គឺហ៊ានធ្វើ មិនចេះសន្យាខ្សល់ឡើយ ។
សម្តេច បានណែនាំឱ្យមានការផ្សព្វផ្សាយជម្រុញដល់យុវជន និងប្រជាជននៅតាមមូលដ្ឋានឲ្យទៅបោះឆ្នោតឲ្យបានគ្រប់ៗគ្នា ជូនគណបក្សប្រជាជនកម្ពុជា គឺរក្សាការពារបានសន្តិភាព នឹងការអភិវឌ្ឍមូលដ្ឋាន និងបានផ្តាំផ្ញើដល់បងប្អូន ដែលមានសមាជិកក្រុមគ្រួសារធ្វើចំណាកស្រុក ឲ្យពួកគាត់បានវិលមកចូលរួមការបោះឆ្នោតនៅថ្ងៃខាងមុង និងត្រូវរក្សា ត្រៀមលក្ខណ:នូវរាល់ឯកសារពាក់ព័ន្ធសម្រាប់ការបោះឆ្នោត សំខាន់រក្សាកុំឲ្យបាត់បង់អត្តសញ្ញាណប័ណ្ឌរបស់ខ្លួន និងត្រូវរួមគ្នាដោះស្រាយរាល់កង្វល់ប្រជាពលរដ្ឋ ដែលប្រឈមនឹងជីវភាពរស់នៅ និងរក្សាសន្តិសុខ សុវត្ថិភាព និងចូលរួមអនុវត្តគោលនយោបាយភូមិ ឃុំ មានសុវត្ថិភាពនៅក្នុងមូលដ្ឋាន និងរួមគ្នាការពារសន្តិភាព ដែលជាមូលដ្ឋានគ្រឹះ នៃការអភិវឌ្ឍន៍ជាតិ និងសមិទ្ធផលដែលកើតមាននៅមូលដ្ឋានឲ្យបានគង់វង្សទៀតផង ៕
អត្ថបទ និងរូបភាព: លោកបូ សាវី និងលោកស៊ាន សុផាត កែសម្រួលដោយ លីវ សុខុន!!!
