កាលពីរសៀលថ្ងៃទី០៧ ខែឧសភាឆ្នាំ២០២២ ឯកឧត្តម ជា ច័ន្ទបរិបូរណ៍ អនុប្រធានក្រុមការងារថ្នាក់កណ្តាលគណបក្សចុះមូលដ្ឋានស្រុកក្រឡាញ់ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកក្រឡាញ់ ខេត្តសៀមរាប និងលោកជំទាវ ព្រមទាំងក្រុមការងារ បានអញ្ជើញជួបសំណេះសំណាលជាមួយសមាជិក សមាជិកា គណ:កម្មាធិការគណបក្សស្រុក គណ:អចិន្ត្រៃយ៍គណបក្សស្រុក និងសមាជិក សមាជិកាក្រុមការងារយុវជនគណបក្សស្រុក គណបក្សឃុំទាំង១០ ក្នុងស្រុក ព្រមទាំងបាននាំយកឧបករណ៍បំពងសម្លេងជាច្រើនគ្រឿង និងថវិកា ដែលចំណាយថវិកាជាង ៣ពាន់ដុល្លារ និងថវិកាចំនួន ៥០០ដុល្លារផ្សេងទៀត ប្រគល់ជូននៅស្នាក់ការគណបក្សស្រុកក្រឡាញ់ សម្រាប់បំរើការងារនៅទីនោះ។ អង្គពិធីលើកនេះ បានប្រព្រឹត្តទៅក្នុងបរិយាកាសដែលគណបក្សប្រជាជនកម្ពុជា បានបន្តដឹកនាំប្រទេសយ៉ាងរឹងមាំ ក្នុងស្មារតីឯកភាព ប្រជាធិបតេយ្យ និងការទទួលខុសត្រូវខ្ពស់បំផុត ចំពោះបុព្វហេតុជាតិ និងប្រជាជនកម្ពុជា។តាមរយ: នៃការជួបជុំសំណេះសំណាលនេះ គឺសំដៅដល់ការបង្កើនការយល់ដឹងឱ្យកាន់តែច្បាស់ពីសភាពការណ៍ទូទៅ និងការងារគណបក្សឱ្យបានទូលំទូលាយផ្ទៃក្នុងជួរគណបក្ស ដើម្បីបន្តការអនុវត្តទិសដៅភារកិច្ចរបស់គណបក្ស ឆ្នាំ២០២២ និងបណ្តាឆ្នាំខាងមុខ ដែលកម្ពុជា បានដំណើរការយ៉ាងទៀងទាត់ នូវការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណ្តិទី៥ ឆ្នាំ២០២២ និងការបោះឆ្នោតថ្នាក់ជាតិ ឆ្នាំ២០២៣ ដោយប្រកាន់ខ្ជាប់ខ្ជួននូវលទ្ធិប្រជាធិបតេយ្យ សេរីពហុបក្ស និងនីតិរដ្ឋយ៉ាងពិតប្រាកដ ។
ឯកឧត្តម ជា ច័ន្ទបរិបូរណ៍ បានលើកឡើងថា៖ ជ័យជម្នះដ៏ត្រចះត្រចង់ដែលរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា ជាប្រមុខដឹកនាំប្រកបដោយគតិបណ្ឌិត និងបញ្ញាញាណឈ្លាសវៃ ប្រកបភាពអង់អាចក្លាហានបានធ្វើឱ្យ សង្គមជាតិមានសុខសន្តិភាពពេញលេញ ស្ថេរភាពនយោបាយ និងការអភិវឌ្ឍជាតិ លើគ្រប់វិស័យ។ ឯកឧត្តម បានពន្យល់ណែនាំផងដែរអំពីចេតនាទុច្ចរិតរបស់គណបក្សនយោបាយផ្សេងៗក្នុងន័យផ្តួលរំលំរដ្ឋាភិបាលស្របច្បាប់ដែលមានការបោះឆ្នោតគាំទ្រពីប្រជាជនជាច្រើនអាណត្តិ ក្រោមការដឹកនាំដោយគណបក្សប្រជាជនកម្ពុជា ហើយដែលពួកគេតែងតែចិញ្ចឹមចិត្តដើរញុះញង់ប្រជាពលរដ្ឋ និងចោទប្រកាន់ថាការបោះឆ្នោតមិនត្រឹមត្រូវ មិនយុត្តិធម៌ជាដើម ដើម្បីពួកគេដណ្តើមប្រជាប្រិយភាពពីប្រជាជននៅតាមមូលដ្ឋាន។ឯកឧត្តម មានប្រសាសន៍ថា៖ គណបក្សប្រជាជនកម្ពុជា មានរចនាសម្ព័ន្ឋគ្រប់គ្រងដឹកនាំច្បាស់លាស់ តាំងពីថ្នាក់មូលដ្ឋានរហូតដល់ថ្នាក់ជាតិដែលគ្រឺះដ៏រឹងមាំរបស់គណបក្ស ហេតុនេះកត្តាជោគជ័យសម្រាប់ការបោះឆ្នោតក្នុងពេលខាងមុខ និងបណ្តាអាណត្តិក្រោយៗទៀតគឺពឹងលើបងប្អូនសមាជិក សមាជិកា និងក្រុមយុវជននៅតាមមូលដ្ឋានដែលជាឃោសនិក ចាំបាច់ត្រូវយល់ឱ្យបានច្បាស់អំពីច្បាប់ និងនីតិវិធីសម្រាប់បំរើឱ្យការបោះឆ្នោត និងផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ផងដែរ។
ព័ត៌មានជាតិ ថ្មីៗ
ក្នុងរបាយការណ៍របស់លោកស្រី ម៉ននី រង្សី សមាជិកគណ:កម្មាធិការគណបក្សខេត្ដ និងជាប្រធានគណ:កម្មាធិការគណបក្សស្រុកក្រឡាញ់ បង្ហាញថា៖ គណ:កម្មាធិការគណបក្សស្រុក បាន ចេញសេចក្តីសម្រេច ស្តីពីការបង្កើតគណ:បញ្ជាការយុទ្ធនាការបោះឆ្នោត និងគណ:កម្មការត្រួតពិនិត្យយុទ្ធនាការ បោះឆ្នោតរបស់គណបក្សស្រុក។ លើមូលដ្ឋាននេះ គណ:កម្មាធិការ នៃគណបក្សឃុំ ក្រោមកិច្ចសហការជាមួយក្រុមការងារគណបក្សចុះមូលដ្ឋាន ឃុំ បានរៀបចំផែនការកម្មវិធីការងារសំខាន់ និងគណ:បញ្ជាការយុទ្ធនាការបោះឆ្នោតនៅថ្នាក់ ឃុំ ផងដែរ ព្រមជាមួយនឹងការរៀបចំក្រុមចលនាបោះឆ្នោតតាមបណ្តាភូមិចំណុះ ឃុំទាំងអស់។ ជាមួយគ្នានេះក្រុមការងារចុះមូលដ្ឋាន បានកំពុងបន្តធ្វើបច្ចុប្បន្នភាពសមាជិក ក្រុមបក្ស និងបន្តពង្រីកសមាជិកបក្ស ចំពោះអ្នកមានឈ្មោះក្នុងបញ្ជីបោះឆ្នោតតែមិនទាន់បានចូលជាសមាជិកបក្ស ព្រមជាមួយនឹងការសុំចូលរួមជីវភាពនយោបាយជាមួយគណបក្សយើងពីអតីត:គណបក្សដទៃថែមទៀតផង។ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ នៅស្រុកក្រឡាញ់ មានការិយាល័យបោះឆ្នោតចំនួន ១១៥ការិយាល័យ នៅតាមឃុំទាំង១០ទូទាំងស្រុក៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
