សមត្ថកិច្ចខេត្តសៀមរាបកាលពីវេលាម៉ោង ១៥និង៣០នាទី ថ្ងៃទី០៩ ខែឧសភា ឆ្នាំ២០២២ បានធ្វើការឃាត់ខ្លួនបុរសល្មោភកាមម្នាក់ ដែលបានល្បួងក្មេងស្រីវ័យ ១៣ឆ្នាំ ដើរឆ្លុះកង្កែប ហើយចាប់រំលោភរួចសម្លាប់បោះក្នុងទឹកស្រែយ៉ាងព្រៃផ្សៃ ស្ថិតក្នុងភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។
លោកវរសេនីយ៍ទោ សុខ ម៉េងអ៊ាង នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានឲ្យដឹងថា ជនសង្ស័យឈ្មោះ អុក វឿ ភេទប្រុស អាយុ ៣១ឆ្នាំ មានទីលំនៅក្នុងភូមិឃុំខាងលើ។
លោកវរសេនីយ៍ទោ សុខ ម៉េងអ៊ាង បានបន្ថែមថា បើតាមការបំភ្លឺពីឈ្មោះ ខ្វាវ លំ ភេទស្រី អាយុ ៦៨ឆ្នាំ ត្រូវជាជីដូនរបស់ក្មេងស្រីរងគ្រោះ បានឲ្យដឹងថា មុនពេលកើតហេតុនៅថ្ងៃទី០៨ ខែឧសភា ឆ្នាំ២០២២ វេលាម៉ោង ២១ និង៣០នាទី ចៅស្រីរបស់គាត់ឈ្មោះ ផ.ឃ អាយុ ១៣ឆ្នាំ បានចេញទៅឆ្លុះកង្កែបតែម្នាក់ឯងនៅក្នុងភូមិ បន្ទាប់មកបានប្រហែលមួយសន្ធុះ គាត់ក៏ឃើញចៅស្រីរបស់គាត់បានយកកង្កែបមកទុកនៅផ្ទះ។ ក្រោយមកចៅស្រីរបស់គាត់បានសុំគាត់ទៅឆ្លុះកង្កែបទៀត ហើយបាននិយាយថាឈ្មោះ វឿ (ជនសង្ស័យ) បានប្រាប់ថានៅខាងលិចភូមិមានកង្កែបច្រើនណាស់ ទើបចៅស្រីរបស់គាត់បានទៅឆ្លុះកង្កែបទៀត លុះដល់ម៉ោងប្រហែល ៣ទៀបភ្លឺ គាត់ក៏បានក្រោករកចៅ តែមិនឃើញ ពេលនោះគាត់ក៏បានស្រែកហៅកូនចៅឲ្យជួយតាមរក តែដោយសារយប់ងងឹតពេករកមិនឃើញ លុះដល់ម៉ោងប្រហែល ០៥ និង០០នាទី ទើបរកឃើញ ចៅស្រីរបស់ខ្លួនដេកស្លាប់នៅវាលស្រែបាត់ទៅហើយ។
លោកវរសេនីយ៍ទោ បន្តថាក្រោយកើតហេតុសមត្ថកិច្ចបានចុះធ្វើការពិនិត្យទៅលើកុមារីរងគ្រោះ ហើយសន្និដ្ឋានថា ក្មេងស្រីរងគ្រោះបានស្លាប់ដោយសារករណីឃាត់កម្ម។ ភ្លាមនោះជំនាញបានធ្វើការស្រាវជ្រាវ រហូតបានឃាត់ខ្លួនជនសង្ស័យឈ្មោះ អុក វឿ ភេទប្រុស អាយុ ៣១ឆ្នាំ យកមកសួរនាំ ហើយនៅចំពោះមុខសមត្ថកិច្ច ជនសង្ស័យខាងលើបានសារភាពថា ខ្លួនពិតជាបានប្រព្រឹត្តិបទល្មើសនេះពិតប្រាកដមែន ដោយរូបគេ បានចាប់ក្មេងស្រីរងគ្រោះសង្កត់ក្នុងទឹកស្រែឲ្យសន្លប់ រួចក៏ចាប់ផ្ដើមរំលោភបានសម្រេច ហើយក៏បោះក្មេងស្រីរងគ្រោះចោលក្នុងទឹកស្រែបណ្ដាលឲ្យស្លាប់តែម្តង។
បច្ចុប្បន្នជនសង្ស័យត្រូវបានកម្លាំងនគរបាលជំនាញព្រហ្មទណ្ឌ រៀបចំសំណុំរឿងដើម្បីបញ្ជូនខ្លួនទៅកាន់តុលាការដើម្បីចាត់ការតាមផ្លូវច្បាប់៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
