លោក សាត មាស ជាអ្នកបំរើសេវាកម្មវិស័យទេសចរណ៍ នៅខាងមុខប្រាសាទអង្គរ បានលើកឡើងថា ចាប់ពីរាជរដ្ឋាភិបាលបានបើកដំណើរការ ឱ្យប្រជាពលរដ្ឋដើរកំសាន្ដនៅទូទាំងប្រទេសកន្លងមក ជាពិសេសនៅថ្ងៃបុណ្យជាតិ ថ្ងៃបុណ្យផ្សេងៗ និងថ្ងៃចុងសប្ដាហ៍ផងនោះ ទើបមានអ្នកទេសចរដើរកំសាន្ដនៅប្រាសាទអង្គរវត្ដជាច្រើនគួរឱ្យកត់សំគាល់។ លោកថា ការបើកឡើងវិញនូវវិស័យវិស័យទេសចរ បានជួយសម្រួលដល់ការធ្វើអាជីវកម្ម សេវាកម្មទេសចរ នៅខាងមុសប្រាសាទអង្គរ។
លោកបន្ដថា ក្រុមអ្នកបំរើសេវាកម្មទេសចរពួកគាត់សប្បាយចិត្ដ ដោយសារអាជីករលក់ដូរនៅទីនោះ ទទួលបានកំរ៉ៃច្រើនក្នុងមួយថ្ងៃៗ ហើយកំណើនលើវិស័យទេសចរណ៍នេះ ធ្វើឱ្យពួកគាត់មានកំលាំងចិត្ដ និងប្រាក់កំរៃជួយដល់ជីវភាពគ្រួសារ និងបុគ្គលិកបំរើការងារផងដែរ។
ជាអាជីវករដូចគ្នាអ្នកស្រី រដ្ឋា ដែលជាអ្នកលក់វត្ថុអនុស្សាវរីយ៍នៅមុខប្រាសាទអង្គរ អ្នកស្រីក៍បានសម្ដែងការសប្បាយចិត្ដ ខណៈដែលការលក់ដូរវត្ថុផ្សេងៗ ឱ្យភ្ញៀវទេសចររបស់អ្នកស្រី មានការកើនឡើងច្រើននាពេលកន្លងមក។ ចាប់តាំងជំងឺកូវីដ-១៩ មានស្ថានភាពធូរស្បើយ មានអ្នកទេសចរទៅកំសាន្ដនៅអង្គរច្រើន និងបាននទិញវត្ថុអនុស្សាវរីយ៍របស់អាជីវករនៅទីនោះខុសពីពេលកន្លងមក។ មិនតែប៉ុណ្ណោះការលក់ដំណីអាហារ ក៍មានអ្នកទេសចរទៅពិសារអាហារនៅទីនោះកើនឡើងផងដែរ។
របាយការណ៍ នាយកដ្ឋានអភិវឌ្ឍន៍ទេសចរណ៍អង្គរ វប្បធម៌សារមន្ទីរបទដ្ឋានបេតិកភ័ណ្ឌ នៃអាជ្ញាធជាតិអប្សរា បានបង្ហាញថា ចាប់ពីថ្ងៃទី០១ ខែមករា ដល់ថ្ងៃទី៣០ ខែមេសា ឆ្នាំ២០២២នេះ អ្នកទេសចរបានទៅទស្សនាតាមប្រាង្គប្រាសាទនានា ក្នុងរមណីយដ្ឋានអង្គរ មានចំនួន ១.៨១៥.៨៦៧នាក់ ក្នុងនោះមានអ្នកទេសចរជាតិចំនួន ១.៧៨២.៦៦២នាក់ និងទេសចររអន្ដរជាតិ ៣៣.២០៥នាក់៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
