ផ្លូវដីគ្រួសក្រហមប្រវែង ១៤គីឡូម៉ែត្រ ស្ថិតនៅក្នុងភូមិខ្ទីង ឃុំពាក់ស្នែង និងជាផ្លូវតភ្ជាប់ទៅកាន់ភូមិត្រពាំងទូក នៃឃុំជប់តាត្រាវ ក្នុងស្រុកអង្គរធំ ខេត្តសៀមរាប ដែលរងការខូចខាត ត្រូវបានក្រុមការងាររាជរដ្ឋាភិបាលចុះមូលដ្ឋានឃុំពាក់ស្នែង បើកការដ្ឋានជួសជុលឡើងវិញ នៅព្រឹកថ្ងៃទី១២ ខែឧសភា ឆ្នាំ២០២២ ក្រោមវត្តមានឯកឧត្តម ស ថាវី អនុរដ្ឋលេខាធិការក្រសួងការពារជាតិ និង ជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ។
តាមការឱ្យដឹងពី លោក ឡុង រដ្ឋារក្ស បង្ហាញថា ផ្លូវដែលត្រូវបានជួសជុលនេះ ជាផ្លូវសេដ្ឋកិច្ចរបស់ប្រជាពលរដ្ឋក្នុងឃុំពាក់ស្នែង និងឃុំជប់តាត្រាវ ក្នុងការដឹកជញ្ជូនកសិផលទៅកាន់ទីផ្សារ មួយវិញទៀត ផ្លូវមួយខ្សែនេះក៏បានបង្កលក្ខណៈងាយស្រួលដល់ប្រជាពលរដ្ឋ សិស្សានុសិស្ស ធ្វើដំណើរទៅសាលារៀន និង ទៅមណ្ឌលសុខភាពផងដែរ។
លោកអភិបាលស្រុក បញ្ជាក់ថា ក្នុងរយៈពេលកន្លងមក សាលាឃុំមានថវិកាពុំគ្រប់គ្រាន់ធ្វើការជួសជុល ដែលបណ្ដាលឱ្យផ្លូវមួយខ្សែនេះ កាន់តែមានការខូចខាតជាបន្តបន្ទាប់។ ដើម្បីជួយសម្រួលដល់ការធ្វើដំណើរ និងជីវភាពប្រជាពលរដ្ឋក្នុងមូលដ្ឋាន ទើបរដ្ឋបាលស្រុក និង ក្រុមការងាររាជរដ្ឋាភិបាលចុះមូលដ្ឋានឃុំពាក់ស្នែង បានធ្វើការគៀងគរប្រមូលសប្បុរសជន រួមគ្នាធ្វើការជួសជុលផ្លូវនេះឡើងវិញ ដោយមានការស្ម័ត្រចិត្តពីក្រុមហ៊ុនរថយន្តដឹកដី ចូលរួមជួសជុលដោយឥតគិតកម្រៃ និងឧបត្ថម្ភប្រេងឥន្ធនៈ ពីក្រុមការងាររាជរដ្ឋាភិបាលចុះមូលដ្ឋាន អាជ្ញាធរមូលដ្ឋាន និង សប្បុរសជនជាច្រើន។
ព័ត៌មានជាតិ ថ្មីៗ
ក្នុងឱកាសនោះ ឯកឧត្តម ស ថាវី បានគូសបញ្ជាក់ថា ស្ថិតក្រោមម្លប់សន្តិភាព បងប្អូនប្រជាពលរដ្ឋទាំងអស់គ្នា បានជ្រោងទង់សាមគ្គីគ្នាឡើង ក្នុងការការពារថែរក្សាសន្តិភាពនៅកម្ពុជាឱ្យបានគង់វង្ស។ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន បានធ្វើឱ្យប្រទេសជាតិយើង មានការអភិវឌ្ឍរីកចម្រើនលើគ្រប់វិស័យ និង ធ្វើឱ្យជីវភាពរបស់ប្រជាពលរដ្ឋនៅគ្រប់មូលដ្ឋានមានភាពល្អប្រសើរ ទោះបីប្រទេសជាតិយើង ក៏ដូចពិភពលោកទាំងមូលជួបវិបត្តិកូវីដ-១៩ក្ដី។ លើសពីនោះ ប្រជាពលរដ្ឋនៅទូទាំងប្រទេស បានទទួលការចាក់វ៉ាក់សាំងប្រយុទ្ធប្រឆាំងជំងឺកូវីដ-១៩ ដោយឥតគិតថ្លៃ ដែលជាការខិតខំស្វែងរកដ៏លំបាកពីប្រមុខរាជរដ្ឋាភិបាល។
ឯកឧត្តមប្រធានក្រុមការងារ ក៏បានថ្លែងអំណរគុណ ចំពោះស្មារតីចូលរួមរបស់សប្បុរសជន ដើម្បីជួសជុលផ្លូវមួយខ្សែនេះឡើងវិញ។ ទន្ទឹមនោះ ឯកឧត្តមក៏បានឱ្យដឹងដែរថា នៅកក្កដាខាងមុខនេះ ក្រសួងអភិវឌ្ឍន៍ជនបទ ក៏នឹងគ្រោង ជួសជុលផ្លូវមួយខ្សែទៀត ដែលមានប្រវែង ២៨គីឡូម៉ែត្រ ចាប់ពីស្រុកអង្គរធំ ទៅដល់ឃុំគោកដូង ស្រុកអង្គរជុំ។
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
