នៅព្រឹកថ្ងៃទី១៣ ខែឧសភា ឆ្នាំ២០២២នេះ លេខាធិការដ្ឋាននៃគណៈកម្មាធិការប្រយុទ្ឋប្រឆាំងអំពើជួញដូរមនុស្សខេត្តសៀមរាប ហៅកាត់ថា គ.ខ.ប.ជ បានរៀបចំកិច្ចប្រជុំប្រចាំខែឧសភា ដឹកនាំប្រជុំដោយលោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន គ.ខ.ប.ជ ខេត្តសៀមរាប និងអញ្ជើញចូលរួមពីសមាជិក សមាជិកា លេខាធិការដ្ឋាន គ.ខ.ប.ជ មន្ទីរអង្គភាពពាក់ព័ន្ធ ព្រមទាំងតំណាងអង្គការដៃគូជាច្រើនរូប។
អង្គប្រជុំបានពិនិត្យទៅលើកំណត់ហេតុ និងត្រួតពិនិត្យលើផែនការដែលអង្គប្រជុំ បានដាក់ចេញកាលពីពេលកិច្ចប្រជុំ កន្លងទៅ និងបានពិភាក្សាលើបញ្ហាប្រឈមមួយចំនួន ដែលក្រុមការងារបានអនុវត្តន៍សកម្មភាពប្រយុទ្ធប្រឆាំងអំពើជួញដូរមនុស្សតាមគ្រប់រូបភាព។ តាមការលើកឡើងក្នុងកិច្ចប្រជុំ ការចូលរួមសហការ មានភាពប្រទាក់ក្រឡាពីគ្រប់ភាគីពាក់ព័ន្ឋទាំងអស់ នៅតាមមូលដ្ឋានភូមិ ឃុំ ដូចជាធ្វើការផ្សព្វផ្សាយច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ច្បាប់ពាក់ព័ន្ឋនានា គោលនយោបាយភូមិ-ឃុំមានសុវត្ថិភាព វេទិកាសាធារណៈ ច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ និងការធ្វើចំណាកស្រុកដោយសុវត្ថិភាពជាដើម។ ក្នុងនោះ កិច្ចប្រជុំក៏បានលើកយកបញ្ហាមួយចំនួនទៀត យកមកពិភាក្សា ដើម្បីស្វែងរកដំណោះស្រាយរួមគ្នា សម្រាប់ការពារជនរងគ្រោះ និងងាយរងគ្រោះ ដោយអំពើហិង្សាទាក់ទងនឹងយេនឌ័រ ឬការរំលោភបំពានផ្សេងៗ ដែលពាក់ព័ន្ធទៅនឹងច្បាប់ស្តីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទផងដែរ។
ព័ត៌មានជាតិ ថ្មីៗ
លើកឡើងក្នុងកិច្ចប្រជុំលោកស្រី យូ សុភា បានអំពាវនាវក្រុមការងាររបស់លេខាធិការដ្ឋាន គ.ខ.ប.ជ ទំាងអស់ ត្រូវបន្តបង្កើនការផ្សព្វផ្សាយច្បាប់ទប់ស្កាត់អំពើហឹង្សាក្នុងគ្រួសារ ការជួញដូរមនុស្ស និងវិធីសាស្ត្រធ្វើចំណាកស្រុកដោយសុវត្ថិភាព ដើម្បីធ្វើការអប់រំដល់បងប្អូនប្រជាពលរដ្ឋនៅតាមមូលដ្ឋានឱ្យបានញឹកញាប់ និងបញ្ជ្រាបឱ្យពួកគាត់មានការយល់ដឹងអំពីនិតិវិធី និងបញ្ហាផ្សេងៗ ក្នុងការចំណាកស្រុកទៅធ្វើការនៅក្រៅប្រទេស ដូចជាការតម្រូវឱ្យបងប្អូនប្រជាពលរដ្ឋមានឯកសារគ្រប់គ្រាន់ និងទៅតាមរយៈក្រុមហ៊ុន ដែលមានអាជ្ញាបណ្ណទទួលស្គាល់ពីរាជរដ្ឋាភិបាល។
សូមជម្រាបថា នៅក្នុងកិច្ចប្រជុំពិភាក្សា និងត្រួតពិនិត្យការងារប្រចាំខែឧសភានេះ បានដាក់នូវរបៀបវារៈសម្រាប់អនុវត្តនិងដោះស្រាយ ចំនួន ៦ដូចជា៖ ១. មន្ទីរការងារនិងបណ្តុះបណ្តាលវិជ្ជាជីវៈ ត្រូវធ្វើការផ្សព្វផ្សាយអំពីកម្រងប្រកាសពាក់ព័ន្ធនឹងទម្រង់ ធ្ងន់ធ្ងរពលកម្មកុមារ ជូនមន្ទីរអង្គភាពរដ្ឋបាលក្រុង ស្រុក ឃុំ សង្កាត់ និងអង្គការដៃគូ ដែលពាក់ព័ន្ធនឹងកិច្ច ការពារកុមារ។ ២.មន្ទីរការងារ និងបណ្តុះបណ្តាលវិជ្ជាជីវៈ មន្ទីរសង្គមកិច្ច ស្នងការនគរបាលខេត្ត កងរាជអាវុធ ហត្ថខេត្ត ត្រូវធ្វើការចុះអធិការកិច្ចជាលក្ខណៈបែបទស្សនកិច្ចរួមគ្នា ដើម្បធ្វើការសំយោគ និងកំណត់អំពីនីតិវិធី លើការទប់ស្កាត់ និងដកហូតកុមារ ឱ្យស្របតាមកម្រងប្រកាសរបស់ក្រសួងការងារ និងគោលនយោបាយកាត់បន្ថយកុមារស្នាក់នៅក្នុងមណ្ឌល។ ៣. រដ្ឋបាលស្រុកពួក ត្រូវពិនិត្យ និងជួយសម្រួលដល់របស់ពលករ ដែលបាត់ដំណឹងលើសពី ០៣ឆ្នាំ ដើម្បីដាក់ពាក្យបណ្តឹងនៅប៉ុស្តិ៍នគបាលរដ្ឋបាល ឬអធិការដ្ឋាន និងបញ្ជូនមកការិយាល័យប្រឆាំងការជួញដូរមនុស្ស នៃស្នងការដ្ឋាននគរបាលខេត្ត។ ៤.រដ្ឋបាលស្រុកសូទ្រនិគម ត្រូវពិនិត្យលើបញ្ហារបស់កម្មករ ដែលមិនទទួលបានប្រាក់ឈ្នួល ថាតើពួកគាត់មិនទទួលបានពីមេការ អ្នកម៉ៅការ ឬពីក្រុមហ៊ុនសាងសង់ប្រលានយន្តហោះអន្តរជាតិថ្មីផ្ទាល់ និងត្រូវធ្វើកិច្ចសហការជាមួយមន្ទីរការងារ និងបណ្តុះបណ្តាលវិជ្ជាជីវៈ លើការដោះស្រាយបញ្ហារបស់កម្មករ ដោយត្រូវជំរុញឱ្យកម្មករដាក់ពាក្យបណ្តឹងនៅមន្ទីរការងារនិងបណ្តុះបណ្តាលវិជ្ជាជីវៈខេត្ត។ ៥. រដ្ឋបាលស្រុកស្វាយលើ ត្រូវសហការជាមួយមន្ទីរកិច្ចការនារី និងអធិការដ្ឋានស្រុកដោយប្រើយន្តការ តាមនីតិវិធីរបស់សមត្ថកិច្ចក្នុងការអញ្ជើញ ភាគីទាំងសងខាង ដើម្បីចូលមកធ្វើការដោះស្រាយនៅក្រៅប្រព័ន្ធតុលាការ ទៅតាមបែបបទនីតិវិធី (ករណីព្រមព្រៀងបែកអនីតិសង្វាស)។ ៦. រដ្ឋបាលស្រុកអង្គរធំ ត្រូវពិនិត្យ និងកែសម្រួលសមាសភាពក្រុមការងារប្រយុទ្ធប្រឆាំងអំពើជួញដូរ មនុស្សឡើងវិញ និងធ្វើការរៀបចំផែនការសកម្មភាព និងថវិកា ដោយប្រើប្រាស់ថវិកានៅក្នុងកញ្ចប់ថវិកាសេវា សង្គម សម្រាប់ដំណើរការកិច្ចប្រជុំ និងសកម្មភាពផ្សព្វផ្សាយក្នុងការទប់ស្កាត់ពើជួញដូរមនុស្ស៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក សេង ផល្លី
