ដើម្បីចូលរួមឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ មានភាពត្រឹមត្រូវ សេរីនិងយុត្តិធម៌ សហភាពសហព័ន្ធយុវជនកម្ពុជា ខេត្ដសៀមរាប នឹងដាក់អ្នកសង្កេតការណ៍របស់ខ្លួនប្រមាណជាង ៣០០០នាក់ ក្នុងដំណើរការបោះឆ្នោត និងរាប់សន្លឹកឆ្នោត ដែលនឹងប្រព្រឹត្តទៅនាថ្ងៃទី០៥ ខែមិថុនា ឆ្នាំ២០២២ ខាងមុខនេះ។
បើតាមលោក ធា សថានី អនុប្រធានសហភាពសហព័ន្ធ ខេត្ដសៀមរាប និងប្រធានក្រុមការងារទទួលបន្ទុកជម្រុញ និងតាមដានការអនុវត្ដយុទ្ធនាការ”ពលរដ្ឋល្អ” ស្ដីពីការបោះឆ្នោតក្រុមប្រឹក្សាឃុំសង្កាត់អាណត្ដិទី៥ បានឱ្យដឹងនៅថ្ងៃទី១៨ ខែឧសភា ឆ្នាំ២០២២នេះថា តាមរយ:ការបណ្តុះបណ្តាលស្តីពីអ្នកសង្កេតការណ៍បោះឆ្នោត របស់សសយក ខេត្តសៀមរាប នឹងមានសមត្ថភាពគ្រប់គ្រាន់ក្នុងការបំពេញបេសកកម្មរបស់ខ្លួនប្រកបដោយប្រសិទ្ធភាព និងគុណភាព។ ក្នុងនោះសសយក ខេត្ត បានផ្តល់គ្រូបង្គោលក្នុងការបណ្តុះបណ្តាលអំពីអ្នកសង្កេតការណ៍បោះឆ្នោត ដល់ជនបង្គោលក្រុងស្រុកទាំង១២ នៃខេត្ដសៀមរាប ដើម្បីឱ្យពួកគាត់បណ្តុះបណ្តាលបន្ត ទៅដល់អ្នកសង្កេតការណ៍ក្នុងមូលដ្ឋានក្រុងស្រុករបស់ខ្លួន។ កម្លាំងយុវជនចំនួនជាងបីពាន់នាក់នោះ ជាអ្នកសង្កេតការណ៍សំខាន់ ដើម្បីឱ្យមានយុត្ដិធម៌សម្រាប់គណបក្សនយោបាយទាំងអស់ ដែលបានចូលរួមបោះឆ្នោតក្រុមប្រឹក្សាឃុំសង្កាត់នាពេលខ្លីខាងមុខនេះ។
លោក ធា សថានី បានបន្ដថា មកដល់ពេលនេះ សសយក បានបណ្ដុះបណ្ដាលអ្នកសង្កេតការណ៍បានប្រមាណជាង ៧០ភាគរយហើយ ក្នុងចំណោមអ្នកសង្កេតការណ៍សរុប ចំនួន ៣០១៦នាក់ ដោយបានចាប់ផ្ដើមតាំងពីថ្ងៃទី០៦ ខែឧសភា ឆ្នាំ២០២២ ហើយគ្រោងនឹងបញ្ចប់នាពេលឆាប់ៗ និងមុនបោះឆ្នោតខាងមុខនេះ។ លោកក៍ថ្លែងអំណគុណដល់ឯកឧត្ដម ហ៊ុន ម៉ានី ប្រធាន សសយក ដែលបានផ្ដល់ឱ្យកាសដល់យុវជនឱ្យមានលទ្ធភាព ចូលរួមចំណែកកសាង និងអភិវឌ្ឍន៍សង្គមមនុស្សធម៌ល្អ។ជាមួយគ្នានោះ លោកក៍បានស្នើឱ្យប្រជាពលរដ្ឋទៅពិនិត្យឈ្មោះបោះឆ្នោត និងទៅបោះឆ្នោតឱ្យបានគ្រប់គ្នា ដើម្បីជ្រើសរើសថ្នាក់ដឹកនាំដែលខ្លួនស្រឡាញ់ ក្នុងនាមជាពលរដ្ឋល្អ។
លោក ធា សថានី បានបញ្ជាក់ថា ខេត្ដសៀមរាបមានការិយាល័យបោះឆ្នោត ចំនួន ១៥០៨ការិយាល័យ ដែលក្នុងនោះអ្នកសង្កេតការណ៍របស់ សសយក ត្រូវបានដាក់មួយការិយាល័យចំនួន ២នាក់ ដើម្បីតាមដានការបោះឆ្នោត និងការរាប់សន្លឹកឆ្នោតនៃការបោះឆ្នោតក្រុមប្រឹក្សាឃុំសង្កាត់អាណត្ដិទី៥ ឆ្នាំ២០២២នេះ។
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
