ផ្លូវលំមួយខ្សែដែលស្ថាបនាកាលពីឆ្នាំ២០០៦ បច្ចុប្បន្នមានសភាពទ្រុឌទ្រោមយ៉ាងខ្លាំងពិបាកក្នុងការធ្វើដំណើរឆ្លងកាត់នោះ ត្រូវបានបើកការដ្ឋានជួសជុលឡើងវិញ កាលពីរសៀលថ្ងៃទី២០ ខែឧសភា ឆ្នាំ២០២២ ក្រោមអធិបតីភាពឯកឧត្តម លន់ សុធី ប្រធានក្រុមការងារចុះមូលដ្ឋានស្រុកស្រីស្នំ ឯកឧត្តម លីវ សុខុន អនុប្រធានក្រុមការងារ និងជាប្រធានក្រុមការងារចុះជួយមូលដ្ឋាន ឃុំស្លែងស្ពាន លោក ហ៊ុន ប្ញទ្ធិ អភិបាលស្រុកស្រីស្នំ រួមនឹងលោកប្រធានក្រុមប្រឹក្សាស្រុក និងអស់លោកលោកស្រីជាអាជ្ញាធរស្រុក សមាជិកក្រុមការងារ ឃុំភូមិ និងប្រជាពលរដ្ឋជាច្រើននាក់ផងដែរ។
សូមជម្រាបថា ផ្លូវដែលធ្វើការជួយសជុលនាពេលនេះ ជាប្រភេទផ្លូវគ្រួសក្រហម មានប្រវែងជាង ១០គីឡូម៉ែត្រ ស្ថិតនៅក្នុងភូមិសាលា ឃុំស្នែងស្ពាន ស្រុកស្រីស្នំ ខេត្តសៀមរាប ដែលឆ្លងកាត់ភូមិឧប្បសម្ព័ន្ធចំនួន៧ និងតភ្ជាប់ទៅភូមិសាស្រ្តស្រុកអន្លង់វែង ខេត្តឧត្តរមានជ័យ ហើយផ្លូវនេះដែរបានធ្វើការជួសជុល ដោយការបរិចាគនូវធនធានថវិកាផ្ទាល់ខ្លួនរបស់ ឯកឧត្តម លន់ សុធី ប្រធានក្រុមការងារចុះមូលដ្ឋានស្រុកស្រីស្នំ ។
បើតាមលោក ហ៊ន់ ឬទ្ធិ អភិបាលស្រុកស្រីស្នំ បានបញ្ជាក់ឲ្យដឹងថា ផ្លូវនេះជាឆ្អឹងខ្នងនៃសេដ្ឋកិច្ចរបស់ប្រជាពលរដ្ឋ យើងមានផ្លូវ គឺមានក្តីសង្ឃឹម។ ផ្លូវគ្រួសដីក្រហមមួយខ្សែនេះ ឆ្លងកាត់ភូមិឧប្បសម្ព័ន្ធចំនួន៧ ក្នុងឃុំស្លែងស្ពាន និង តភ្ជាប់ទៅភូមិសាស្រ្តស្រុកអន្លង់វែង ខេត្តឧត្តរមានជ័យ វាផ្តល់នូវអត្ថប្រយោជន៍ដល់បងប្អូនក្នុងការដឹកជញ្ជូនកសិផលទៅកាន់ទីផ្សារ និងបង្កលក្ខណ:ងាយស្រួលដល់បងប្អូន សិស្សានុសិស្ស ធ្វើដំណើរទៅសាលារៀន និងទៅមណ្ឌលសុខភាពបានទាល់ពេលវេលាផងដែរ។ លោកបន្តថា ក្នុងរយៈពេលកន្លងមកដោយផ្លូវនេះ ឃុំគ្មានថវិកាធ្វើការជួសជុល ទើបអាជ្ញាធរឃុំ បានសំណូមពរដល់ក្រុមការងារ ដើមី្បរួមគ្នាធ្វើការជួសជុលផ្លូវនេះឡើងវិញ ទុកជាប្រយោជន៍សាធារណៈ។
ថ្លែងក្នុងឱកាសនោះ ឯកឧត្តម លន់ សុធី ប្រធានក្រុមការងារ បានមានប្រសាសន៍ថា បច្ចុប្បន្នគឺយើងទាំងគ្នាស្ថិតនៅក្រោមម្លប់សន្តិភាព បានធ្វើឲ្យបងប្អូនប្រជាពលរដ្ឋ មានការជ្រោងទង់សាមគ្គីគ្នាឡើង ក្នុងការការពារថែរក្សាសន្តិភាពនៅកម្ពុជាឲ្យបានគង់វង្ស ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ដែលជាស្ថាបនិកសន្តិភាព ធ្វើឲ្យប្រទេសជាតិយើងមានការអភិវឌ្ឍន៍រីកចម្រើនលើគ្រប់វិស័យ និងធ្វើឲ្យជីវភាពរស់នៅរបស់ប្រជាពលរដ្ឋគ្រប់មូលដ្ឋាន មានភាពល្អប្រសើរ។ ទោះបីប្រទេសជាតិយើង ក៏ដូចពិភពលោកទាំងមូលបានជួបនូវវិបត្តិកូវិដ-១៩ យ៉ាងណាក្តី ក៏ប្រមុខរាជរដ្ឋាភិបាលកម្ពុជា បានខិតខំពុះពារស្វែងរកវ៉ាក់សាំងប្រឆាំងនឹងជំងឺកូវីដ-១៩ មកចាក់ជូនដល់បងប្អូនដោយឥតគិតថ្លៃផងដែរ។
ឯកឧត្តម ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ សូមអញ្ជើញទៅចាក់វ៉ាក់សាំងការពារជម្ងឺកូវីដ-១៩ ដូសទី៣ និងដូសទី៤ ដែលជាដូសជម្រុញ និងសូមឲ្យបងប្អូនអញ្ជើញទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃអាទិត្យទី០៥ ខែមិថុនា ឆ្នាំ២០២២ ខាងមុខនេះ ឲ្យបានគ្រប់ៗគ្នា ដើមី្បជ្រើសរើសមេដឹកនាំមូលដ្ឋានដែលពេញចិត្ត ជួយដោះស្រាយបងប្អូននៅក្នុងឃុំ ស្រុក ក្នុងការបន្តការអភិវឌ្ឍក្នុងមូលដ្ឋានភូមិ ឃុំរបស់ខ្លួន និងចូលរួមគោរពនូវច្បាប់ចរាចរណ៍ បើកបរត្រូវគោរពនូវសីលធម៌ និងចូលរួមថែរក្សាផ្លូវថ្នល់ក្នុងមូលដ្ឋាននេះ ដើមី្បធានាក្នុងការប្រើប្រាស់បានយូរអង្វែងទៀត៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក លីវ សុខុន
