គណៈកម្មការត្រួតពិនិត្យ និងវាយតម្លៃលើការអនុវត្តគោលនយោបាយជាតិស្តីពីមុខរបរ និងការងារខេត្តសៀមរាប សម្រាប់ឆ្នាំ២០១៥-២០២៥ នាព្រឹកថ្ងៃទី២០ ខែឧសភា ឆ្នាំ២០២២នេះ បានបើកកិច្ចប្រជុំស្តីពីការអនុម័តផែនការសកម្មភាពឆ្នាំ២០២២-២០២៣ ក្រោមអធិបតីភាពឯកឧត្តម សោម ចំណាន អនុរដ្ឋលេខាធិការក្រសួងការងារ នឹងបណ្តុះបណ្តាលវិជ្ជាជីវៈ និងជាប្រធានលេខាធិការដ្ឋានគណៈកម្មការអន្តរក្រសួង និង លោក នាក់ ណេរ៉ុន អភិបាលរងខេត្ត និងជាអនុប្រធានគណៈកម្មការ ដោយមានការចូលរួមពីសំណាក់លោកលោកស្រី ជាថ្នាក់ដឹកនាំនៃមន្ទីរអង្គភាពក្នុងខេត្តជាច្រើនរូបទៀត។
ក្នុងឱកាសនោះលោក នាក់ ណេរ៉ុន បានធ្វើការវាយតម្លៃខ្ពស់ចំពោះសមិទ្ធផលសម្រេចបាននាពេលកន្លងមក ដែលឆ្លុះបញ្ចាំងឱ្យឃើញថា ទោះបីជារងការគម្រាមកំហែងយ៉ាងធ្ងន់ធ្ងរ ពីវិបត្តិនៃជំងឺកូវីដ-១៩ ក៏ដោយ តែគណៈកម្មការខេត្តសៀមរាប រួមនឹងស្ថាប័នពាក់ព័ន្ធនៅតែខិតខំបំពេញតួនាទីរបស់ខ្លួន ប្រកបដោយស្មារតីទទួលខុសត្រូវខ្ពស់។ វឌ្ឍនភាពសំខាន់ៗ នៃការអនុវត្តគោលនយោបាយ ដែលគណៈកម្មការត្រួតពិនិត្យ និងវាយតម្លៃ លើការអនុវត្តគោលនយោបាយជាតិស្តីពីមុខរបរ និងការងារខេត្តសៀមរាប រួមនឹងស្ថាប័នពាក់ព័ន្ធខិតខំសម្រេចបាននូវសមិទ្ធិផលជាច្រើនមកទល់ពេលនេះ ហើយបានបង្ហាញឲ្យឃើញពីការសហការគ្នាល្អរវាងក្រុមការងារថ្នាក់ជាតិ និងថ្នាក់ក្រោមជាតិ រួមនឹងមន្ទីរអង្គភាពពាក់ព័ន្ធក្នុងខេត្តផងដែរ។
លោក នាក់ ណេរ៉ុន ជាក់ស្ដែងជាលទ្ធផលសម្រាប់កិច្ចប្រជុំនាឱកាសនេះដែរ អង្គប្រជុំប្រជុំបានពិនិត្យ និងអនុម័តជាឯកច្ឆន្ទលើសេចក្ដីព្រាងរបាយការណ៍ វឌ្ឍនភាពសម្រាប់ឆ្នាំ២០២១ នៃការអនុវត្តគោលនយោបាយជាតិស្តីពីមុខរបរ និងការងារឆ្នាំ២០១៥-២០២៥។ ជាមួយនោះលោកក៏បានស្នើសុំថ្នាក់ដឹកនាំមន្ទីរស្ថាប័ណ រួមនឹងវិស័យឯកជន និងអង្គភាពពាក់ព័ន្ធ ត្រូវបង្កើនការយកចិត្តទុកដាក់បន្ថែមទៀត ក្នុងការចូលរួមអនុវត្តគោលនយោបាយនេះ ដើម្បីធ្វើការផ្លាស់ប្តូរ និងលើកស្ទួយរចនាសម្ព័នឧស្សាកម្ម ពីឧស្សាហកម្មអតិពលកម្ម ទៅជាឧស្សាហកម្មពលកម្ម ផ្អែកលើជំនាញ នៅឆ្នាំ២០២៥ ក៏ដូចជាការលើកកម្ពស់ការប្រកួតប្រជែង និងផលិតភាព សំដៅប្រែក្លាយពីឧស្សាហកម្មមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ ស្របតាមគោលនយោបាយជាតិ អភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥។
មានប្រសាសន៍ក្នុងកិច្ចប្រជុំនេះដែរ ឯកឧត្តម សោម ចំណាន បានឯកភាពជាមួយស្ថានភាពលំបាកដោយសារវិបត្តិនៃជំងឺកូវីដ-១៩ ដែលបណ្តាលឱ្យអាក់ខានការងារ ទាំងថ្នាក់ខេត្ត និងថ្នាក់ជាតិ តែយ៉ាងណាក៍ដោយក៍យើងបានខិតខំប្រឹងប្រែងអនុវត្តការងារយ៉ាងអស់ពីលទ្ឋភាពដែលអាចធ្វើបាន ហើយពេលនេះ គឺជាវេលាសមស្របដែលយើង នឹងចាប់ផ្តើមរៀបចំឱ្យមាននូវផែនការសកម្មភាពច្បាស់លាស់ សម្រាប់គណៈកម្មការនៅថ្នាក់ក្រោមជាតិ ក្នុងការអនុវត្តគោលនយោបាយនេះ។ ជាមួយគ្នានោះខេត្តសៀមរាបត្រូវបានជ្រើសរើសជាខេត្តគំរូដំបូងគេ សម្រាប់ការកសាងនូវផែនការសកម្មភាព ដើម្បីអនុវត្តគោលនយោបាយជាតិស្តីពីមុខរបរ និងការងារ និងដើម្បីជួយផ្នែកបច្ចេកទេសសម្រាប់លេខាធិការដ្ឋានគណៈកម្មការថ្នាក់ខេត្ត អាចអនុវត្តការងាររបស់ខ្លួនបានដោយរលូន។
ឯកឧត្តម សោម ចំណាន មានប្រសាសន៍បន្តថា ចំពោះលទ្ធផលនៃកិច្ចប្រជុំស្ដីពីការពិនិត្យ និងអនុប័តនាថ្ងៃនេះដែរ វាបានបង្ហាញឲ្យឃើញថា ការដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ គឺមានចក្ខុវិស័យខ្ពស់ ក្នុងការជំរុញ និងកែប្រែក្នុងការធ្វើទំនើបកម្ម រចនាសម្ព័ន្ធឧស្សហកម្មនៅកម្ពុជា ពីឧស្សាហកម្មអតិពលកម្ម ឈានទៅឧស្សាហកម្មផ្អែកលើជំនាញត្រឹមត្រូវឆ្នាំ២០២៥ សំដៅផ្លាស់ប្តូរពីឧស្សាហកម្ម ដែលមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ ព្រមទាំងដើម្បីលើកកម្ពស់ភាពប្រកួតប្រជែង និងផលិតភាពការងារ។ ក្នុងនោះសម្រាប់អនុវត្តគោលនយោបាយជាតិ ស្តីពីមុខរបរ និងការងារឆ្នាំ២០១៥-២០២៥ ដើម្បីឲ្យស្របទៅតាមយន្តការណ៍នៃការអនុវត្តគោលនយោបាយនេះ ឱ្យមានប្រសិទ្ធភាពទាមទារនូវកិច្ចសហការដោយមានការសម្របសម្រួលដ៏ទន់ភ្លន់រវាងវិស័យនានាជាប់ទាក់ទងទៅនឹងវិស័យមុខរបរ និងការងារ តែបើក្រសួងការងារ និងបណ្តុះបណ្តាលវិជ្ជាជីវៈ ដើរតួតែម្នាក់ឯង នោះពិតជាមិនអាចទទួលរ៉ាប់រងអនុវត្តឱ្យទទួលបានជោគជ័យឡើយ៕
អត្ថបទ និង រូបភាព៖ លោក អ៊ុន ណារាជ្យ
