នាព្រឹកថ្ងៃទី២០ ខែឧសភា ឆ្នាំ២០២២នេះ ព្រះធម្មសិរី ជុំ គីមឡុង ព្រះរាជាគណៈថ្នាក់កិត្តិយស ជាព្រះមេគណខេត្ត និងព្រះធម្មកវីវង្ស នង មាណវោ ព្រះរាជាគណៈថ្នាក់ត្រី ព្រះមេគណខេត្ត បានអញ្ជើញជាអធិបតីក្នុងពិធីសំណេះសំណាល ជាមួយព្រះមន្ត្រីសង្ឃ អាចារ្យ អាចារិនី គណៈកម្មការ គ្រូគង្វាលគ្រីស្ទបរិស័ទ គណៈអ៊ីមុំា អ៊ីម៉ាំម៉ាស្ទិទទូទាំងខេត្តសៀមរាប ដែលប្រារព្ធធ្វើនៅវត្តរាជបូណ៌ ដោយមានការនិមន្ត និងអញ្ជើញចូលរួមពីសំណាក់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោកស្រី យូ សុភា អភិបាលរងខេត្ត ព្រមទាំងព្រះសង្ឃ លោកអាចារ្យ អាចារិនី លោក លោកស្រី គណៈចលនាសាសនិក ឥស្លាម គណៈកម្មការ គ្រូគង្វាលគ្រីស្ទបរិស័ទទូទាំងខេត្តជាច្រើនរូបទៀត។
ថ្លែងក្នុងឱកាសនោះ ឯកឧត្តម អ៊ាន ឃុន បានបានផ្តល់អនុសាសន៍ចំនួន ៦ចំនុច សម្រាប់ជាគោលការណ៍ក្នុង ការគោរពសិទ្ធិសេរីភាពខាងជំនឿសាសនា លើកស្ទួយព្រះពុទ្ធសាសនាជាសាសនារបស់រដ្ឋ និងបង្កលក្ខណៈងាយស្រួលដល់សកម្មភាព នៃសាសនាផ្សេងៗទៀត ដោយផ្អែកលើមូលដ្ឋានជៀសវាងការរើសអើង ការបែងចែកភាពខុសគ្នាខាងជំនឿ និងសាសនា៖ ទី១.ត្រូវរួមគ្នាអនុវត្តឲ្យបានខ្ជាប់ខ្ជួន តាមបទប្បញ្ញត្តិរដ្ឋធម្មនុញ្ញនៃព្រះរាជាណាចក្រកម្ពុជា ច្បាប់ និងលិខិត បទដ្ឋានគតិយុត្តនានា ដែលមានស្រាប់ ដូចជា ព្រះរាជក្រម ព្រះរាជក្រឹត្យ អនុក្រឹត្យ សង្ឃប្រកាស សារាចរ សេចក្តីសម្រេច និង ស.ជ.ណ របស់ ទីស្តីការគណៈរដ្ឋមន្ត្រី និងក្រសួងស្ថាប័ននានា ក៏ត្រូវអនុវត្តឲ្យបានខ្ជាប់ខ្ជួន ដើម្បីប្រែក្លាយជាកម្លាំងចលករដ៏មានសារៈសំខាន់សម្រាប់លើកស្ទួយវិស័យសាសនា ឲ្យកាន់តែរឹងមាំ ល្អផូរផង់ ស្ថិតស្ថេរតទៅ។ ទី២.ត្រូវបន្តធ្វើការបណ្តុះបណ្តាលកសាងសមត្ថភាពធនធានមនុស្ស និងការអភិវឌ្ឍអង្គភាព ស្ថាប័នរបស់ខ្លួន ដើម្បីពង្រឹងរបៀបរបបការងារ ឲ្យកាន់តែមានប្រសិទ្ធភាព និងភាពទទួលខុសត្រូវខ្ពស់។ ទី៣.ត្រូវរក្សាសាមគ្គីភាព និងមានសុខដុមនីយកម្មសាសនា គឺរវាងព្រះពុទ្ធសាសនា គ្រីស្ទសាសនា ឥស្លាម សាសនា និងសាសនាផ្សេងៗទៀត ជៀសវាងការបង្កបញ្ហាជម្លោះអធិករណ៍ណាមួយកើតឡើង។ ទី៤.ត្រូវរួបរួមគ្នាថែរក្សា សន្តិភាព អរគុណនយោបាយ ឈ្នះឈ្នះ ដឹងគុណស្ថាបនិក មគ្គុទេសក៏ឯកដែលបាននាំមកនូវសន្តិភាព និងឯកភាពជាតិពេញលេញ ឱ្យបានគង់វង្ស។ ទី៥.ត្រូវបន្តចូលរួមទប់ស្កាត់ការឆ្លងរីករាលដាលជំងឺកូវីដ-១៩ តាមរយៈការបន្តកៀរគរប្រជាជនទៅចាក់វ៉ាក់សាំង ដួសជម្រុញ និងការអនុវត្តវិធានការសុខាភិបាលនានា និងទី៦.ត្រូវទៅចូលរួមបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៥ នាពេលខាងមុខឲ្យបានគ្រប់ៗគ្នា។
ក្នុងឱកាសនោះដែរលោកស្រី យូ សុភា អភិបាលរងខេត្ត មានប្រសាសន៍ថា ការពង្រឹងគុណភាពលើអភិបាលកិច្ចគ្រប់លំដាប់ថ្នាក់ក្នុងជួរមន្ត្រីសង្ឃ ក៏ដូចជាគ្រប់សាសនិក ត្រូវផ្សារភ្ជាប់ជាមួយបច្ចេកវិទ្យាទំនើប ដើម្បីធានាបាននូវសាមគ្គីភាព និងការរីកចំរើនលើគ្រប់សាសនា។ លោកស្រីបានថ្លែងអំណរព្រះគុណ និងកោតសរសើរ ចំពោះសាសនិកដោយស្មោះប្រកបដោយក្តីរីករាយ និងមោទនភាពបំផុត ដែលបានឃើញនូវកម្លាំងសាមគ្គីដ៏ល្អប្រសើររវាងព្រះសង្ឃ និងពុទ្ធសាសនិក និងគ្រប់សាសនិកដទៃទៀត ដែលមាន ការគាំទ្រយ៉ាងពេញទំហឹងពីរាជរដ្ឋាភិបាលដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នព្រះរាជាណាចក្រកម្ពុជាជាប្រមុខ។
លោកស្រីមានប្រសាសន៍បន្ថែំថា នៅតាមវត្តអារាម វិហារ ស៊ូរ៉ា ស្នាក់ការថ្វាយបង្គំ បានប្រែក្លាយជាដំបូន្មាន ជួយអប់រំកូនចៅឲ្យប្រតិបតិ្តតែអំពើល្អដែលជាការរួមចំណែក ក្នុងការកសាងធនធានមនុស្សឱ្យបានល្អដល់សង្គម និងប្រទេសជាតិ។ ហើយម្យ៉ាងទៀត ក៏សូមបន្តអនុវត្តន៍ ឲ្យបាននូវគោលនយោបាយរបស់រាជរដ្ឋាភិបាល ដែលបានកំណត់ថា ការគោរពសិទ្ធិសេរីភាពខាងជំនឿសាសនា លើកស្ទួយព្រះពុទ្ធសាសនាជាសាសនារបស់រដ្ឋ និងបង្កលក្ខណៈងាយស្រួលដល់សកម្មភាព នៃសាសនាផ្សេងៗទៀត ដោយផ្អែកលើមូលដ្ឋានជៀសវាងការរើសអើង ការបែងចែកភាពខុសគ្នាខាងជំនឿ និងសាសនា៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
