អនុស្សរណៈនៃការយោគយល់គ្នាស្តីអំពីកិច្ចសហប្រតិបត្តិការលើកម្មវិធី ធីតាសង្រ្កាន្តឆ្នាំថ្មី និងកិច្ចព្រមព្រៀងផ្តល់សិទ្ធិកម្មសិទ្ធិបញ្ញាវីដេអូ ទៅវិញទៅមក រវាងទូរទស្សន៍ជាតិកម្ពុជា និងក្រុមហ៊ុនហ្វឺសយូណាយ ណេតវើកអេនធើធេនម៉ិន បានធ្វើពិធីចុះហត្ថលេខានៅព្រឹកថ្ងៃទី២៣ ខែឧសភា ឆ្នាំ២០២២ នារាជធានីភ្នំពេញ ក្រោមអធិបតីភាព ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន ហើយភាគីចុះហត្ថលេខាធ្វើឡើងរវាង ឯកឧត្តម ឃឹម វុទ្ធី អគ្គនាយកទូរទស្សន៍ជាតិកម្ពុជា និង លោកស្រី អ៉ីង ស៊ែរ អគ្គនាយិកា ក្រុមហ៊ុនហ្វឺសយូណាយ ណេតវើកអេនធើធេនម៉ិន។
មានប្រសាសន៍នាលាសនោះ ឯកឧត្តម រដ្ឋមន្រ្តី ខៀវ កាញារីទ្ធ បានសំដែងនូវការកោតសរសើរ និងវាយតំលៃខ្ពស់ ចំពោះលទ្ធផលការងារនៃកិច្ចសហការរវាង ទូរទស្សន៍ជាតិកម្ពុជា និងក្រុមហ៊ុនហ្វឺសយូណាយ ណេតវើកអេនធើធេនម៉ិន ក្នុងការផលិតកម្មវិធីល្អៗ បានជាច្រើន ធ្វើអោយទូរទស្សន៍ជាតិកម្ពុជា កាន់តែមានប្រជាប្រិយ៍ភាពបន្តទៀត។ ក្រៅពីកម្មវិធី ធីតាសង្រ្កាន្តសម្រាប់ឆ្នាំទៅមុខទៀតនេះ សង្ឃឹមថា ទទក និងក្រុមហ៊ុនហ្វឺសយូណាយ ណេតវើកអេនធើធេនម៉ិន នឹងធ្វើការផលិតកម្មវិធីល្អៗជាច្រើនទៀត ជាពិសេសការផ្លាស់ប្តូរវប្បធម៍រវាងប្រទេសទាំងពីរ កម្ពុជា-ចិន បានកាន់តែមានភាពយល់គ្នាច្បាស់ ដូចប្រសាសន៍របស់សម្តេចតេជោនាយករដ្ឋមន្រ្តី ហ៊ុន សែន បានបញ្ជាក់ហើយថា ការរីកចំរើនរបស់ប្រទេសកម្ពុជា នាពេលបច្ចុប្បន្ននេះ គឺមិនអាចកាត់ផ្តាច់បានពីការជួយ និងកិច្ចសហការពីប្រទេសចិនជាមិត្ត។ ដូច្នេះការស្វែងយល់ពីគ្នា គឺជាការចាំបាច់ដែលយើងកាន់តែមានកិច្ចសហការគ្នាល្អ កាន់តែយល់គ្នា ហើយដើម្បីជៀសរាល់ទំនាស់នានា ដែលអាចកើតមានឡើង អាស្រ័យលើកិច្ចសហប្រតិបត្តិការល្អ។
ឆ្លៀតក្នុងឱកាសនេះ ឯកឧត្តម រដ្ឋមន្រ្តី បានជម្រុញលើកទឹកចិត្តដល់ដៃគូកិច្ចសហការល្អទាំងពីរខាងលើ បន្តបំពេញកិច្ចការងារ ពិគ្រោះប្រាស្រ័យទាក់ទងជាមួយគ្នា ស្វែងរកវិស័យផ្សេងៗទៀត ដើម្បីជាផលប្រយោជន៍សម្រាប់ភាគីទាំងពីរ និងភាពរីកចំរើនរបស់ប្រជាជនទាំងពីរផងដែរ។
គួររំលឹកដែរថា អគ្គនាយកដ្ឋានទូរទស្សន៍ជាតិកម្ពុជានិងក្រុមហ៊ុន ហ្វឺសយូណាយ ណេតវើក អេនធើធេនម៉ិន ឯ.ក បានចុះអនុស្សរណៈនៃការយោគយល់គ្នាមួយ នៅថ្ងៃទី០៧ ខែសីហា ឆ្នាំ២០២០ ដើម្បីជម្រុញ និងបង្កើនកិច្ចសហប្រតិបត្តិការឈរលើគោលការណ៍គាំទ្រគ្នាទៅវិញទៅមករវាងភាគីទាំងពីរ លើគម្រោងផលិតកម្មវិធី (ធីតាឯកសង្ក្រាន្ត) ហើយ ភាគីទាំងពីរមានបំណង បន្ត និងជម្រុញកិច្ចសហប្រតិបត្តិការនេះឲ្យកាន់តែល្អប្រសើរនិងប្រសិទ្ធិភាព ដើម្បីផលប្រយោជន៍រួមគ្នារយៈពេលយូរ។ ហេតុដូចនេះ ភាគីទាំងពីរបានព្រមព្រៀងគ្នាកែសម្រួលខ្លឹមសារ នៃប្រការមួយចំនួននៃអនុស្សរណៈតាម ខ្លឹមសារដូចមានចែងខាងលើ និងចុះហត្ថលេខានាឱកាសនេះ៕