នៅព្រឹកថ្ងៃទី២០ ខែឧសភា ឆ្នាំ២០២២ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានដឹកនាំតំណាងស្ថានទូតប្រចាំនៅកម្ពុជា ដៃគូអភិវឌ្ឍន៍ និងវិស័យឯកជន ចុះទស្សនកិច្ចសិក្សាស្វែងយល់ពីសារៈមន្ទីរសន្តិភាពសកម្មភាពកំចាត់មីន នៃមជ្ឈមណ្ឌលសកម្មភាពកំចាត់មីនកម្ពុជា ស្ថិតនៅភូមិត្រពាំងធំឃុំត្រពាំងធំ ស្រុកប្រាសាទ បាគងខេត្តសៀមរាប ដើម្បីស្វែងយល់អំពីសមិទ្ធផលសម្រេចបាននៃការងារបោសសម្អាតមីន និងសំណល់ជាតិផ្ទុះពីសង្រ្គាមនៅកម្ពុជា ដែលជាលទ្ធផលបានមកពីមរតកនៃសង្រ្គាមរ៉ាំរ៉ៃអស់រយៈពេលជាង ៣ទសវត្សរ៍នៅកម្ពុជា។
បើតាមឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានឲ្យដឹងថា ក្នុងរយៈពេល ៣០ឆ្នាំ គិតតាំងពីឆ្នាំ១៩៩២ ដល់ឆ្នាំ២០២២នេះ អង្គភាពស៊ីម៉ាក់ បានបោសសម្អាតផ្ទៃដីបានចំនួនជាង ១៣លានហិកតា និងរកឃើញគ្រាប់មីន និងសំណល់យុទ្ធភណ្ឌសង្រ្គាម ជិត ៣លានគ្រាប់។ បន្ទាប់ពីរាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រជាតិកម្ពុជាគ្មានគ្រាប់មីននៅឆ្នាំ២០២៥ ហើយក្នុងការអនុវត្តយុទ្ធសាស្រ្តនេះ អង្គភាពស៊ីម៉ាក់ មានលទ្ធភាពឆ្លើយតបក្នុងការបោះជំហានទៅមុខក្នុងការសម្រេចគោលដៅ ដោយត្រូវបោសសម្អាតផ្ទៃដីដែលនៅមានមីនចំនួនជិត ៨០០គីឡូម៉ែត្រក្រឡា និងផ្ទៃដីដែលរងផលប៉ះពាល់ពីសំណល់ជាតិផ្ទុះពីសង្គ្រាមប្រមាណជា ១២០០គីឡូម៉ែត្រក្រឡាទៀត។
មានប្រសាសន៍ក្នុងឱកាសនោះឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានវាយតម្លៃខ្ពស់ ចំពោះកិច្ចខិតខំប្រឹងប្រែង និងការលះបង់គ្រប់បែបយ៉ាង របស់កងកម្លាំងបោសសម្អាតគ្រាប់មីន ក្នុងមជ្ឈមណ្ឌលស៊ីម៉ាក់រយៈពេល ៣០ឆ្នាំ ដែលបានចូលរួមចំណែកដល់ការអភិវឌ្ឍសេដ្ឋកិច្ច-សង្គម និងកាត់បន្ថយអត្រាគ្រោះថ្នាក់ ដោយសារមីន/គ្រាប់ ដែលនេះបញ្ជាក់ឲ្យឃើញពីយកចិត្តទុកដាក់របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាស្ថាបនិកសន្តិភាព ព្រមទាំងមានចូលរួមឧបត្ថម្ភគាំទ្រពីបណ្តាប្រទេសជាមិត្ត និងដៃគូអភិវឌ្ឍន៍ដទៃទៀត។
ព័ត៌មានជាតិ ថ្មីៗ
ឯកឧត្តមទេសរដ្ឋមន្រ្តី បានបញ្ជាក់បន្ថែមទៀតថា មជ្ឈមណ្ឌលស៊ីម៉ាក់ បានធ្វើការក្នុងភាពជាដៃគូយ៉ាងជិតស្និទ្ធជាមួយអាជ្ញាធរមីន ដែលជាសេនាធិការរបស់រាជរដ្ឋាភិបាលកម្ពុជា ក្នុងការសម្របសម្រួល គ្រប់គ្រង និងត្រួតពិនិត្យវិស័យសកម្មភាពមីននៅកម្ពុជា ក្នុងការឆ្លើយតបនឹងបញ្ហាមីន និងសំណល់ជាតិផ្ទុះពីសង្រ្គាម៕
អត្ថបទ និង រូបភាព៖ លោក ជា ស្រស់ ,លោក យូ វង្ស
កែសម្រួល៖ លោក អ៊ុន ណារាជ្យ
